เมนู

เหตุปจฺจโย

[106] สญฺโญชโน เจว สญฺโญชนสมฺปยุตฺโต จ ธมฺโม สญฺโญชนสฺส เจว สญฺโญชนสมฺปยุตฺตสฺส จ ธมฺมสฺส เหตุปจฺจเยน ปจฺจโย – กามราคสญฺโญชโน ทิฏฺฐิสญฺโญชนสฺส อวิชฺชาสญฺโญชนสฺส เหตุปจฺจเยน ปจฺจโย (จกฺกํ)ฯ (1)

สญฺโญชโน เจว สญฺโญชนสมฺปยุตฺโต จ ธมฺโม สญฺโญชนสมฺปยุตฺตสฺส เจว โน จ สญฺโญชนสฺส ธมฺมสฺส เหตุปจฺจเยน ปจฺจโย – สญฺโญชนา เจว สญฺโญชนสมฺปยุตฺตา จ เหตู สมฺปยุตฺตกานํ ขนฺธานํ เหตุปจฺจเยน ปจฺจโยฯ (2)

สญฺโญชโน เจว สญฺโญชนสมฺปยุตฺโต จ ธมฺโม สญฺโญชนสฺส เจว สญฺโญชนสมฺปยุตฺตสฺส จ สญฺโญชนสมฺปยุตฺตสฺส เจว โน จ สญฺโญชนสฺส จ ธมฺมสฺส เหตุปจฺจเยน ปจฺจโย – กามราคสญฺโญชโน ทิฏฺฐิสญฺโญชนสฺส อวิชฺชาสญฺโญชนสฺส สมฺปยุตฺตกานญฺจ ขนฺธานํ เหตุปจฺจเยน ปจฺจโย (จกฺกํ)ฯ (3)

อารมฺมณปจฺจโย

[107] สญฺโญชโน เจว สญฺโญชนสมฺปยุตฺโต จ ธมฺโม สญฺโญชนสฺส เจว สญฺโญชนสมฺปยุตฺตสฺส จ ธมฺมสฺส อารมฺมณปจฺจเยน ปจฺจโย – สญฺโญชเน อารพฺภ สญฺโญชนา อุปฺปชฺชนฺติฯ (มูลํ กาตพฺพํ) สญฺโญชเน อารพฺภ สญฺโญชนสมฺปยุตฺตา เจว โน จ สญฺโญชนา ขนฺธา อุปฺปชฺชนฺติฯ (มูลํ กาตพฺพํ) สญฺโญชเน อารพฺภ สญฺโญชนา จ สญฺโญชนสมฺปยุตฺตกา จ ขนฺธา อุปฺปชฺชนฺติฯ (1)

สญฺโญชนสมฺปยุตฺโต เจว โน จ สญฺโญชโน ธมฺโม สญฺโญชนสมฺปยุตฺตสฺส เจว โน จ สญฺโญชนสฺส ธมฺมสฺส อารมฺมณปจฺจเยน ปจฺจโย – สญฺโญชนสมฺปยุตฺเต เจว โน จ สญฺโญชเน ขนฺเธ อารพฺภ สญฺโญชนสมฺปยุตฺตา เจว โน จ สญฺโญชนา ขนฺธา อุปฺปชฺชนฺติฯ (1)

สญฺโญชนสมฺปยุตฺโต เจว โน จ สญฺโญชโน ธมฺโม สญฺโญชนสฺส เจว สญฺโญชนสมฺปยุตฺตสฺส จ ธมฺมสฺส อารมฺมณปจฺจเยน ปจฺจโย – สญฺโญชนสมฺปยุตฺเต เจว โน จ สญฺโญชเน ขนฺเธ อารพฺภ สญฺโญชนา อุปฺปชฺชนฺติฯ (2)