เนวาจยคามินาปจยคามิํ ธมฺมํ ปฏิจฺจ เนวาจยคามินาปจยคามี ธมฺโม อุปฺปชฺชติ นอธิปติปจฺจยา – เนวาจยคามินาปจยคามิํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… ปฏิสนฺธิกฺขเณ…เป.… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา; เอกํ มหาภูตํ…เป.… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ เอกํ มหาภูตํ…เป.…ฯ (1)

อาจยคามิญฺจ เนวาจยคามินาปจยคามิญฺจ ธมฺมํ ปฏิจฺจ เนวาจยคามินาปจยคามี ธมฺโม อุปฺปชฺชติ นอธิปติปจฺจยา – อาจยคามี ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํฯ (1)

นอนนฺตรปจฺจยาทิ

[11] อาจยคามิํ ธมฺมํ ปฏิจฺจ เนวาจยคามินาปจยคามี ธมฺโม อุปฺปชฺชติ นอนนฺตรปจฺจยา… นสมนนฺตรปจฺจยา… นอญฺญมญฺญปจฺจยา… นอุปนิสฺสยปจฺจยา… นปุเรชาตปจฺจยา (กุสลตฺติกสทิสา สตฺต ปญฺหา)… นปจฺฉาชาตปจฺจยาฯ

นอาเสวนปจฺจโย

[12] อาจยคามิํ ธมฺมํ ปฏิจฺจ อาจยคามี ธมฺโม อุปฺปชฺชติ นอาเสวนปจฺจยา… ตีณิฯ

อปจยคามิํ ธมฺมํ ปฏิจฺจ เนวาจยคามินาปจยคามี ธมฺโม อุปฺปชฺชติ นอาเสวนปจฺจยา – อปจยคามี ขนฺเธ ปฏิจฺจ จิตฺตสมุฏฺฐานํ รูปํฯ (1)

เนวาจยคามินาปจยคามิํ ธมฺมํ ปฏิจฺจ เนวาจยคามินาปจยคามี ธมฺโม อุปฺปชฺชติ นอาเสวนปจฺจยา (เอกา ปญฺหา สพฺเพ มหาภูตา กาตพฺพา)ฯ

อาจยคามิญฺจ เนวาจยคามินาปจยคามิญฺจ ธมฺมํ ปฏิจฺจ เนวาจยคามินาปจยคามี ธมฺโม อุปฺปชฺชติ นอาเสวนปจฺจยา – อาจยคามี ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํฯ (1)

อปจยคามิญฺจ เนวาจยคามินาปจยคามิญฺจ ธมฺมํ ปฏิจฺจ เนวาจยคามินาปจยคามี ธมฺโม อุปฺปชฺชติ นอาเสวนปจฺจยา – อปจยคามี ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํฯ (1)

นกมฺมปจฺจโย

[13] อาจยคามิํ ธมฺมํ ปฏิจฺจ อาจยคามี ธมฺโม อุปฺปชฺชติ นกมฺมปจฺจยา – อาจยคามี ขนฺเธ ปฏิจฺจ อาจยคามี เจตนาฯ (1)

อปจยคามิํ ธมฺมํ ปฏิจฺจ อปจยคามี ธมฺโม อุปฺปชฺชติ นกมฺมปจฺจยา – อปจยคามี ขนฺเธ ปฏิจฺจ อปจยคามี เจตนาฯ (1)

เนวาจยคามินาปจยคามิํ ธมฺมํ ปฏิจฺจ เนวาจยคามินาปจยคามี ธมฺโม อุปฺปชฺชติ นกมฺมปจฺจยา – เนวาจยคามินาปจยคามี ขนฺเธ ปฏิจฺจ เนวาจยคามินาปจยคามี เจตนา; พาหิรํ… อาหารสมุฏฺฐานํ… อุตุสมุฏฺฐานํ… เอกํ มหาภูตํ…เป.…ฯ (1)

นวิปากปจฺจยาทิ

[14] อาจยคามิํ ธมฺมํ ปฏิจฺจ อาจยคามี ธมฺโม อุปฺปชฺชติ นวิปากปจฺจยา (ปริปุณฺณํ , ปฏิสนฺธิ นตฺถิ)… นอาหารปจฺจยา… นอินฺทฺริยปจฺจยา… นฌานปจฺจยา… นมคฺคปจฺจยา… นสมฺปยุตฺตปจฺจยา… นวิปฺปยุตฺตปจฺจยา (ตีณิ)… โนนตฺถิปจฺจยา… โนวิคตปจฺจยาฯ

2. ปจฺจยปจฺจนียํ

2. สงฺขฺยาวาโร

สุทฺธํ

[15] นเหตุยา ทฺเว, นอารมฺมเณ ปญฺจ, นอธิปติยา ฉ, นอนนฺตเร ปญฺจ, นสมนนฺตเร ปญฺจ, นอญฺญมญฺเญ ปญฺจ, นอุปนิสฺสเย ปญฺจ, นปุเรชาเต สตฺต, นปจฺฉาชาเต นว, นอาเสวเน สตฺต, นกมฺเม ตีณิ, นวิปาเก นว, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค เอกํ, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจ (เอวํ คเณตพฺพํ) ฯ

ปจฺจนียํฯ

3. ปจฺจยานุโลมปจฺจนียํ