เมนู

สุทฺธํ

[24] เหตุยา สตฺตรส, อารมฺมเณ สตฺต, อธิปติยา สตฺตรส, อนนฺตเร สตฺต, สมนนฺตเร สตฺต, สหชาเต สตฺตรส, อญฺญมญฺเญ สตฺต, นิสฺสเย สตฺตรส, อุปนิสฺสเย สตฺต, ปุเรชาเต สตฺต, อาเสวเน จตฺตาริ, กมฺเม สตฺตรส, วิปาเก สตฺตรส, อาหาเร สตฺตรส, อินฺทฺริเย ฌาเน มคฺเค สตฺตรส, สมฺปยุตฺเต สตฺต, วิปฺปยุตฺเต สตฺตรส, อตฺถิยา สตฺตรส, นตฺถิยา สตฺต, วิคเต สตฺต, อวิคเต สตฺตรส (เอวํ คเณตพฺพํ)ฯ

อนุโลมํฯ

2. ปจฺจยปจฺจนียํ

1. วิภงฺควาโร

นเหตุปจฺจโย

[25] เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นเหตุปจฺจยา – อเหตุกํ เนวเสกฺขนาเสกฺขํ เอกํ ขนฺธํ ปจฺจยา ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺธาฯ อเหตุกปฏิสนฺธิกฺขเณ…เป.… ขนฺเธ ปจฺจยา วตฺถุ, วตฺถุํ ปจฺจยา ขนฺธา, เอกํ มหาภูตํ ปจฺจยา…เป.… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป.… จกฺขายตนํ ปจฺจยา จกฺขุวิญฺญาณํ…เป.… กายายตนํ ปจฺจยา กายวิญฺญาณํ, วตฺถุํ ปจฺจยา อเหตุกา เนวเสกฺขนาเสกฺขา ขนฺธา, วิจิกิจฺฉาสหคเต อุทฺธจฺจสหคเต ขนฺเธ จ วตฺถุญฺจ ปจฺจยา วิจิกิจฺฉาสหคโต อุทฺธจฺจสหคโต โมโหฯ (1)

นอารมฺมณปจฺจยาทิ

[26] เสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นอารมฺมณปจฺจยา…เป.…ฯ (1)

เสกฺขํ ธมฺมํ ปจฺจยา เสกฺโข ธมฺโม อุปฺปชฺชติ นอธิปติปจฺจยา – เสกฺเข ขนฺเธ ปจฺจยา เสกฺโข อธิปติฯ (1)

อเสกฺขํ ธมฺมํ ปจฺจยา อเสกฺโข ธมฺโม อุปฺปชฺชติ นอธิปติปจฺจยา – อเสกฺเข ขนฺเธ ปจฺจยา อเสกฺโข อธิปติฯ (1)

เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นอธิปติปจฺจยา (ปริปุณฺณํ) อสญฺญสตฺตานํ…เป.… จกฺขายตนํ…เป.… วตฺถุํ ปจฺจยา เนวเสกฺขนาเสกฺขา ขนฺธาฯ (1)

เนวเสกฺขนาเสกฺขํ ธมฺมํ ปจฺจยา เสกฺโข ธมฺโม อุปฺปชฺชติ นอธิปติปจฺจยา – วตฺถุํ ปจฺจยา เสกฺโข อธิปติฯ (2)

เนวเสกฺขนาเสกฺขํ ธมฺมํ ปจฺจยา อเสกฺโข ธมฺโม อุปฺปชฺชติ นอธิปติปจฺจยา – วตฺถุํ ปจฺจยา อเสกฺโข อธิปติฯ (3)

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข ธมฺโม อุปฺปชฺชติ นอธิปติปจฺจยา – เสกฺเข ขนฺเธ จ วตฺถุญฺจ ปจฺจยา เสกฺโข อธิปติฯ (1)

อเสกฺขญฺจ เนวเสกฺขนาเสกฺขญฺจ ธมฺมํ ปจฺจยา อเสกฺโข ธมฺโม อุปฺปชฺชติ นอธิปติปจฺจยา – อเสกฺเข ขนฺเธ จ วตฺถุญฺจ ปจฺจยา อเสกฺโข อธิปติฯ (1)

นอนนฺตรปจฺจยาทิ

[27] เสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นอนนฺตรปจฺจยา… นสมนนฺตรปจฺจยา… นอญฺญมญฺญปจฺจยา… นอุปนิสฺสยปจฺจยา… นปุเรชาตปจฺจยา… นปจฺฉาชาตปจฺจยา (สตฺต)… นอาเสวนปจฺจยา… นกมฺมปจฺจยา – เสกฺเข ขนฺเธ ปจฺจยา เสกฺขา เจตนาฯ

เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นกมฺมปจฺจยา – เนวเสกฺขนาเสกฺเข ขนฺเธ ปจฺจยา เนวเสกฺขนาเสกฺขา เจตนาฯ พาหิรํ… อาหารสมุฏฺฐานํ… อุตุสมุฏฺฐานํ…เป.… วตฺถุํ ปจฺจยา เนวเสกฺขนาเสกฺขา เจตนาฯ (1)

เนวเสกฺขนาเสกฺขํ ธมฺมํ ปจฺจยา เสกฺโข ธมฺโม อุปฺปชฺชติ นกมฺมปจฺจยา – วตฺถุํ ปจฺจยา เสกฺขา เจตนาฯ (2)

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข ธมฺโม อุปฺปชฺชติ นกมฺมปจฺจยา – เสกฺเข ขนฺเธ จ วตฺถุญฺจ ปจฺจยา เสกฺขา เจตนาฯ (1)