เมนู

อตฺถิปจฺจโย

[46] อชฺฌตฺโต ธมฺโม อชฺฌตฺตสฺส ธมฺมสฺส อตฺถิปจฺจเยน ปจฺจโย – สหชาตํ, ปุเรชาตํ, ปจฺฉาชาตํ, อาหารํ, อินฺทฺริยํฯ สหชาโต – อชฺฌตฺโต เอโก ขนฺโธ ติณฺณนฺนํ ขนฺธานํ จิตฺตสมุฏฺฐานานญฺจ รูปานํ…เป.… ทฺเว ขนฺเธ…เป.… ปฏิสนฺธิกฺขเณ…เป.… ขนฺธา วตฺถุสฺส …เป.… วตฺถุ ขนฺธานํ…เป.… เอกํ มหาภูตํ…เป.… อสญฺญสตฺตานํ เอกํ มหาภูตํ ติณฺณนฺนํ มหาภูตานํ…เป.…ฯ ปุเรชาตํ – จกฺขุํ…เป.… วตฺถุํ (ปุเรชาตสทิสํ), วตฺถุ อชฺฌตฺตานํ ขนฺธานํ อตฺถิปจฺจเยน ปจฺจโยฯ ปจฺฉาชาตา – อชฺฌตฺตา ขนฺธา ปุเรชาตสฺส อิมสฺส กายสฺส อตฺถิปจฺจเยน ปจฺจโยฯ อชฺฌตฺโต กพฬีกาโร อาหาโร อชฺฌตฺตสฺส กายสฺส…เป.… รูปชีวิตินฺทฺริยํ กฏตฺตารูปานํ…เป.…ฯ (1)

อชฺฌตฺโต ธมฺโม พหิทฺธา ธมฺมสฺส อตฺถิปจฺจเยน ปจฺจโย – ปุเรชาตํ, อาหารํฯ ปุเรชาตํ – ปโร อชฺฌตฺตํ จกฺขุํ…เป.… วตฺถุํ อนิจฺจโต…เป.… วิปสฺสติ, ทิพฺเพน จกฺขุนา รูปํ ปสฺสติ, ทิพฺพาย โสตธาตุยา สทฺทํ สุณาติ, อชฺฌตฺตํ รูปายตนํ…เป.… โผฏฺฐพฺพายตนํ พหิทฺธา กายวิญฺญาณสฺส อตฺถิปจฺจเยน ปจฺจโยฯ อชฺฌตฺโต กพฬีกาโร อาหาโร พหิทฺธา กายสฺส อตฺถิปจฺจเยน ปจฺจโยฯ (2)

[47] พหิทฺธา ธมฺโม พหิทฺธา ธมฺมสฺส อตฺถิปจฺจเยน ปจฺจโย – สหชาตํ, ปุเรชาตํ, ปจฺฉาชาตํ, อาหารํ, อินฺทฺริยํ (พหิทฺธา นินฺนานากรณํ, มาติกาปทานิ วิตฺถาเรตพฺพานิ)ฯ (1)

พหิทฺธา ธมฺโม อชฺฌตฺตสฺส ธมฺมสฺส อตฺถิปจฺจเยน ปจฺจโย – ปุเรชาตํ, อาหารํฯ ปุเรชาตํ – พหิทฺธา จกฺขุํ…เป.… วตฺถุํ…เป.… ทิพฺเพน จกฺขุนา รูปํ ปสฺสติ, ทิพฺพาย โสตธาตุยา สทฺทํ สุณาติ, พหิทฺธา รูปายตนํ…เป.… โผฏฺฐพฺพายตนํ อชฺฌตฺตสฺส กายวิญฺญาณสฺส อตฺถิปจฺจเยน ปจฺจโยฯ พหิทฺธา กพฬีกาโร อาหาโร อชฺฌตฺตสฺส กายสฺส อตฺถิปจฺจเยน ปจฺจโยฯ (2)

[48] อชฺฌตฺโต ธมฺโม จ พหิทฺธา ธมฺโม จ อชฺฌตฺตสฺส ธมฺมสฺส อตฺถิปจฺจเยน ปจฺจโย – ปุเรชาตํ, อาหารํฯ ปุเรชาตํ – พหิทฺธา รูปายตนญฺจ อชฺฌตฺตํ จกฺขุ จ อชฺฌตฺตสฺส จกฺขุวิญฺญาณสฺส…เป.… พหิทฺธา โผฏฺฐพฺพายตนญฺจ อชฺฌตฺตํ กายายตนญฺจ อชฺฌตฺตสฺส กายวิญฺญาณสฺส อตฺถิปจฺจเยน ปจฺจโยฯ พหิทฺธา รูปายตนญฺจ อชฺฌตฺตํ วตฺถุ จ…เป.… พหิทฺธา โผฏฺฐพฺพายตนญฺจ อชฺฌตฺตํ วตฺถุ จ อชฺฌตฺตานํ ขนฺธานํ อตฺถิปจฺจเยน ปจฺจโยฯ อาหารํ – อชฺฌตฺโต กพฬีกาโร อาหาโร จ พหิทฺธา กพฬีกาโร อาหาโร จ อชฺฌตฺตสฺส กายสฺส อตฺถิปจฺจเยน ปจฺจโยฯ (1)

อชฺฌตฺโต ธมฺโม จ พหิทฺธา ธมฺโม จ พหิทฺธา ธมฺมสฺส อตฺถิปจฺจเยน ปจฺจโย – ปุเรชาตํ, อาหารํฯ

ปุเรชาตํ – อชฺฌตฺตํ รูปายตนญฺจ พหิทฺธา จกฺขายตนญฺจ พหิทฺธา จกฺขุวิญฺญาณสฺส อตฺถิปจฺจเยน ปจฺจโย…เป.… อชฺฌตฺตํ โผฏฺฐพฺพายตนญฺจ พหิทฺธา กายายตนญฺจ พหิทฺธา กายวิญฺญาณสฺส อตฺถิปจฺจเยน ปจฺจโยฯ อชฺฌตฺตํ รูปายตนญฺจ พหิทฺธา วตฺถุ จ พหิทฺธา ขนฺธานํ อตฺถิปจฺจเยน ปจฺจโย…เป.… อชฺฌตฺตํ โผฏฺฐพฺพายตนญฺจ พหิทฺธา วตฺถุ จ พหิทฺธา ขนฺธานํ อตฺถิปจฺจเยน ปจฺจโยฯ อาหารํ – อชฺฌตฺโต กพฬีกาโร อาหาโร จ พหิทฺธา กพฬีกาโร อาหาโร จ พหิทฺธา กายสฺส อตฺถิปจฺจเยน ปจฺจโยฯ (2)

นตฺถิวิคตาวิคตปจฺจยา

[49] อชฺฌตฺโต ธมฺโม อชฺฌตฺตสฺส ธมฺมสฺส นตฺถิปจฺจเยน ปจฺจโย… วิคตปจฺจเยน ปจฺจโย… อวิคตปจฺจเยน ปจฺจโยฯ

1. ปจฺจยานุโลมํ

2. สงฺขฺยาวาโร

สุทฺธํ

[50] เหตุยา ทฺเว, อารมฺมเณ จตฺตาริ, อธิปติยา จตฺตาริ, อนนฺตเร ทฺเว, สมนนฺตเร ทฺเว, สหชาเต อญฺญมญฺเญ นิสฺสเย ทฺเว, อุปนิสฺสเย จตฺตาริ, ปุเรชาเต ฉ, ปจฺฉาชาเต อาเสวเน กมฺเม วิปาเก ทฺเว, อาหาเร ฉ, อินฺทฺริเย ทฺเว, ฌาเน มคฺเค สมฺปยุตฺเต วิปฺปยุตฺเต ทฺเว, อตฺถิยา ฉ, นตฺถิยา ทฺเว, วิคเต ทฺเว, อวิคเต ฉ (เอวํ คเณตพฺพํ)ฯ

อนุโลมํฯ

ปจฺจนียุทฺธาโร

[51] อชฺฌตฺโต ธมฺโม อชฺฌตฺตสฺส ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโย… ปุเรชาตปจฺจเยน ปจฺจโย… ปจฺฉาชาตปจฺจเยน ปจฺจโย… กมฺมปจฺจเยน ปจฺจโย… อาหารปจฺจเยน ปจฺจโย… อินฺทฺริยปจฺจเยน ปจฺจโยฯ (1)

อชฺฌตฺโต ธมฺโม พหิทฺธา ธมฺมสฺส อารมฺมณปจฺจเยน ปจฺจโย… อุปนิสฺสยปจฺจเยน ปจฺจโย… ปุเรชาตปจฺจเยน ปจฺจโย… อาหารปจฺจเยน ปจฺจโยฯ (2)