กมฺมปจฺจโย
[40] ปีติสหคโต ธมฺโม ปีติสหคตสฺส ธมฺมสฺส กมฺมปจฺจเยน ปจฺจโย – สหชาตา, นานากฺขณิกา [นานาขณิกา (สฺยา. ก.)]ฯ สหชาตา – ปีติสหคตา เจตนา สมฺปยุตฺตกานํ ขนฺธานํ กมฺมปจฺจเยน ปจฺจโยฯ ปฏิสนฺธิกฺขเณ ปีติสหคตา เจตนา สมฺปยุตฺตกานํ ขนฺธานํ กมฺมปจฺจเยน ปจฺจโยฯ นานากฺขณิกา – ปีติสหคตา เจตนา วิปากานํ ปีติสหคตานํ ขนฺธานํ กมฺมปจฺจเยน ปจฺจโยฯ (1)
ปีติสหคโต ธมฺโม สุขสหคตสฺส ธมฺมสฺส กมฺมปจฺจเยน ปจฺจโย – สหชาตา, นานากฺขณิกาฯ สหชาตา – ปีติสหคตา เจตนา สมฺปยุตฺตกานํ สุขสหคตานํ ขนฺธานํ กมฺมปจฺจเยน ปจฺจโยฯ ปฏิสนฺธิกฺขเณ ปีติสหคตา เจตนา สมฺปยุตฺตกานํ สุขสหคตานํ ขนฺธานํ กมฺมปจฺจเยน ปจฺจโยฯ นานากฺขณิกา – ปีติสหคตา เจตนา วิปากานํ สุขสหคตานํ ขนฺธานํ กมฺมปจฺจเยน ปจฺจโยฯ (2)
ปีติสหคโต ธมฺโม อุเปกฺขาสหคตสฺส ธมฺมสฺส กมฺมปจฺจเยน ปจฺจโยฯ นานากฺขณิกา – ปีติสหคตา เจตนา วิปากานํ อุเปกฺขาสหคตานํ ขนฺธานํ กมฺมปจฺจเยน ปจฺจโยฯ (3)
ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส กมฺมปจฺจเยน ปจฺจโย – สหชาตา, นานากฺขณิกาฯ สหชาตา – ปีติสหคตา เจตนา สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ กมฺมปจฺจเยน ปจฺจโยฯ ปฏิสนฺธิกฺขเณ …เป.…ฯ นานากฺขณิกา – ปีติสหคตา เจตนา วิปากานํ ปีติสหคตานญฺจ สุขสหคตานญฺจ ขนฺธานํ กมฺมปจฺจเยน ปจฺจโยฯ (4)
[41] สุขสหคโต ธมฺโม สุขสหคตสฺส ธมฺมสฺส (จตฺตาริปิ คณนานิ ปสฺสิตฺวา กาตพฺพานิ)ฯ
[42] อุเปกฺขาสหคโต ธมฺโม อุเปกฺขาสหคตสฺส ธมฺมสฺส กมฺมปจฺจเยน ปจฺจโย – สหชาตา, นานากฺขณิกา…เป.…ฯ
อุเปกฺขาสหคโต ธมฺโม ปีติสหคตสฺส ธมฺมสฺส กมฺมปจฺจเยน ปจฺจโยฯ นานากฺขณิกา – อุเปกฺขาสหคตา เจตนา…เป.…ฯ
อุเปกฺขาสหคโต ธมฺโม สุขสหคตสฺส ธมฺมสฺส กมฺมปจฺจเยน ปจฺจโยฯ นานากฺขณิกา – อุเปกฺขาสหคตา เจตนา…เป.…ฯ