อนนฺตรปจฺจโย

[112] อาสโว เจว สาสโว จ ธมฺโม อาสวสฺส เจว สาสวสฺส จ ธมฺมสฺส อนนฺตรปจฺจเยน ปจฺจโย – ปุริมา ปุริมา อาสวา ปจฺฉิมานํ ปจฺฉิมานํ อาสวานํ อนนฺตรปจฺจเยน ปจฺจโยฯ (1)

อาสโว เจว สาสโว จ ธมฺโม สาสวสฺส เจว โน จ อาสวสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา อาสวา ปจฺฉิมานํ ปจฺฉิมานํ สาสวญฺเจว โน จ อาสวานํ ขนฺธานํ อนนฺตรปจฺจเยน ปจฺจโย; อาสวา วุฏฺฐานสฺส อนนฺตรปจฺจเยน ปจฺจโยฯ (2)

อาสโว เจว สาสโว จ ธมฺโม อาสวสฺส เจว สาสวสฺส จ สาสวสฺส เจว โน จ อาสวสฺส จ ธมฺมสฺส อนนฺตรปจฺจเยน ปจฺจโย – ปุริมา ปุริมา อาสวา ปจฺฉิมานํ ปจฺฉิมานํ อาสวานํ สมฺปยุตฺตกานญฺจ ขนฺธานํ อนนฺตรปจฺจเยน ปจฺจโยฯ (3)

[113] สาสโว เจว โน จ อาสโว ธมฺโม สาสวสฺส เจว โน จ อาสวสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา สาสวา เจว โน จ อาสวา ขนฺธา ปจฺฉิมานํ ปจฺฉิมานํ สาสวานญฺเจว โน จ อาสวานํ ขนฺธานํ อนนฺตรปจฺจเยน ปจฺจโย; อนุโลมํ โคตฺรภุสฺส, อนุโลมํ โวทานสฺส, อาวชฺชนา สาสวานญฺเจว โน จ อาสวานํ ขนฺธานํ อนนฺตรปจฺจเยน ปจฺจโยฯ (1)

สาสโว เจว โน จ อาสโว ธมฺโม อาสวสฺส เจว สาสวสฺส จ ธมฺมสฺส อนนฺตรปจฺจเยน ปจฺจโย – ปุริมา ปุริมา สาสวา เจว โน จ อาสวา ขนฺธา ปจฺฉิมานํ ปจฺฉิมานํ อาสวานํ อนนฺตรปจฺจเยน ปจฺจโย; อาวชฺชนา อาสวานํ อนนฺตรปจฺจเยน ปจฺจโยฯ (2)

สาสโว เจว โน จ อาสโว ธมฺโม อาสวสฺส เจว สาสวสฺส จ สาสวสฺส เจว โน จ อาสวสฺส จ ธมฺมสฺส อนนฺตรปจฺจเยน ปจฺจโย – ปุริมา ปุริมา สาสวา เจว โน จ อาสวา ขนฺธา ปจฺฉิมานํ ปจฺฉิมานํ อาสวานํ สมฺปยุตฺตกานญฺจ ขนฺธานํ อนนฺตรปจฺจเยน ปจฺจโย; อาวชฺชนา อาสวานํ สมฺปยุตฺตกานญฺจ ขนฺธานํ อนนฺตรปจฺจเยน ปจฺจโยฯ (3)

[114] อาสโว เจว สาสโว จ สาสโว เจว โน จ อาสโว จ ธมฺมา อาสวสฺส เจว สาสวสฺส จ ธมฺมสฺส อนนฺตรปจฺจเยน ปจฺจโย – ปุริมา ปุริมา อาสวา จ สมฺปยุตฺตกา จ ขนฺธา ปจฺฉิมานํ ปจฺฉิมานํ อาสวานํ อนนฺตรปจฺจเยน ปจฺจโยฯ (1)

อาสโว เจว สาสโว จ สาสโว เจว โน จ อาสโว จ ธมฺมา สาสวสฺส เจว โน จ อาสวสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา อาสวา จ สมฺปยุตฺตกา จ ขนฺธา ปจฺฉิมานํ ปจฺฉิมานํ สาสวานญฺเจว โน จ อาสวานํ ขนฺธานํ อนนฺตรปจฺจเยน ปจฺจโย; อาสวา จ สมฺปยุตฺตกา จ ขนฺธา วุฏฺฐานสฺส อนนฺตรปจฺจเยน ปจฺจโยฯ (2)

อาสโว เจว สาสโว จ สาสโว เจว โน จ อาสโว จ ธมฺมา อาสวสฺส เจว สาสวสฺส จ สาสวสฺส เจว โน จ อาสวสฺส จ ธมฺมสฺส อนนฺตรปจฺจเยน ปจฺจโย – ปุริมา ปุริมา อาสวา จ สมฺปยุตฺตกา จ ขนฺธา ปจฺฉิมานํ ปจฺฉิมานํ อาสวานํ สมฺปยุตฺตกานญฺจ ขนฺธานํ อนนฺตรปจฺจเยน ปจฺจโย (เอวํ สพฺพํ วิตฺถาเรตพฺพํ)ฯ (3)

(อาสวทุเกปิ อนนฺตรํ อิมินา สทิสํ กาตพฺพํฯ อาวชฺชนาปิ วุฏฺฐานมฺปิ เอวํ สมุทฺทิฏฺฐํ สํขิตฺตํฯ สพฺพํ ปริปุณฺณํฯ อาสวทุกสทิสํ กาตพฺพํ, นินฺนานํฯ)

อาสวสาสวทุกํ นิฏฺฐิตํฯ

18. อาสวอาสวสมฺปยุตฺตทุกํ

1. ปฏิจฺจวาโร

1. ปจฺจยานุโลมํ

1. วิภงฺควาโร

เหตุปจฺจโย

[115] อาสวญฺเจว อาสวสมฺปยุตฺตญฺจ ธมฺมํ ปฏิจฺจ อาสโว เจว อาสวสมฺปยุตฺโต จ ธมฺโม อุปฺปชฺชติ เหตุปจฺจยา – กามาสวํ ปฏิจฺจ ทิฏฺฐาสโว อวิชฺชาสโว (จกฺกํ พนฺธิตพฺพํ)ฯ ภวาสวํ ปฏิจฺจ อวิชฺชาสโว (จกฺกํ พนฺธิตพฺพํ)ฯ ทิฏฺฐาสวํ ปฏิจฺจ อวิชฺชาสโวฯ (1)

อาสวญฺเจว อาสวสมฺปยุตฺตญฺจ ธมฺมํ ปฏิจฺจ อาสวสมฺปยุตฺโต เจว โน จ อาสโว ธมฺโม อุปฺปชฺชติ เหตุปจฺจยา – อาสเว ปฏิจฺจ สมฺปยุตฺตกา ขนฺธาฯ (2)