นวมวคฺโค

ภนฺเต นาคเสน เย เต มรนฺติ สพฺเพ เต กาลํเยว มรนฺติ อุทาหุ อกาลํ
มรนฺตีติ ฯ อตฺถิ มหาราช กาลมรณํ อตฺถิ อกาลมรณนฺติ ฯ เก เต ภนฺเต กาลมรณํ
เก เต อกาลมรณนฺติ ฯ ทิฏฺฐปุพฺพา ปน ตยา มหาราช อมฺพรุกฺขา วา อญฺเญ
เกจิ รุกฺขา วา ผลิโน ปุปฺผวินฺทกาเลเยว เต ปตนฺตา สวณฺฑกาเลเยว ปตนฺตา
โทวิลา เต ปตนฺตา อามวณฺณา เต ปตนฺตา อปกฺกสมฺปตฺตา เต ปตนฺตาติ ฯ อาม
ภนฺเตติ ฯ เย เต มหาราช ปริปกฺกา ผลา ปตนฺติ เต สพฺเพ กาเล ปตนฺติ เย
ปน เต อวเสสา ผลา เตสุ เกจิ กิมิวิทฺธา ปตนฺติ เกจิ สกุณปหตา ปตนฺติ เกจิ
วาตปหตา ปตนฺติ เกจิ อนฺโตปูติกา หุตฺวา ปตนฺติ เต สพฺเพ อกาเล ปตนฺติ เอวเมว
โข มหาราช เย ชราย คหิตา มรนฺติ เต กาเลเยว มรนฺติ อเวสสา เกจิ กมฺมปฏิพาฬฺหา
มรนฺติ เกจิ คติปฏิพาฬฺหา มรนฺติ เกจิ กิริยปฏิพาฬิหา มรนฺติ เต สพฺเพ อกาเลเยว
มรนฺตีติ ฯ ภนฺเต นาคเสน เย เต กมฺมปฏิพาฬฺหา มรนฺติ เยปิ เต คติปฏิพาฬฺหา
มรนฺติ เยปิ เต กิริยปฏิพาฬฺหา มรนฺติ เยปิ เต ชราย คหิตา มรนฺติ สพฺเพ เต
กาเล มรนฺติ ฯ โย มาตุกุจฺฉิคโต มรติ โส ตสฺส กาเล กาเลเยว โส มรติ โย
ปสูติฆเร มรติ โส ตสฺส กาโล กาเลเยว โส มรติ โยปิ ฉปฺปญฺจมาสิโก มรติ โยปิ
ทสพารสมาสิโก มรติ โยปิ สตวสฺสิโก มรติ กาเลเยว โส มรติ ฯ เตนหิ ภนฺเต
นาคเสน อกาลมรณํ นาม น โหติ เย เกจิ มรนฺติ เต สพฺเพ กาเลเยว
มรนฺตีติ ฯ
สตฺติเม มหาราช วิชฺชมาเนปิ อุตฺตรึ อายุสมฺมึ อกาเล มรนฺติ ฯ กตเม
สตฺต ฯ ชิฆจฺฉิโก มหาราช โภชนํ อลภมาโน อุปหตพฺภนฺตโร วิชฺชมาเนปิ อุตฺตรึ อายุสฺมึ
อกาเล มรติ ฯ ปิปาสิโต มหาราช ปานียํ อลภมาโน ปริสุกฺกหทโย วิชฺชมาเนปิ อุตฺตรึ
อายุสฺมึ อกาเล มรติ ฯ อหินา ทฏฺโฐ มหาราช วิสมานุคโต ติกิจฺฉกํ อลภมาโน
วิชฺชมาเนปิ อุตฺตรึ อายุสฺมึ อกาเล มรติ ฯ วิสมาสิโต มหาราช ฑยฺหนฺเตสุ องฺคมงฺเคสุ
อคทํ อลภมาโน วิชฺมาเนปิ อุตฺตรึ อายุสฺมึ อกาเล มรติ ฯ อคฺคิคโต มหาราช