เมนู

นอธิปติปจฺจยาทิ

[50] ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ นอธิปติปจฺจยา (สหชาตสทิสํ)… นอนนฺตรปจฺจยา… นสมนนฺตรปจฺจยา… นอญฺญมญฺญปจฺจยา… นอุปนิสฺสยปจฺจยาฯ

นปุเรชาตปจฺจโย

[51] ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ นปุเรชาตปจฺจยา – อรูเป ทสฺสเนน ปหาตพฺพํ เอกํ ขนฺธํ ปจฺจยา…เป.…ฯ (1)

ทสฺสเนน ปหาตพฺพํ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ นปุเรชาตปจฺจยา – ทสฺสเนน ปหาตพฺเพ ขนฺเธ ปจฺจยา จิตฺตสมุฏฺฐานํ รูปํฯ (2)

ภาวนาย ปหาตพฺพํ ธมฺมํ ปจฺจยา ภาวนาย ปหาตพฺโพ ธมฺโม อุปฺปชฺชติ นปุเรชาตปจฺจยา – อรูเป ภาวนาย ปหาตพฺพํ เอกํ ขนฺธํ ปจฺจยา…เป.…ฯ (1)

ภาวนาย ปหาตพฺพํ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ นปุเรชาตปจฺจยา – ภาวนาย ปหาตพฺเพ ขนฺเธ ปจฺจยา จิตฺตสมุฏฺฐานํ รูปํฯ (2)

[52] เนวทสฺสเนน นภาวนาย ปหาตพฺพํ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ นปุเรชาตปจฺจยา – อรูเป เนวทสฺสเนน นภาวนาย ปหาตพฺพํ เอกํ ขนฺธํ ปจฺจยา ตโย ขนฺธา…เป.… เนวทสฺสเนน นภาวนาย ปหาตพฺเพ ขนฺเธ ปจฺจยา จิตฺตสมุฏฺฐานํ รูปํฯ ปฏิสนฺธิกฺขเณ…เป.… ขนฺเธ ปจฺจยา กฏตฺตารูปํ, ขนฺเธ ปจฺจยา วตฺถุ, วตฺถุํ ปจฺจยา ขนฺธา; เอกํ มหาภูตํ…เป.… พาหิรํ… อาหารสมุฏฺฐานํ… อุตุสมุฏฺฐานํ, อสญฺญสตฺตานํ…เป.…ฯ (1)

ทสฺสเนน ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ นปุเรชาตปจฺจยา – ทสฺสเนน ปหาตพฺเพ ขนฺเธ จ มหาภูเต จ ปจฺจยา จิตฺตสมุฏฺฐานํ รูปํฯ (1)

ภาวนาย ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ นปุเรชาตปจฺจยา – ภาวนาย ปหาตพฺเพ ขนฺเธ จ มหาภูเต จ ปจฺจยา จิตฺตสมุฏฺฐานํ รูปํฯ (1)

นปจฺฉาชาตปจฺจยาทิ

[53] ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ นปจฺฉาชาตปจฺจยา… นอาเสวนปจฺจยาฯ

นกมฺมปจฺจโย

[54] ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ นกมฺมปจฺจยา – ทสฺสเนน ปหาตพฺเพ ขนฺเธ ปจฺจยา ทสฺสเนน ปหาตพฺพา เจตนาฯ (1)

ภาวนาย ปหาตพฺพํ ธมฺมํ…เป.… นกมฺมปจฺจยา – ภาวนาย ปหาตพฺเพ ขนฺเธ ปจฺจยา ภาวนาย ปหาตพฺพา เจตนาฯ (1)

เนวทสฺสเนน นภาวนาย ปหาตพฺพํ ธมฺมํ…เป.… นกมฺมปจฺจยา – เนวทสฺสเนน นภาวนาย ปหาตพฺเพ ขนฺเธ ปจฺจยา เนวทสฺสเนน นภาวนาย ปหาตพฺพา เจตนา; พาหิรํ… อาหารสมุฏฺฐานํ… อุตุสมุฏฺฐานํ…เป.…ฯ (1)

เนวทสฺสเนน นภาวนาย ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ นกมฺมปจฺจยา – วตฺถุํ ปจฺจยา ทสฺสเนน ปหาตพฺพา เจตนาฯ (2)

เนวทสฺสเนน นภาวนาย ปหาตพฺพํ ธมฺมํ ปจฺจยา ภาวนาย ปหาตพฺโพ ธมฺโม อุปฺปชฺชติ นกมฺมปจฺจยา – วตฺถุํ ปจฺจยา ภาวนาย ปหาตพฺพา เจตนาฯ (3)

[55] ทสฺสเนน ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ นกมฺมปจฺจยา – ทสฺสเนน ปหาตพฺเพ ขนฺเธ จ วตฺถุญฺจ ปจฺจยา ทสฺสเนน ปหาตพฺพา เจตนาฯ (1)