เมนู

เหตุทุกํ

[31] เหตุปจฺจยา นอารมฺมเณ ปญฺจ, นอธิปติยา สตฺต, นอนนฺตเร นสมนนฺตเร นอญฺญมญฺเญ นอุปนิสฺสเย ปญฺจ, นปุเรชาเต สตฺต, นปจฺฉาชาเต สตฺตรส, นอาเสวเน สตฺตรส, นกมฺเม จตฺตาริ, นวิปาเก นว, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจ (เอวํ คเณตพฺพํ)ฯ

อนุโลมปจฺจนียํฯ

4. ปจฺจยปจฺจนียานุโลมํ

[32] นเหตุปจฺจยา อารมฺมเณ เอกํ, อนนฺตเร สมนนฺตเร สหชาเต อญฺญมญฺเญ เอกํ…เป.… อวิคเต เอกํ (เอวํ คเณตพฺพํ)ฯ

ปจฺจนียานุโลมํฯ

ปจฺจยวาโรฯ

4. นิสฺสยวาโร

(นิสฺสยวาโร ปจฺจยวารสทิโสฯ)

5. สํสฏฺฐวาโร

1. ปจฺจยานุโลมํ

1. วิภงฺควาโร

เหตุปจฺจโย

[33] เสกฺขํ ธมฺมํ สํสฏฺโฐ เสกฺโข ธมฺโม อุปฺปชฺชติ เหตุปจฺจยา – เสกฺขํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ…เป.…ฯ (1)

อเสกฺขํ ธมฺมํ สํสฏฺโฐ อเสกฺโข ธมฺโม อุปฺปชฺชติ เหตุปจฺจยา – อเสกฺขํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ…เป.…ฯ (1)

เนวเสกฺขนาเสกฺขํ ธมฺมํ สํสฏฺโฐ เนวเสกฺขนาเสกฺโข ธมฺโม อุปฺปชฺชติ เหตุปจฺจยา – เนวเสกฺขนาเสกฺขํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ…เป.… ปฏิสนฺธิกฺขเณ…เป.…ฯ (1)