ปฐมวคฺโค

อถ โข มิลินฺทสฺส รญฺโญ เอตทโหสิ กตาวกาโส โขมฺหิ อายสฺมตา
นาคเสเนนาติ ฯ นิปติตฺวา คุรุสฺส ปาเท สิรสึ อญฺชลึ กตฺวา เอตทโวจ ภนฺเต นาคเสน
อิเม ติตฺถิยา เอวํ ภณนฺติ ยทิ พุทฺโธ ปูชํ สาทิยติ น ปรินิพฺพุโต พุทฺโธ สํยุตฺโต
โลเกน อนฺโตคธิโก โลกสาธารโณ ตสฺส กโต อธิกาโร อวชฺโฌ ภวติ สผโล ยทิ ปรินิพฺพุโต
วิสํยุตฺโต โลเกน วิสกฺโฐ สพฺพภเวหิ ตสฺส ปูชา น อุปฺปชฺชติ ปรินิพฺพุโต น กิญฺจิ
สาทิยติ อสาทิยนฺตสฺส พุทฺธสฺส กโต อธิกาโร วชฺโฌ ภวติ อผโลติ ฯ อยํ อุภโต
โกฏิโก ปญฺโห เนโส วิสโย อปฺปตฺตมานสานํ เอโส วิสโย มหนฺตานํ ภินฺทถ ภนฺเต
ทิฏฺฐิชาลํ เอกํเสน ถามนิโย ตว เอโส ปญฺโห อนุปฺปตฺโต อนาคตานํ ชินปุตฺตานํ จกฺขุํ
เทหิ ปรสาทานํ นิคฺคหายาติ ฯ เถโร อาห ปรินิพฺพุโต มหาราช ตถาคโต น จ
ตถาคโต ปูชํ สาทิยติ โพธิยาเยว มูเล ตถาคตสฺส สาทิยนา ปหีนา กึ ปน อนุปาทิเสสาย
นิพฺพานธาตุยา ปรินิพฺพุตสฺส ภควโต ฯ ภาสิตํ เจตํ มหาราช เถเรน สารีปุตฺเตน
ธมฺมาเสนาปตินาปิ
ปูชิตา อสมสมา สเทว มานุเสหิ เต
น สาทิยนฺติ สกฺการํ พุทฺธานํ เอส ธมฺมตาติ ฯ
ภนฺเต นาคเสน ปุตฺโต วา ปิตุโน วณฺณํ ภาสติ ปิตา วา ปุตฺตสฺส วณฺณํ
ภาสติ น เจตํ การณํ ปรปฺปวาทานํ นิคฺคหาย ปสาทปกาสโน นาเมโส อิงฺฆ ตฺวํ
ตตฺถ การณํ สพฺพํ พฺรูหิ สกวาทสฺส ปติฏฺฐาปนาย ทิฏฺฐิชาลํ วินิเวฏฺฐนายาติ ฯ เถโร
อาห ปรินิพฺพุโต โข มหาราช ตถาคโต น จ ตถาคโต ปูชํ สาทิยติ อสาทิยนฺตสฺส
คถาคตสฺส เทวมนุสฺสา ปรินิพฺพุตสฺส ธาตุรตนํ วตฺถุํ กริตฺวา ตถาคตสฺส ญาณ-
รตนารมฺมเณน สมฺมาปฏิปตฺตึ เสวนฺตา ติสฺโส สมฺปตฺติโย ปฏิลภนฺติ อุปมายปิ โส อตฺโถ
อุปปริกฺขิตพฺโพ ภวติ ฯ ยถา กึ วิย ยถา มหาราช มหติ มหาอคฺคิขนฺโธ ปชฺชลิตฺวา
นิพฺพายติ อปิ นุ โข โส มหาราช มหาอคฺคิขนฺโธ สาทิยติ ติณกฏฺฐอุปาทานนฺติ ฯ
ราชา อาห ชลมาโนปิ โส ภนฺเต มหติ มหาอคฺคิขนฺโธ ติณกฏฺฐอุปาทานนฺติ น สาทิยติ

กึ ปรินิพฺพุโต วฺปสนฺโต อเจตนา สาทิยตีติ ฯ ตสฺมึ ปน มหาราช อคฺคิมฺหิ อุปรเต
วูปสนฺเต โลโก อคฺคินา สุญฺโญ โหติ เย เต ปน มหาราช มนุสสา อคฺคิกามา นิราสา
โหนฺตีติ ฯ น หิ ภนฺเต กฏฺฐํ ภนฺเต อคฺคิสฺส อุปาทาย วตฺถุํ โหติ เย เกจิ มนุสฺสา
อคฺคิกามา เต อตฺตโน ถามพเลน วิริเยน ปจฺจตฺตปุริสกาเรน กฏฺฐํ มนฺถยิตฺวา อคฺคึ
นิพฺพตฺตยิตฺวา เตน อคฺคินา อคฺคิกรณียานิ กโรนฺตีติ ฯ เตนหิ มหาราช ติตฺถิยานํ
วจนํ มิจฺฉา ภวติ อสาทิยนฺตสฺส กโต อธิกาโร วชฺโฌ ภวติ อผโลติ ยถา มหาราช
มหติ มหาอคฺคิขนโธ ปชฺชลติ เอวเมว ตถาคโตปิ ทสสหสนฺสิยา โลกธาตุยํ พุทฺธรํสิยา
ปชฺชลิ ฯ ยถา มหาราช มหติ มหาอคฺคิขนฺโธ ปชฺชลิตฺวา นิพฺพายติ เอวเมว
ตถาคโตปิ ทสสหสฺสิยา โลกธาตุยํ พุทฺธรํสิยา ปชฺชลิตฺวา อนุปาทิเสสาย นิพฺพานธาตุยา
ปรินิพฺพุโต ฯ ยถา มหาราช ปรินิพฺพุโต อคฺคิ ติณกฏฺฐุปาทานํ น สาทิยติ เอวเมว
โข โลกหิตสฺส สาทิยนา ปหีนา อุปสนฺตา ฯ ยถา มหาราช มนุสฺสา นิพฺพุตสฺส อคฺคิสฺส
อนุปาทานสฺส อตฺตโน ถามพลวิริเยน ปจฺจตฺตปุริสกาเรน กฏฺฐํ มนฺถยิตฺวา อคฺคํ
นิพฺพตฺตยิตฺวา เตน อคฺคินา อคฺคิกรณียานิ กโรนฺติ เอวเมว เทวมนุสฺสา ตถาคตสฺส
ปรินิพฺพุตสฺส อสาทิยนฺตสฺส ธาตุรตนํ วตฺถุํ กริตฺวา ตถาคตสฺส ญาณรตนารมฺมเณน
สมฺมาปฏิปตฺตึ เสวนฺตา ติสฺโส สมฺปตฺติโย ปฏิลภนฺติ ฯ อิมินา มหาราช การเณน
ตถาคตสฺส ปรินิพฺพุตสฺส อสาทิยนฺตสฺส กโต อธิกาโร อวชฺโฌ ภวติ สผโลติ ฯ อปรมฺปิ
มหาราช อุตฺตรึ การณํ สุโณหิ ยทิ การเณน เต วิมติ น สมฺมติ เยน มหาราช
การเณน ตถาคตสฺส ปรินิพฺพุตสฺส อสาทิยนฺตสฺส กโต อธิกาโร อวชฺโฌ ภวติ สผโล
ยถา มหาราช มหติ มหาวาโต วายิตฺวา อุปรมติ อปิ นุ โข โส มหาราช อุปรโต
วาโต สาทิยติ ปุน นิพฺพตฺตาปนนฺติ ฯ หิ ภนฺเต สตฺถิ อุปรตสฺส อาโภโค วา
มนสิกาโน วา ปุน นิพฺพตฺตาปนาย ตํ กึการณํ อเจตนาเหตูติ ฯ อปิ นุ ตสฺส มหาราช
อุปรตสฺส วาตสฺส วาโตติ สมญฺญา อุปฉิชฺชตีติ ฯ น หิ ภนฺเต เย เกจิ มนุสฺสา
อุณฺหาภิตตฺตา อริฬาหปีฬิตา เต ตาลปณฺเณน วา วิธูเนน วา อตฺตโน ถามพลวิริเยน
ปจฺจตฺตปุริสกาเรน ตํ นิพตฺตยิตฺวา เตน วาเตน อุณหํ นิพฺพาเปนฺติ ปริฬาหํ
วิโนเทนฺตีติ ฯ เตนหิ มหาราช ติตฺถิยานํ วจนํ มิจฺฉา ภวติ ปริพนิพฺพุตสฺส ตถาคตสฺส
อสาทิยนฺตสฺส กโต อธิกาโร วชฺโฌ ภวติ อผโลติ ฯ ยถา มหาราช มหติ มหาวาโต
วายิ เอวํ ตถาโตปิ ทสสหสฺสิยา โลกธาตุยํ สีตลมธุรสนฺตสุขุมเมตฺตวาเตน อุปวายิ ฯ
ยถา มหาราช มหติ มหาวาโต วายิตฺวา อุปรมติ เอวํ ตถาคโตปิ ทสสหสฺสิยา โลกธาตุยํ

สีตลมธุรสนฺตสุขุมเตฺตวาเตน อุปวายิตฺวา อนุปาทิเสสาย นิพฺพานธาตุยา ปรินิพฺพุโต ฯ
ยถา มหาราช อุปรโต ปุน นิพฺพตฺตาปนํ น สาทิยติ เอวํ โลกหิตสฺส สาทิยนา
อุปสมนฺตา ฯ ยถา เต มนุสฺสา อุณฺหาภิตตฺตา ปริฬาหปีฬิตา เอวํ เทวมนุสฺสา
ติวิธคฺคิสนฺตาปปริฬาหปีฬิตา ฯ ยถา ตาลปตฺตญฺจ วิธูปนญฺจ วาตสฺส นิพฺพตฺติยา ปจฺจยา
โหนฺติ เอวํ ตถาคตสฺส ธาตุรตนญฺจ ญาณรตนญฺจ ปจฺจยา โหนฺติ ติสฺสนฺนํ สมฺปตฺตีนํ
ปฏิลาภาย ฯ พุทฺเธ ธรมาเน สนฺเต ปูชาวิเสเส ปรินิพฺพุเต วา โย โกจิ นโร จ
สทฺธาย กโต โส สตฺเตสุ ปโมทยนฺโต โหติ ติวิธสิริยา ปตฺเถนฺตา ยถากามํ
สมิทฺธิปฺปตฺตา ฯ ยถา มนุสฺสา อุณฺหาภิตตฺตา ปริฬาหปีฬิตา ตาลปตฺเตน วา วิธูปเนน
วาตํ นิพฺพตฺตยิตฺวา อุณฺหํ นิพฺพาเปนฺติ ปริฬาหํ วิโนเทนติ เอวํ เทวมนุสฺสา ตถาคตสฺส
ปรินิพฺพุตสฺส อสาทิยนฺตสฺส ธาตุรตนญฺจ ญาณรตนญฺจ ปูชยิตฺวา กุสลํ นิพฺพตฺตยิตฺวา
เตน กุสเลน ติวิธคฺคิสนฺตาปปริฬาหํ ปรินิพฺพาเปนฺติ วูปสเมนฺติ อิมินาปิ มหาราช การเณน
ตถาคตสฺส ปรินิพฺพุตสฺส อสาทิยนฺตสฺส กโต อธิกาโร อวชฺโฌ ภวติ สผโลติ ฯ
ภนฺเต นาคเสน อติพหุปริยายกถํ กเถสิ สมนฺตา ชปฺปิเตน หิ ญาณวโตเยว อตฺถญฺจ
วเทหีติ ฯ อปรํปิ มหาราช อุตฺตรึ การณํ สุโณหิ ปรปฺปวาทานํ นิคฺคหาย ยถา มหาราช
เอโก ปุริโส เภรึ อาโกเฏนฺโต สทฺทํ นิพฺพตฺเตติ โย เภรีสทฺโท ปุริเสน
นิพฺพตฺติโต โส สทฺโท อนฺตรธายติ อปิ นุ โข โส มหาราช สทฺโท สาทิยติ ปุน
นิพฺพตฺตาปนนฺติ ฯ น หิ ภนฺเต อนฺตรหิโต โส สทฺโท นตฺถิ ตสฺส ปุน อุปฺปาทาย
อาโภโค วา มนสิกาโร วา สกึ นิพฺพตฺเต เภรีสทฺเท อนฺตรหิเต เภรีสทฺโท สมุจฺฉินฺโน
โหติ ฯ เภรี ปน ภนฺเต ปจฺปโย โหติ สทฺทสฺส นิพฺพตฺติยา ปุริโส จ ปจฺจเย สติ
อตฺรเชน วายาเมน เภรึ อาโกเฏตฺวา เภรีสทฺทํ นิพฺพตฺเตตีติ ฯ เ อวเมว โข มหาราช
ภควา สีลสมาธิปญฺญาวิมุตฺติวิมุตฺติญาณทสฺสนปริภาวิตํ ธาตุรตนญฺจ ธมฺมญฺจ วินยญฺจ
อนุสนฺธวํ สตฺถารํ ฐปยิตฺวา อนุปาทิเสสาย นิพฺพานธาตุยา ปรินิพฺพุโต น จ ภควติ
ปรินิพฺพุเต สมฺปตฺติปฏิลาโภ สมุจฺฉินฺโน ภวติ ภวทุกฺขปริปีฬิตา สตฺตา ธาตุรตนญฺจ
ธมฺมรตนญฺจ วินยรตนญฺจ อนุสนฺธึ จ ปจฺจยํ กริตฺวา สมฺปตฺติกามา สมฺปตฺติโย นิพฺพตฺเตนฺติ
เภริโต วิย เภรีสทฺทนฺติ ฯ ยทิ มหาราช วิชฺชมานาย เภริยา วิชฺชมาเน อาโกฏเก
เภรีปจฺจเยน อาโกฏกา อปราปรํ สทฺทํ นิพฺพตฺเตนฺติ เตนฺหิ ธาตุรตเนปิ วิชฺชมาเน
วิชฺชมานาย อนุสนฺธิยา ธาตุรตนํ อนุสนฺธิยา ปจฺจยํ กริตฺวา สมฺปตฺติกามา สมฺปตฺติโย
ปฏิลภนฺติ ฯ อิมินา มหาราช การเณน ตถาคตสฺส ปรินิพฺพุตสฺส อสาทิยนฺตสฺส กโต

อธิกาโร อวชฺโฌ ภวติ สผโลติ ฯ กถิตญฺเจตํ มหาราช ภควตา อนาคตมทฺธานํ ภณิตญฺจ
อาจิกฺขิตญฺจ สิยา โข ปนานนฺท ตุมฺหากํ เอวมสฺส อตีตสตฺถุกํ ปาวจนํ นตฺถิ โน
สตฺถาติ ฯ น โข ปเนตํ อานนฺท เอวํ ทฏฺฐพฺพํ โย โว อานนฺท มยา ธมฺโม
จ วินโย จ เทสิโต ปญฺญตฺโต โส โว มมจฺจเยน สตฺถาติ ฯ ตสฺมา หิ ตถาคตสฺส
ปรินิพฺพุตสฺส อสาทิยนฺตสฺส กโต อธิกาโร วชฺโฌ ภวติ อผโลติ เตสํ ติตฺถิยานํ วจนํ
มิจฺฉา อภูตํ อวิตถํ อสนฺตํ อลิกํ วิปริตํ อปายคมนียํ ฯ อปรํปิ มหาราช อุตฺตรึ
การณํ สุโณหิ เยน กาเรณน ตถาคตสฺส ปรินิพฺพุตสฺส อสาทิยนฺตสฺเสว กโต อธิกาโร
อวชฺโฌ ภวติ สผโล สาทิยติ นุ โข มหาราช อยํ มหาปฐวี เอวํ สพฺพวีชานิ มยิ
สํวิรูหนฺตีติ ฯ น หิ ภนฺเตติ ฯ กิสฺส ปน ตานิ มหาราช สพฺพวีชานิ อสาทิยนฺติยา
มหาปฐวิยา สํวิรูหิตฺวา ทฬฺหมูลชาตานิ ปติฏฺฐิตขนฺธสารานิ สาขาวิตฦฺถินฺนานิ ปุปฺผผลธรานิ
โหนฺตีติ ฯ อสาทิยนฺตีปิ ภนฺเต มหาปฐวี เตสํ วีชานํ วตฺถุ โหติ ปจฺจยํ เทติ วิรูหนาย
ตานิ วีชานิ ตํ วตฺถุํ นิสฺสาย เตน ปจฺจเยน สํวิรูหิตฺวา ทฬฺหมูลชาตานิ ปติฏฺฐิตขนฺธสารานิ
สาขาวิตฺถินฺนานิ ปุปฺผผลธรานิ โหนฺตีติ ฯ เตนหิ มหาราช ติตฺถิยา สเกน วาเทน
นฏฺฐา โหนฺติ หตา วิรุทฺธา สเจ เต ภณนฺติ อสาทิยนฺตสฺส กโต อธิกาโร วชฺโฌ
ภวติ อผโลติ ฯ ยถา มหาราช มหาปฐวี เอวํ ตถาคโต อรหํ สมฺมาสมฺพุทฺโธ
วิชฺชาจรณสมฺปนฺโน สุคโต โลกวิทู ฯ ยถา มหาราช มหาปฐวี น กานิจิ สาทิยติ
วีชานิ เอวํ ตถาคโต โลเก น กิญฺจิ สาทิยติ ฯ ยถา มหาราช ตานิ สพฺพวีชานิ
มหาปฐวึ นิสฺสาย สํวิรูหิตฺวา ทฬฺหมูลชาตานิ ปติฏฺฐิตขนฺธสารานิ สาขาวิตฺถินฺนานิ
ปุปฺผผลธรานิ โหนฺติ เอวํ เทวมนุสฺสา ตถาคตสฺส ปรินิพฺพุตสฺส อสาทิยนฺตสฺส ญาณรตนํ
นิสฺสาย ทฬฺหกุสลมูลชาตา ปติฏฺฐิตสมาธิขนฺธธมฺมาสารา สีลสาขาวิตฺถินฺนา วิมุตฺติปุปฺผ-
สามญฺญผลธรา โหนฺติ อิมินาปิ มหาราช การเณน ตถาคตสฺส ปรินิพฺพุตสฺส อสาทิยนฺตสฺส
กโต อธิกาโร อวชฺโฌ ภวติ สผโลติ ฯ อปรํปิ มหาราช อุตฺตรึ การณํ สุโณหิ เยน
การเณน ตถาคตสฺส ปรินิพฺพุตสฺส อสาทิยนฺตสฺส กโต อธิกาโร อวชฺโฌ ภวติ สผโล
สาทิยนฺติ มหาราช อิเม โอฏฺฐโคณคทฺรภอชมหิสปสุมนฺสา อนฺโตกุจฺฉิสฺมึ กิมิกุลานิ
สมฺภวนฺตานีติ ฯ น หิ ภนฺเตติ ฯ กิสฺส ปน เต มหาราช กิมโย เตสํ อนฺโตกุจฺฉิสฺมึ
สมฺภวิตฺวา พหุปุตฺตนตฺตา เ วปุลฺลตฺตํ ปาปุณนฺตีติ ฯ ปาปสฺส ภนฺเต กมฺมสฺส พลวตา
อสาทิยนฺตานํเยว เตสํ อนฺโตกุจฺฉิสฺมึ กิมโย สมฺภวิตฺวา พหุปุตฺตนตฺตา เวปุลฺลตฺตํ
ปาปุณนฺตีติ ฯ เอวเมว โข มหาราช ตถาคตสฺส ธาตุยา จ ญาณรตนสฺส จ พลวตา

ตถาคเต กโต อธิกาโร อวชฺโฌ ภวติ สผโลติ ฯ อปรํปิ มหาราช อุตฺตรึ การณํ สุโณหิ
เยน การเณน ตถาคตสฺส ปรินิพฺพุตสฺส อสาทิยนฺตสฺส กโต อธิกาโร อวชฺโฌ ภวติ
สผโล สาทิยนฺติ มหาราช อิเม มนุสฺสา ฉนวุติ โรคา กาเย นิพฺพตฺตนฺตูติ ฯ
น หิ ภนฺเตติ ฯ กิสฺส ปน เ ต มหาราช โรคา อสาทิยนฺตานํ มนุสฺสานํ กาเย
นิพฺพตฺตนฺตีติ ฯ ปุพฺเพ กเตน ภนฺเต ทุจฺจริเตนาติ ฯ ยทิ มหาราช ปุพฺเพ กตํ
อกุสลํ อิธ เวทนียํ โหติ เตนหิ มหาราช ปุพฺเพ กตํปิ อิธ กุสลากุสลกมฺมํ อวชฺฌํ
ภวติ สผลํ ฯ อิมินาปิ มหาราช การเณน ตถาคตสฺส ปรินิพฺพุตสฺส อสาทิยนฺตสฺส
กโต อธิกาโร อวชฺโฌ ภวติ สผโล ฯ สุตปุพฺพํ ปน ตยา มหาราช นนฺทโก นาม
ยกฺโข เถเร สารีปุตฺเต จิตฺตํ ปโทสิตฺวา มหาปฐวึ ปวิฏฺโฐติ ฯ อาม ภนฺเต สุยฺยติ
โลเก ปากโฏ เอโสติ ฯ อปิ นุ โข มหาราช เถโร สารีปุตฺโต สาทิยติ ตํ ยกฺขํ
ยกฺโข มหาปฐวึ ปวิสตูติ ฯ ปวตฺตมาเนปิ ภนฺเต สเทวเก โลเก ปตมาเนปิ ฉมายํ
จนฺทิมสุริเย วิกิรนฺเต สิเนรุมฺหิ ปพฺพตราเช เถโร สารีปุตฺโต น ปรสฺส ทุกขํ
สาทิเยยฺย ฯ ตํ กิสฺส เหตุ ฯ เยน เหตุนา เถโร สารีปุตฺโต กุปฺเปยฺย วา กุชฺเฌยฺย
วา ทุสฺเสยฺย วา โส เหตุ เถรสฺส สารีปุตฺตสฺส สมูหโต สมุจฺฉินฺโน ฯ เหตุโน สมุคฺฆาตตฺตา
ภนฺเต เถโร สารีปุตฺโต ชีวิตหารเกปิ สติ โกปํ น กเรยฺยาติ ฯ ยทิ มหาราช เถโร
สารีปุตฺโต นนฺทกสฺส ยกฺขสฺส มหาปฐวีคิลนํ น สาทยิ กิสฺส ปน โส นนฺทโก
ยกฺโข มหาปฐวึ ปวิฏฺโฐติ ฯ อกุสลสฺส ภนฺเต กมฺมสฺส พลวตาติ ฯ ยทิ มหาราช
อกุสลสฺส กมฺมสฺส พลวตา นนฺทโกยกฺโขมหาปฐวึ ปริวสติ ฯ เตนหิ มหาราช กุสลสฺส
กมฺมสฺส พลวตา อสาทิยนฺตสฺส กโต อธิกาโร อวชฺโฌ ภวติ สผโล ฯ อิมินาปิ
มหาราช การเณน ตถาคตสฺส ปรินิพฺพุตสฺส อาทิยนฺตสฺส กโต อธิกาโร อวชฺโฌ
ภวติ สผโลติ ฯ กติ นุ โข มหาราช มนุสฺสา เ ย เอตรหิ สุตา มหาปฐวึ ปวิฏฺฐา
อตฺถิ เต ตตฺถ สวนนฺติ ฯ อาม ภนฺเต สุยฺยตีติ ฯ อิงฺฆ มหาราช สาเวหีติ ฯ
จิญฺจมานวิกา ภนฺเต สุปฺปพุทฺโธ จ สกฺโก เทวทตฺโต จ เถโร นนฺทโก จ ยกฺโข นนฺโท
จ มานวโกติ อิเม ปญฺจ ชนา มยา สุตาติ ฯ กสฺมึ เต มหาราช อปรทฺธาติ ฯ
ภควติ ภนฺเต สาวเกสุ วาติ ฯ อปิ นุ โข มหาราช ภควา สาทิยติ เตสํ สตฺตานํ
อิเม สตฺตา มหาปฐวึ ปวิสนฺตูติ ฯ น หิ ภนฺเตติ ฯ เตนหิ มหาราช ตถาคตสฺส
ปรินิพฺพุตสฺส อสาทิยนฺตสฺส กโต อธิกาโร อวชฺโฌ ภวติ สผโลติ ฯ สุวิญฺญาปิโต ภนฺเต
นาคเสน ปญฺโห คมฺภีโร อุตฺตานกโต คุยฺหํ วิธํสิตํ คณฺฐิ ภินฺนา คหนํ อคหนกตํ

นฏฺฐา ปรปฺปวาทา ภคฺคา กุทิฏฺฐิ นิปฺปภาชาตา กุติตฺถิยา ตฺวํ คณิวรปวรมาสชฺชาติ ฯ
ตถาคตสส ปรินพฺพุตสฺส อสาทิยนฺตสฺส

วชฺฌาวชฺฌปญฺโห ปฐโม ฯ

ภนฺเต นาคเสน พุทฺโธ สพฺพญฺญูติ ฯ อาม มหาราช ภควา สพฺพญฺญู
น จ ภควโต สตตํ สมิตํ ญาณทสฺสนํ ปจฺจุปฏฺฐิตํ อาวชฺชนปฏิพทฺธํ ภควโต
สพฺพญฺญุตญาณํ อาวชฺชิตฺวา ยถิจฺฉกํ ชานาตีติ ฯ เตนหิ ภนฺเต นาคเสน พุทฺโธ อสพฺพญฺญู
ยทิ ตสฺส ปริเยสนียํ สพฺพญฺญุตญาณํ โหตีติ ฯ วาหสตานิ โข มหาราช วีหีนํ อตฺถิ
ปญฺจ จตฺตาริ ตโย เทฺว จ อาฬฺหา เอกจฺฉรกฺขเณ ปวตฺตสฺส จิตฺตสฺส เอตฺตกา
วีหิลกฺขา ฐปิยมานา ปริกฺขยํ ปริยาทานํ คจฺเฉยฺยุํ ฯ ตตฺรีเม สตฺตวิธา จิตฺตา ปวตฺตนฺติ
เย เต มหาราช สราคา สโทสา สโมหา สตณฺหา สกิเลสา อภาวิตกายา อภาวิตสีลา
อภาวิตจิตฺตา อภาวิตปญฺญา โหนฺติ เตสํ จิตฺตํ ครุกํ อุปฺปชฺชติ ทนฺธํ ปวตฺตติ ตํ
กึการณํ อภาวิตฺตตา จิตฺตสฺส ฯ ยถา มหาราช วํสนาฬิสฺส สํสิพฺพิตสฺส วิสิพฺพิตสฺส
วิสาลสฺส วิตฺถินฺนสฺส วิสิกฺขิตสฺส ชฏาชฏิตสฺส อากฑฺฒิยามนสฺส ครุกํ โหติ อาคมนํ
ทนฺธํ ปวตฺตติ ตํ กึการณา สํสิพฺพิตวิสิพฺพิตตฺตา วิสาขาย ฯ เอวเมว โข มหาราช
เย เต สราคา สโทสา สโมหา สตณฺหา สกิเลสา อภาวิตกายา อภาวิตสีลา อภาวิตจิตฺตา
อภาวิตปญฺญา ตํ เตสํ จิตฺตํ ครุกํ อุปฺปชฺชติ ทนฺธํ ปวตฺตติ กึการณํ สํสิพฺพตวิสิพฺพิตตฺตา
สพฺพกิเลเสหิ ฯ อิทํ ปฐมจิตฺตํ วิภตฺตมาปชฺชติ ฯ
ตตฺรีทํ ทุติยํ จิตฺตํ วิภตฺตมาปชฺชติ ฯ เย เต มหาราช โสตาปนฺนา ปหีนาปายา
ทิฏฺฐิปฺปตฺตา วิญฺญาตสตฺถุสาสนา ตํ เตสํ จิตฺตํ ตีสุ ฐาเนสุ ลหุกํ อุปฺปชฺชติ ลหุกํ
ปวตฺตติ อุปริภูมีสุ ครุกํ อุปฺปชฺชติ ทนฺธํ ปวตฺตติ ตํ กึการณํ ตีสุ ฐาเนสุ จิตฺตสฺส
ปริสุทฺธตฺตา อุปริกิเลสานํ อปฺปหีนตฺตา ฯ ยถา มหาราช วํสนาฬิสฺส ติปพฺพคณฺฐิ-
ปริสุทฺธสฺส อุปริสาขาชฏาชฏิตสฺส อากฑฺฒิยมานสฺส ยาว ติปพฺพคณฺฐิปริสุทฺโธ ตาว
ลหุกํ โหติ ตโต อุปริ ทนฺธํ ปวตฺตติ ตํ กึการณํ เหฏฺฐา วิสุทฺธตฺตา อุปริสาขาย
ชฏาชฏิตตฺตา ฯ เอวเมว โข มหาราช เย เต โสตาปนฺตา ปหีนาปายา ทิฏฺฐิปฺปตฺตา
วิญฺญาตสตฺถุสาสนา เตสนฺตํ จิตฺตํ ตีสุ ฐาเนสุ ลหุกํ อุปฺปชฺชติ ลหุกํ ปวตฺตติ อุปริภูมีสุ
ครุกํ อุปฺปชฺชติ ทนฺธํ ปวตฺตติ ตํ กึการณํ ตีสุ ฐาเนสุ ปริสุทฺธตฺตา อุปริกิเลสานํ