กมฺมปจฺจโย

[148] สเหตุโก เจว น จ เหตุ ธมฺโม สเหตุกสฺส เจว น จ เหตุสฺส ธมฺมสฺส กมฺมปจฺจเยน ปจฺจโย – สหชาตา, นานากฺขณิกาฯ สหชาตา – สเหตุกา เจว น จ เหตู เจตนา สมฺปยุตฺตกานํ ขนฺธานํ กมฺมปจฺจเยน ปจฺจโย; ปฏิสนฺธิกฺขเณ…เป.…ฯ นานากฺขณิกา – สเหตุกา เจว น จ เหตู เจตนา วิปากานํ สเหตุกานญฺเจว น จ เหตูนํ ขนฺธานํ กมฺมปจฺจเยน ปจฺจโยฯ (1)

สเหตุโก เจว น จ เหตุ ธมฺโม เหตุสฺส เจว สเหตุกสฺส จ ธมฺมสฺส กมฺมปจฺจเยน ปจฺจโย – สหชาตา, นานากฺขณิกาฯ สหชาตา – สเหตุกา เจว น จ เหตู เจตนา สมฺปยุตฺตกานํ เหตูนํ กมฺมปจฺจเยน ปจฺจโย; ปฏิสนฺธิกฺขเณ…เป.…ฯ นานากฺขณิกา – สเหตุกา เจว น จ เหตู เจตนา วิปากานํ เหตูนํ กมฺมปจฺจเยน ปจฺจโยฯ (2)

สเหตุโก เจว น จ เหตุ ธมฺโม เหตุสฺส เจว สเหตุกสฺส จ สเหตุกสฺส เจว น จ เหตุสฺส จ ธมฺมสฺส กมฺมปจฺจเยน ปจฺจโย – สหชาตา, นานากฺขณิกาฯ สหชาตา – สเหตุกา เจว น จ เหตู เจตนา สมฺปยุตฺตกานํ ขนฺธานํ เหตูนญฺจ กมฺมปจฺจเยน ปจฺจโย; ปฏิสนฺธิกฺขเณ…เป.…ฯ นานากฺขณิกา – สเหตุกา เจว น จ เหตู เจตนา วิปากานํ ขนฺธานํ เหตูนญฺจ กมฺมปจฺจเยน ปจฺจโยฯ (3)

วิปากปจฺจโย

[149] เหตุ เจว สเหตุโก จ ธมฺโม เหตุสฺส เจว สเหตุกสฺส จ ธมฺมสฺส วิปากปจฺจเยน ปจฺจโย – วิปาโก อโลโภ อโทสสฺส อโมหสฺส จ วิปากปจฺจเยน ปจฺจโย (จกฺกํ); ปฏิสนฺธิกฺขเณ อโลโภ (ยถา เหตุปจฺจยา เอวํ วิตฺถาเรตพฺพํ, นวปิ วิปากนฺติ นิยาเมตพฺพํ)ฯ

อาหารปจฺจยาทิ

[150] สเหตุโก เจว น จ เหตุ ธมฺโม สเหตุกสฺส เจว น จ เหตุสฺส ธมฺมสฺส อาหารปจฺจเยน ปจฺจโย… ตีณิฯ

เหตุ เจว สเหตุโก จ ธมฺโม เหตุสฺส เจว สเหตุกสฺส จ ธมฺมสฺส อินฺทฺริยปจฺจเยน ปจฺจโย (อินฺทฺริยนฺติ นิยาเมตพฺพํ, นวปิ ปริปุณฺณํ)ฯ

สเหตุโก เจว น จ เหตุ ธมฺโม สเหตุกสฺส เจว น จ เหตุสฺส ธมฺมสฺส ฌานปจฺจเยน ปจฺจโย… ตีณิฯ