เมนู

เหตุทุกํ

[129] เหตุปจฺจยา นอารมฺมเณ จตฺตาริ…เป.… นสมนนฺตเร จตฺตาริ, นอุปนิสฺสเย จตฺตาริ…เป.… นมคฺเค จตฺตาริ…เป.… นวิปฺปยุตฺเต จตฺตาริ, โนนตฺถิยา จตฺตาริ, โนวิคเต จตฺตาริฯ

4. ปจฺจยปจฺจนียานุโลมํ

[130] นเหตุปจฺจยา อารมฺมเณ นว, อธิปติยา นว (อนุโลมปทานิ คณิตพฺพานิ)…เป.… อวิคเต นวฯ

อาสวอาสวสมฺปยุตฺตทุกํ นิฏฺฐิตํฯ

19. อาสววิปฺปยุตฺตสาสวทุกํ

1. ปฏิจฺจวาโร

เหตุปจฺจโย

[131] อาสววิปฺปยุตฺตํ สาสวํ ธมฺมํ ปฏิจฺจ อาสววิปฺปยุตฺโต สาสโว ธมฺโม อุปฺปชฺชติ เหตุปจฺจยา – อาสววิปฺปยุตฺตํ สาสวํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… ปฏิสนฺธิกฺขเณ …เป.… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา, เอกํ มหาภูตํ…เป.…ฯ (1)

อาสววิปฺปยุตฺตํ อนาสวํ ธมฺมํ ปฏิจฺจ อาสววิปฺปยุตฺโต อนาสโว ธมฺโม อุปฺปชฺชติ เหตุปจฺจยา… ตีณิฯ

(ยถา จูฬนฺตรทุเก โลกิยทุกํ เอวํ วิตฺถาเรตพฺพํ นินฺนานากรณํ, สํขิตฺตํฯ)

อาสววิปฺปยุตฺตสาสวทุกํ นิฏฺฐิตํฯ

อาสวโคจฺฉกํ นิฏฺฐิตํฯ

4. สญฺโญชนโคจฺฉกํ

20. สญฺโญชนทุกํ

1. ปฏิจฺจวาโร

1. ปจฺจยานุโลมํ

1. วิภงฺควาโร

เหตุปจฺจโย

[1] สญฺโญชนํ ธมฺมํ ปฏิจฺจ สญฺโญชโน ธมฺโม อุปฺปชฺชติ เหตุปจฺจยา – กามราคสญฺโญชนํ ปฏิจฺจ ทิฏฺฐิสญฺโญชนํ อวิชฺชาสญฺโญชนํ, กามราคสญฺโญชนํ ปฏิจฺจ สีลพฺพตปรามาสสญฺโญชนํ อวิชฺชาสญฺโญชนํ, กามราคสญฺโญชนํ ปฏิจฺจ มานสญฺโญชนํ อวิชฺชาสญฺโญชนํ, กามราคสญฺโญชนํ ปฏิจฺจ อวิชฺชาสญฺโญชนํ, ปฏิฆสญฺโญชนํ ปฏิจฺจ อิสฺสาสญฺโญชนํ อวิชฺชาสญฺโญชนํ, ปฏิฆสญฺโญชนํ ปฏิจฺจ มจฺฉริยสญฺโญชนํ อวิชฺชาสญฺโญชนํ, ปฏิฆสญฺโญชนํ ปฏิจฺจ อวิชฺชาสญฺโญชนํ, มานสญฺโญชนํ ปฏิจฺจ ภวราคสญฺโญชนํ อวิชฺชาสญฺโญชนํ, ภวราคสญฺโญชนํ ปฏิจฺจ อวิชฺชาสญฺโญชนํ, วิจิกิจฺฉาสญฺโญชนํ ปฏิจฺจ อวิชฺชาสญฺโญชนํฯ (1)

สญฺโญชนํ ธมฺมํ ปฏิจฺจ โนสญฺโญชโน ธมฺโม อุปฺปชฺชติ เหตุปจฺจยา – สญฺโญชเน ปฏิจฺจ สมฺปยุตฺตกา ขนฺธา จิตฺตสมุฏฺฐานญฺจ รูปํฯ (2)

สญฺโญชนํ ธมฺมํ ปฏิจฺจ สญฺโญชโน จ โนสญฺโญชโน จ ธมฺมา อุปฺปชฺชนฺติ เหตุปจฺจยา – กามราคสญฺโญชนํ ปฏิจฺจ ทิฏฺฐิสญฺโญชนํ อวิชฺชาสญฺโญชนํ สมฺปยุตฺตกา จ ขนฺธา จิตฺตสมุฏฺฐานญฺจ รูปํ (จกฺกํ พนฺธิตพฺพํ)ฯ (3)

[2] โนสญฺโญชนํ ธมฺมํ ปฏิจฺจ โนสญฺโญชโน ธมฺโม อุปฺปชฺชติ เหตุปจฺจยา – โนสญฺโญชนํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… ปฏิสนฺธิกฺขเณ…เป.… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา, เอกํ มหาภูตํ…เป.… มหาภูเต ปฏิจฺจ จิตฺตสมุฏฺฐานํ รูปํ กฏตฺตารูปํ อุปาทารูปํฯ (1)

โนสญฺโญชนํ ธมฺมํ ปฏิจฺจ สญฺโญชโน ธมฺโม อุปฺปชฺชติ เหตุปจฺจยา – โนสญฺโญชเน ขนฺเธ ปฏิจฺจ สญฺโญชนาฯ (2)