เมนู

เหตุปจฺจโย

[102] อุปาทาโน เจว อุปาทานสมฺปยุตฺโต จ ธมฺโม อุปาทานสฺส เจว อุปาทานสมฺปยุตฺตสฺส จ ธมฺมสฺส เหตุปจฺจเยน ปจฺจโย – อุปาทานา เจว อุปาทานสมฺปยุตฺตา จ เหตู สมฺปยุตฺตกานํ อุปาทานานํ เหตุปจฺจเยน ปจฺจโยฯ (มูลํ ปุจฺฉิตพฺพํ) อุปาทานา เจว อุปาทานสมฺปยุตฺตา จ เหตู สมฺปยุตฺตกานํ ขนฺธานํ เหตุปจฺจเยน ปจฺจโยฯ (มูลํ ปุจฺฉิตพฺพํ) อุปาทานา เจว อุปาทานสมฺปยุตฺตา จ เหตู สมฺปยุตฺตกานํ ขนฺธานํ อุปาทานานญฺจ เหตุปจฺจเยน ปจฺจโยฯ (3)

[103] อุปาทานสมฺปยุตฺโต เจว โน จ อุปาทาโน ธมฺโม อุปาทานสมฺปยุตฺตสฺส เจว โน จ อุปาทานสฺส ธมฺมสฺส เหตุปจฺจเยน ปจฺจโย – อุปาทานสมฺปยุตฺตา เจว โน จ อุปาทานา เหตู สมฺปยุตฺตกานํ ขนฺธานํ เหตุปจฺจเยน ปจฺจโยฯ (มูลํ ปุจฺฉิตพฺพํ) อุปาทานสมฺปยุตฺตา เจว โน จ อุปาทานา เหตู สมฺปยุตฺตกานํ อุปาทานานํ เหตุปจฺจเยน ปจฺจโยฯ (มูลํ ปุจฺฉิตพฺพํ) อุปาทานสมฺปยุตฺตา เจว โน จ อุปาทานา เหตู สมฺปยุตฺตกานํ ขนฺธานํ อุปาทานานญฺจ เหตุปจฺจเยน ปจฺจโยฯ (3)

[104] อุปาทาโน เจว อุปาทานสมฺปยุตฺโต จ อุปาทานสมฺปยุตฺโต เจว โน จ อุปาทาโน จ ธมฺมา อุปาทานสฺส เจว อุปาทานสมฺปยุตฺตสฺส จ ธมฺมสฺส เหตุปจฺจเยน ปจฺจโย – อุปาทานา เจว อุปาทานสมฺปยุตฺตา จ อุปาทานสมฺปยุตฺตา เจว โน จ อุปาทานา จ เหตู สมฺปยุตฺตกานํ อุปาทานานํ เหตุปจฺจเยน ปจฺจโยฯ (มูลํ ปุจฺฉิตพฺพํ) อุปาทานา เจว อุปาทานสมฺปยุตฺตา จ อุปาทานสมฺปยุตฺตา เจว โน จ อุปาทานา จ เหตู สมฺปยุตฺตกานํ ขนฺธานํ เหตุปจฺจเยน ปจฺจโยฯ (มูลํ ปุจฺฉิตพฺพํ) อุปาทานา เจว อุปาทานสมฺปยุตฺตา จ อุปาทานสมฺปยุตฺตา เจว โน จ อุปาทานา จ เหตู สมฺปยุตฺตกานํ ขนฺธานํ อุปาทานานญฺจ เหตุปจฺจเยน ปจฺจโยฯ (3)

อารมฺมณปจฺจโย

[105] อุปาทาโน เจว อุปาทานสมฺปยุตฺโต จ ธมฺโม อุปาทานสฺส เจว อุปาทานสมฺปยุตฺตสฺส จ ธมฺมสฺส อารมฺมณปจฺจเยน ปจฺจโย – อุปาทาเน อารพฺภ อุปาทานา อุปฺปชฺชนฺติฯ (มูลํ ปุจฺฉิตพฺพํ) อุปาทาเน อารพฺภ อุปาทานสมฺปยุตฺตา เจว โน จ อุปาทานา ขนฺธา อุปฺปชฺชนฺติฯ (มูลํ ปุจฺฉิตพฺพํ) อุปาทาเน อารพฺภ อุปาทานา จ สมฺปยุตฺตกา จ ขนฺธา อุปฺปชฺชนฺติฯ (3)

อุปาทานสมฺปยุตฺโต เจว โน จ อุปาทาโน ธมฺโม อุปาทานสมฺปยุตฺตสฺส เจว โน จ อุปาทานสฺส ธมฺมสฺส อารมฺมณปจฺจเยน ปจฺจโย – อุปาทานสมฺปยุตฺเต เจว โน จ อุปาทาเน ขนฺเธ อารพฺภ อุปาทานสมฺปยุตฺตา เจว โน จ อุปาทานา ขนฺธา อุปฺปชฺชนฺติ (ตีณิปิ กาตพฺพา, ฆฏเน ตีณิปิ กาตพฺพา)ฯ

อธิปติปจฺจโย

[106] อุปาทาโน เจว อุปาทานสมฺปยุตฺโต จ ธมฺโม อุปาทานสฺส เจว อุปาทานสมฺปยุตฺตสฺส จ ธมฺมสฺส อธิปติปจฺจเยน ปจฺจโย… ตีณิฯ (3)

อุปาทานสมฺปยุตฺโต เจว โน จ อุปาทาโน ธมฺโม อุปาทานสมฺปยุตฺตสฺส เจว โน จ อุปาทานสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ (ตีณิปิ, ตีสุปิ ทฺเวปิ อธิปติ กาตพฺพา, ฆฏนาธิปติปิ ตีณิ)ฯ

อนนฺตรปจฺจโย

[107] อุปาทาโน เจว อุปาทานสมฺปยุตฺโต จ ธมฺโม อุปาทานสฺส เจว อุปาทานสมฺปยุตฺตสฺส จ ธมฺมสฺส อนนฺตรปจฺจเยน ปจฺจโย – ปุริมา ปุริมา อุปาทานา เจว อุปาทานสมฺปยุตฺตา จ ขนฺธา ปจฺฉิมานํ ปจฺฉิมานํ อุปาทานานํ อนนฺตรปจฺจเยน ปจฺจโย (เอวํ นวปิ ปญฺหา กาตพฺพา, อาวชฺชนาปิ วุฏฺฐานมฺปิ นตฺถิ)ฯ

สมนนฺตรปจฺจยาทิ

[108] อุปาทาโน เจว อุปาทานสมฺปยุตฺโต จ ธมฺโม อุปาทานสฺส เจว อุปาทานสมฺปยุตฺตสฺส จ ธมฺมสฺส สมนนฺตรปจฺจเยน ปจฺจโย… นว… สหชาตปจฺจเยน ปจฺจโย… นว… อญฺญมญฺญปจฺจเยน ปจฺจโย… นว… นิสฺสยปจฺจเยน ปจฺจโย… นวฯ

อุปนิสฺสยปจฺจโย

[109] อุปาทาโน เจว อุปาทานสมฺปยุตฺโต จ ธมฺโม อุปาทานสฺส เจว อุปาทานสมฺปยุตฺตสฺส จ ธมฺมสฺส อุปนิสฺสยปจฺจเยน ปจฺจโย…เป.… ตีณิฯ