เมนู

ปีติสหคโต ธมฺโม สุขสหคตสฺส ธมฺมสฺส เหตุปจฺจเยน ปจฺจโย – ปีติสหคตา เหตู สมฺปยุตฺตกานํ สุขสหคตานํ ขนฺธานํ เหตุปจฺจเยน ปจฺจโยฯ ปฏิสนฺธิกฺขเณ…เป.…ฯ (2)

ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส เหตุปจฺจเยน ปจฺจโย – ปีติสหคตา เหตู สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ เหตุปจฺจเยน ปจฺจโยฯ ปฏิสนฺธิกฺขเณ…เป.…ฯ (3)

[18] สุขสหคโต ธมฺโม สุขสหคตสฺส ธมฺมสฺส…เป.… ปีติสหคตสฺส ธมฺมสฺส…เป.… ปีติสหคตสฺส จ สุขสหคตสฺส จ ธมฺมสฺส…เป.… (สุขมูเล ตีณิ)ฯ

อุเปกฺขาสหคโต ธมฺโม อุเปกฺขาสหคตสฺส ธมฺมสฺส เหตุปจฺจเยน ปจฺจโย – อุเปกฺขาสหคตา เหตู สมฺปยุตฺตกานํ ขนฺธานํ เหตุปจฺจเยน ปจฺจโยฯ ปฏิสนฺธิกฺขเณ…เป.…ฯ (1)

ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส…เป.… สุขสหคตสฺส ธมฺมสฺส…เป.… ปีติสหคตสฺส จ สุขสหคตสฺส จ ธมฺมสฺส เหตุปจฺจเยน ปจฺจโย – ปีติสหคตา จ สุขสหคตา จ เหตู สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ เหตุปจฺจเยน ปจฺจโยฯ ปฏิสนฺธิกฺขเณ…เป.…ฯ (2)

อารมฺมณปจฺจโย

[19] ปีติสหคโต ธมฺโม ปีติสหคตสฺส ธมฺมสฺส อารมฺมณปจฺจเยน ปจฺจโย – ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ ปีติสหคเตน จิตฺเตน ปจฺจเวกฺขติ, ปีติสหคตา ฌานา วุฏฺฐหิตฺวา, มคฺคา วุฏฺฐหิตฺวา, ผลา วุฏฺฐหิตฺวา ตํ ปีติสหคเตน จิตฺเตน ปจฺจเวกฺขติฯ อริยา ปีติสหคเตน จิตฺเตน ปีติสหคเต ปหีเน กิเลเส ปจฺจเวกฺขนฺติ, วิกฺขมฺภิเต กิเลเส ปจฺจเวกฺขนฺติ, ปุพฺเพ สมุทาจิณฺเณ กิเลเส ชานนฺติฯ ปีติสหคเต ขนฺเธ ปีติสหคเตน จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ; ตํ อารพฺภ ปีติสหคโต ราโค อุปฺปชฺชติ, ทิฏฺฐิ อุปฺปชฺชติฯ ปีติสหคเต ขนฺเธ อารพฺภ ปีติสหคตา ขนฺธา อุปฺปชฺชนฺติฯ (1)

ปีติสหคโต ธมฺโม สุขสหคตสฺส ธมฺมสฺส อารมฺมณปจฺจเยน ปจฺจโย – ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ สุขสหคเตน จิตฺเตน ปจฺจเวกฺขติ, ปีติสหคตา ฌานา วุฏฺฐหิตฺวา, มคฺคา วุฏฺฐหิตฺวา, ผลา วุฏฺฐหิตฺวา ตํ สุขสหคเตน จิตฺเตน ปจฺจเวกฺขติฯ อริยา สุขสหคเตน จิตฺเตน ปีติสหคเต ปหีเน กิเลเส ปจฺจเวกฺขนฺติ, วิกฺขมฺภิเต กิเลเส ปจฺจเวกฺขนฺติ, ปุพฺเพ สมุทาจิณฺเณ กิเลเส ชานนฺติฯ ปีติสหคเต ขนฺเธ สุขสหคเตน จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ; ตํ อารพฺภ สุขสหคโต ราโค อุปฺปชฺชติ, ทิฏฺฐิ อุปฺปชฺชติฯ ปีติสหคเต ขนฺเธ อารพฺภ สุขสหคตา ขนฺธา อุปฺปชฺชนฺติฯ (2)

ปีติสหคโต ธมฺโม อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย – ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ อุเปกฺขาสหคเตน จิตฺเตน ปจฺจเวกฺขติ, ปีติสหคตา ฌานา วุฏฺฐหิตฺวา, มคฺคา วุฏฺฐหิตฺวา, ผลา วุฏฺฐหิตฺวา ตํ อุเปกฺขาสหคเตน จิตฺเตน ปจฺจเวกฺขติฯ อริยา อุเปกฺขาสหคเตน จิตฺเตน ปีติสหคเต ปหีเน กิเลเส ปจฺจเวกฺขนฺติ, วิกฺขมฺภิเต กิเลเส ปจฺจเวกฺขนฺติ, ปุพฺเพ สมุทาจิณฺเณ กิเลเส ชานนฺติฯ ปีติสหคเต ขนฺเธ อุเปกฺขาสหคเตน จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ; ตํ อารพฺภ อุเปกฺขาสหคโต ราโค อุปฺปชฺชติ, ทิฏฺฐิ อุปฺปชฺชติ, วิจิกิจฺฉา อุปฺปชฺชติ, อุทฺธจฺจํ อุปฺปชฺชติฯ เจโตปริยญาเณน ปีติสหคตจิตฺตสมงฺคิสฺส จิตฺตํ ชานนฺติ, ปีติสหคตา ขนฺธา เจโตปริยญาณสฺส, ปุพฺเพนิวาสานุสฺสติญาณสฺส, ยถากมฺมูปคญาณสฺส, อนาคตํสญาณสฺส, อาวชฺชนาย อารมฺมณปจฺจเยน ปจฺจโยฯ ปีติสหคเต ขนฺเธ อารพฺภ อุเปกฺขาสหคตา ขนฺธา อุปฺปชฺชนฺติฯ (3)

ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย – ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ ปีติสหคเตน จ สุขสหคเตน จ จิตฺเตน ปจฺจเวกฺขติ, ปีติสหคตา ฌานา วุฏฺฐหิตฺวา, มคฺคา วุฏฺฐหิตฺวา, ผลา วุฏฺฐหิตฺวา ตํ ปีติสหคเตน จ สุขสหคเตน จ จิตฺเตน ปจฺจเวกฺขติฯ

อริยา ปีติสหคเตน จ สุขสหคเตน จ จิตฺเตน ปีติสหคเต ปหีเน กิเลเส ปจฺจเวกฺขนฺติ, วิกฺขมฺภิเต กิเลเส ปจฺจเวกฺขนฺติ , ปุพฺเพ สมุทาจิณฺเณ กิเลเส ชานนฺติฯ ปีติสหคเต ขนฺเธ ปีติสหคเตน จ สุขสหคเตน จ จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ; ตํ อารพฺภ ปีติสหคโต จ สุขสหคโต จ ราโค อุปฺปชฺชติ, ทิฏฺฐิ อุปฺปชฺชติฯ ปีติสหคเต ขนฺเธ อารพฺภ ปีติสหคตา จ สุขสหคตา จ ขนฺธา อุปฺปชฺชนฺติฯ (4)

[20] สุขสหคโต ธมฺโม สุขสหคตสฺส ธมฺมสฺส อารมฺมณปจฺจเยน ปจฺจโย… สุขสหคโต ธมฺโม ปีติสหคตสฺส ธมฺมสฺส…เป.… อุเปกฺขาสหคตสฺส ธมฺมสฺส…เป.… ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย – สุขสหคเต ขนฺเธ อารพฺภ ปีติสหคตา จ สุขสหคตา จ ขนฺธา อุปฺปชฺชนฺติฯ (4)

อุเปกฺขาสหคโต ธมฺโม อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย – อุเปกฺขาสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ อุเปกฺขาสหคเตน จิตฺเตน ปจฺจเวกฺขติ, อุเปกฺขาสหคตา ฌานา วุฏฺฐหิตฺวา, มคฺคา วุฏฺฐหิตฺวา, ผลา วุฏฺฐหิตฺวา ตํ อุเปกฺขาสหคเตน จิตฺเตน ปจฺจเวกฺขติฯ อริยา อุเปกฺขาสหคเตน จิตฺเตน อุเปกฺขาสหคเต ปหีเน กิเลเส ปจฺจเวกฺขนฺติ, วิกฺขมฺภิเต กิเลเส ปจฺจเวกฺขนฺติ, ปุพฺเพ สมุทาจิณฺเณ กิเลเส ชานนฺติฯ อุเปกฺขาสหคเต ขนฺเธ อุเปกฺขาสหคเตน จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ; ตํ อารพฺภ อุเปกฺขาสหคโต ราโค อุปฺปชฺชติ, ทิฏฺฐิ อุปฺปชฺชติ, วิจิกิจฺฉา อุปฺปชฺชติ, อุทฺธจฺจํ อุปฺปชฺชติฯ เจโตปริยญาเณน อุเปกฺขาสหคตจิตฺตสมงฺคิสฺส จิตฺตํ ชานาติฯ อากาสานญฺจายตนํ วิญฺญาณญฺจายตนสฺส อารมฺมณปจฺจเยน ปจฺจโย…เป.… อากิญฺจญฺญายตนํ เนวสญฺญานาสญฺญายตนสฺส อารมฺมณปจฺจเยน ปจฺจโยฯ อุเปกฺขาสหคตา ขนฺธา อิทฺธิวิธญาณสฺส, เจโตปริยญาณสฺส, ปุพฺเพนิวาสานุสฺสติญาณสฺส, ยถากมฺมูปคญาณสฺส, อนาคตํสญาณสฺส อาวชฺชนาย อารมฺมณปจฺจเยน ปจฺจโยฯ อุเปกฺขาสหคเต ขนฺเธ อารพฺภ อุเปกฺขาสหคตา ขนฺธา อุปฺปชฺชนฺติฯ (1)

อุเปกฺขาสหคโต ธมฺโม ปีติสหคตสฺส ธมฺมสฺส…เป.… สุขสหคตสฺส ธมฺมสฺส…เป.… ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย – อุเปกฺขาสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ ปีติสหคเตน จ สุขสหคเตน จ จิตฺเตน ปจฺจเวกฺขติ, อุเปกฺขาสหคตา ฌานา วุฏฺฐหิตฺวา, มคฺคา วุฏฺฐหิตฺวา ผลา วุฏฺฐหิตฺวา, ตํ ปีติสหคเตน จ สุขสหคเตน จ จิตฺเตน ปจฺจเวกฺขติฯ อริยา ปีติสหคเตน จ สุขสหคเตน จ จิตฺเตน อุเปกฺขาสหคเต ปหีเน กิเลเส ปจฺจเวกฺขนฺติ, วิกฺขมฺภิเต กิเลเส ปจฺจเวกฺขนฺติ, ปุพฺเพ สมุทาจิณฺเณ กิเลเส ชานนฺติฯ อุเปกฺขาสหคเต ขนฺเธ ปีติสหคเตน จ สุขสหคเตน จ จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ; ตํ อารพฺภ ปีติสหคโต จ สุขสหคโต จ ราโค อุปฺปชฺชติ, ทิฏฺฐิ อุปฺปชฺชติฯ อุเปกฺขาสหคเต ขนฺเธ อารพฺภ ปีติสหคตา จ สุขสหคตา จ ขนฺธา อุปฺปชฺชนฺติฯ (3)

[21] ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส…เป.… สุขสหคตสฺส ธมฺมสฺส…เป.… อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย – ปีติสหคเตน จ สุขสหคเตน จ จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา…เป.… ปีติสหคเต จ สุขสหคเต จ ขนฺเธ อุเปกฺขาสหคเตน จิตฺเตน อนิจฺจโต ทุกฺขโต อนตฺตโต วิปสฺสติ อสฺสาเทติ อภินนฺทติ; ตํ อารพฺภ อุเปกฺขาสหคโต ราโค อุปฺปชฺชติ, ทิฏฺฐิ อุปฺปชฺชติ, วิจิกิจฺฉา อุปฺปชฺชติ, อุทฺธจฺจํ อุปฺปชฺชติฯ เจโตปริยญาเณน ปีติสหคตสุขสหคตจิตฺตสมงฺคิสฺส จิตฺตํ ชานาติฯ ปีติสหคตา จ สุขสหคตา จ ขนฺธา เจโตปริยญาณสฺส, ปุพฺเพนิวาสานุสฺสติญาณสฺส, ยถากมฺมูปคญาณสฺส, อนาคตํสญาณสฺส, อาวชฺชนาย อารมฺมณปจฺจเยน ปจฺจโยฯ ปีติสหคเต จ สุขสหคเต จ ขนฺเธ อารพฺภ อุเปกฺขาสหคตา ขนฺธา อุปฺปชฺชนฺติฯ (3)

ปีติสหคโต จ สุขสหคโต จ ธมฺมา ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย (สํขิตฺตํ)ฯ (4)

อธิปติปจฺจโย

[22] ปีติสหคโต ธมฺโม ปีติสหคตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติฯ อารมฺมณาธิปติ – ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ปีติสหคเตน จิตฺเตน ตํ ครุํ กตฺวา ปจฺจเวกฺขติ, ปีติสหคตา ฌานา วุฏฺฐหิตฺวา, มคฺคา วุฏฺฐหิตฺวา, ผลา วุฏฺฐหิตฺวา ปีติสหคเตน จิตฺเตน ตํ ครุํ กตฺวา ปจฺจเวกฺขติฯ ปีติสหคเต ขนฺเธ ปีติสหคเตน จิตฺเตน ครุํ กตฺวา อสฺสาเทติ อภินนฺทติ; ตํ ครุํ กตฺวา ปีติสหคโต ราโค อุปฺปชฺชติ, ทิฏฺฐิ อุปฺปชฺชติฯ สหชาตาธิปติ – ปีติสหคตาธิปติ สมฺปยุตฺตกานํ ขนฺธานํ อธิปติปจฺจเยน ปจฺจโยฯ (1)

ปีติสหคโต ธมฺโม สุขสหคตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติฯ อารมฺมณาธิปติ – ปีติสหคเตน จิตฺเตน ทานํ ทตฺวา…เป.…ฯ สหชาตาธิปติ – ปีติสหคตาธิปติ สมฺปยุตฺตกานํ สุขสหคตานํ ขนฺธานํ อธิปติปจฺจเยน ปจฺจโยฯ (2)

ปีติสหคโต ธมฺโม อุเปกฺขาสหคตสฺส ธมฺมสฺส อธิปติปจฺจเยน ปจฺจโยฯ อารมฺมณาธิปติ – ปีติสหคเตน จิตฺเตน ทานํ ทตฺวา…เป.… อุเปกฺขาสหคเตน จิตฺเตน (สํขิตฺตํ)ฯ (3)

ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติฯ อารมฺมณาธิปติ – ปีติสหคเตน จิตฺเตน ทานํ ทตฺวา…เป.…ฯ สหชาตาธิปติ – ปีติสหคตาธิปติ สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ อธิปติปจฺจเยน ปจฺจโยฯ (4)

[23] สุขสหคโต ธมฺโม สุขสหคตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติฯ อารมฺมณาธิปติ – สุขสหคเตน จิตฺเตน ทานํ ทตฺวา…เป.…ฯ สหชาตาธิปติ – สุขสหคตาธิปติ สมฺปยุตฺตกานํ ขนฺธานํ อธิปติปจฺจเยน ปจฺจโยฯ (1)

สุขสหคโต ธมฺโม ปีติสหคตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ…เป.…ฯ สหชาตาธิปติ – สุขสหคตาธิปติ สมฺปยุตฺตกานํ ปีติสหคตานํ ขนฺธานํ อธิปติปจฺจเยน ปจฺจโยฯ (2)

สุขสหคโต ธมฺโม อุเปกฺขาสหคตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ (สํขิตฺตํ)ฯ (3)