ปีติสหคโต จ สุขสหคโต จ ธมฺมา ปีติสหคตสฺส จ สุขสหคตสฺส จ ธมฺมสฺส อนนฺตรปจฺจเยน ปจฺจโย – ปุริมา ปุริมา ปีติสหคตา จ สุขสหคตา จ ขนฺธา ปจฺฉิมานํ ปจฺฉิมานํ ปีติสหคตานญฺจ สุขสหคตานญฺจ ขนฺธานํ…เป.… ปีติสหคตญฺจ สุขสหคตญฺจ อนุโลมํ ปีติสหคตาย จ สุขสหคตาย จ ผลสมาปตฺติยา อนนฺตรปจฺจเยน ปจฺจโยฯ (4)
สมนนฺตรปจฺจโย
[30] ปีติสหคโต ธมฺโม ปีติสหคตสฺส ธมฺมสฺส สมนนฺตรปจฺจเยน ปจฺจโย (อนนฺตรปจฺจยสทิสํ)ฯ
สหชาตปจฺจโย
[31] ปีติสหคโต ธมฺโม ปีติสหคตสฺส ธมฺมสฺส สหชาตปจฺจเยน ปจฺจโย – ปีติสหคโต เอโก ขนฺโธ ติณฺณนฺนํ ขนฺธานํ สหชาตปจฺจเยน ปจฺจโย…เป.… ทฺเว ขนฺธา ทฺวินฺนํ ขนฺธานํ สหชาตปจฺจเยน ปจฺจโย…เป.… (ปฏิจฺจสทิสํ สหชาเต ทส ปญฺหา)ฯ
อญฺญมญฺญ-นิสฺสยปจฺจยา
[32] ปีติสหคโต ธมฺโม ปีติสหคตสฺส ธมฺมสฺส อญฺญมญฺญปจฺจเยน ปจฺจโย… นิสฺสยปจฺจเยน ปจฺจโย (ทส ปญฺหา กาตพฺพา)ฯ