เหตุปจฺจโย

[95] อุปาทานญฺเจว อุปาทานิยญฺจ ธมฺมํ ปฏิจฺจ อุปาทาโน เจว อุปาทานิโย จ ธมฺโม อุปฺปชฺชติ เหตุปจฺจยา – ทิฏฺฐุปาทานํ ปฏิจฺจ กามุปาทานํ, กามุปาทานํ ปฏิจฺจ ทิฏฺฐุปาทานํ (จกฺกํ)ฯ (1)

อุปาทานญฺเจว อุปาทานิยญฺจ ธมฺมํ ปฏิจฺจ อุปาทานิโย เจว โน จ อุปาทาโน ธมฺโม อุปฺปชฺชติ เหตุปจฺจยา – อุปาทาเน ปฏิจฺจ สมฺปยุตฺตกา ขนฺธา จิตฺตสมุฏฺฐานญฺจ รูปํฯ (1)

อุปาทานญฺเจว อุปาทานิยญฺจ ธมฺมํ ปฏิจฺจ อุปาทาโน เจว อุปาทานิโย จ อุปาทานิโย เจว โน จ อุปาทาโน จ ธมฺมา อุปฺปชฺชนฺติ เหตุปจฺจยา – ทิฏฺฐุปาทานํ ปฏิจฺจ กามุปาทานํ สมฺปยุตฺตกา จ ขนฺธา จิตฺตสมุฏฺฐานานญฺจ รูปํ (จกฺกํ)ฯ (3)

[96] อุปาทานิยญฺเจว โน จ อุปาทานํ ธมฺมํ ปฏิจฺจ อุปาทานิโย เจว โน จ อุปาทาโน ธมฺโม อุปฺปชฺชติ เหตุปจฺจยา – อุปาทานิยญฺเจว โน จ อุปาทานํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… ปฏิสนฺธิกฺขเณ…เป.… (ยาว อชฺฌตฺติกา มหาภูตา)ฯ (1)

อุปาทานิยญฺเจว โน จ อุปาทานํ ธมฺมํ ปฏิจฺจ อุปาทาโน เจว อุปาทานิโย จ ธมฺโม อุปฺปชฺชติ เหตุปจฺจยา – อุปาทานิเย เจว โน จ อุปาทาเน ขนฺเธ ปฏิจฺจ อุปาทานาฯ (2)

อุปาทานิยญฺเจว โน จ อุปาทานํ ธมฺมํ ปฏิจฺจ อุปาทาโน เจว อุปาทานิโย จ อุปาทานิโย เจว โน จ อุปาทาโน จ ธมฺมา อุปฺปชฺชนฺติ เหตุปจฺจยา – อุปาทานิยญฺเจว โน จ อุปาทานํ เอกํ ขนฺธํ ปฏิจฺจ ตโย ขนฺธา อุปาทานา จ จิตฺตสมุฏฺฐานญฺจ รูปํ…เป.… ทฺเว ขนฺเธ…เป.…ฯ (3)

[97] อุปาทานญฺเจว อุปาทานิยญฺจ อุปาทานิยญฺเจว โน จ อุปาทานญฺจ ธมฺมํ ปฏิจฺจ อุปาทาโน เจว อุปาทานิโย จ ธมฺโม อุปฺปชฺชติ เหตุปจฺจยา – ทิฏฺฐุปาทานญฺจ สมฺปยุตฺตเก จ ขนฺเธ ปฏิจฺจ กามุปาทานํ (จกฺกํ)ฯ (1)

อุปาทานญฺเจว อุปาทานิยญฺจ อุปาทานิยญฺเจว โน จ อุปาทานญฺจ ธมฺมํ ปฏิจฺจ อุปาทานิโย เจว โน จ อุปาทาโน ธมฺโม อุปฺปชฺชติ เหตุปจฺจยา – อุปาทานิยญฺเจว โน จ อุปาทานํ เอกํ ขนฺธญฺจ อุปาทาเน จ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ จ…เป.… อุปาทาเน จ มหาภูเต จ ปฏิจฺจ จิตฺตสมุฏฺฐานํ รูปํฯ (2)

อุปาทานญฺเจว อุปาทานิยญฺจ อุปาทานิยญฺเจว โน จ อุปาทานญฺจ ธมฺมํ ปฏิจฺจ อุปาทาโน เจว อุปาทานิโย จ อุปาทานิโย เจว โน จ อุปาทาโน จ ธมฺมา อุปฺปชฺชนฺติ เหตุปจฺจยา – อุปาทานิยญฺเจว โน จ อุปาทานํ เอกํ ขนฺธญฺจ ทิฏฺฐุปาทานญฺจ ปฏิจฺจ ตโย ขนฺธา กามุปาทานญฺจ จิตฺตสมุฏฺฐานญฺจ รูปํ…เป.… ทฺเว ขนฺเธ จ…เป.… (จกฺกํ)ฯ (3)

2-6. สหชาต-ปจฺจย-นิสฺสย-สํสฏฺฐ-สมฺปยุตฺตวาโร

(ยถา อุปาทานทุกํ เอวํ ปฏิจฺจวาโรปิ สหชาตวาโรปิ ปจฺจยวาโรปิ นิสฺสยวาโรปิ สํสฏฺฐวาโรปิ สมฺปยุตฺตวาโรปิ กาตพฺพา, นินฺนานากรณา, อามสนํ นานากรณํฯ)

7. ปญฺหาวาโร

1. ปจฺจยานุโลมํ

1. วิภงฺควาโร

เหตุปจฺจโย

[98] อุปาทาโน เจว อุปาทานิโย จ ธมฺโม อุปาทานสฺส เจว อุปาทานิยสฺส จ ธมฺมสฺส เหตุปจฺจเยน ปจฺจโย – อุปาทานา เจว อุปาทานิยา จ เหตู สมฺปยุตฺตกานํ อุปาทานานํ เหตุปจฺจเยน ปจฺจโยฯ (1)

อุปาทาโน เจว อุปาทานิโย จ ธมฺโม อุปาทานิยสฺส เจว โน จ อุปาทานสฺส ธมฺมสฺส เหตุปจฺจเยน ปจฺจโย – อุปาทานา เจว อุปาทานิยา จ เหตู สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ เหตุปจฺจเยน ปจฺจโย (อุปาทานทุกสทิสา นินฺนานา, นว ปญฺหา)ฯ