เมนู

อฏฺฐมวคฺโค


ภนฺเต นาคเสน อตฺถิ โลเก ยกฺขา นามาติ ฯ อาม มหาราช อตฺถิ โลเก
ยกฺขา นามาติ ฯ จวนฺติ ปน เต ภนฺเต ยกฺขา ตมฺหา โยนิยาติ ฯ อาม มหาราช
จวนฺติ เต ยกฺขา ตมฺหา โยนิยาติ ฯ กิสฺส ปน ภนฺเต นาคเสน เตสํ มตานํ ยกฺขานํ
สรีรํ น ทิสฺสติ กุณปคนฺโธปิ น วายตีติ ฯ ทิสฺสติ มหาราช มตานํ ยกฺขานํ สรีรั
กุณปคนฺโธปิ เตสํ วายติ ฯ มตานํ มหาราช ยกฺขานํ สรีรํ กีฏวณฺเรน วา ทิสฺสติ
กิมิวณฺเณน วา ทิสฺสติ กิปิลฺลิกวณฺเณน วา ทิสฺสติ ปฏงฺควณฺเรน วา ทิสฺสติ อหิวณฺเณน
วา ทิสฺสติ วิจฺฉิกวณฺเณน วา ทิสฺสติ สตปทิวณฺเณน วา ทิสฺสติ ทิชวณฺเณน วา ทิสฺสติ
มิควณฺเณน วา ทิสฺสตีติ ฯ โก หิ ภนฺเต นาคเสน อญฺโญ อิมํ ปญฺหํ ปุฏฺโฐ
วิสชฺเชยฺย อญฺญตฺร ตวาทิเสน พุทฺธิมตาติ ฯ

ยกฺขานํ มรณภาวปญฺโห ปฐโม ฯ


ภนฺเต นาคเสน เย เต อเหสุํ ติกิจฺฉกานํ ปุพฺพกานํ อาจริยา ฯ เสยฺยถีทํ
นารโท ธมฺมนฺตริโก องฺคีรโส กปิโล กณฺฑรคฺคิกาโม อตุโล ปุพฺพกจฺจายโน สพฺเพ เจเต
อาจริยา สกึเยว โรคสฺส อุปฺปตฺตึ จ นิทานญฺจ สํภวญฺจ สมุฏฺฐานญฺจ กิริยญฺจ ติกิจฺฉญฺจ
สิทฺธาสิทฺธญฺจ สพฺพนฺตํ ชานิตฺวา อิมสฺมึ กาเยว เอตฺตกา นาม โรคา อุปฺปชฺชิสฺสนฺตีติ
เอกปฺปหาเรน กลาปคาหํ กตฺวา สุตฺตํ พนฺธึสุ ฯ อสพฺพญฺญุโน จ เต สพฺเพ ฯ
กิสฺส ปน ตถาคโต สพฺพญฺญู สมาโน อนาคตํ ชานิตฺวา สพฺพํ วิญฺญาย พุทฺธญาเณน
เอตฺตเก นาม วตฺถุสฺมึ เอตฺตกํ นาม สิกฺขาปทํ ปญฺญาเปตพฺพํ ภวิสฺสตีติ ปริจฺฉินฺทิตฺวา
อนวเสสโต สิกฺขาปทํ น ปญฺญาเปสิ อุปฺปนฺนุปฺปนฺนสฺมึ วตฺถุสฺมึ อยเส ปากเฏ โทเส
วิตฺถาริเต อตฺถชาเต อุชฺฌายนฺเตสุ มนุสฺเสสุ ตตฺถ กาเล ภควา สาวกานํ สิกฺขาปทํ
ปญฺญาเปสีติ ฯ ญาตเมตํ มหาราช ตถาคตสฺส อิมสฺมึ สมเย อิเมสุ มนุสฺเสสุ อุชฺฌายนฺเตสุ
สาธิกํ ทิยฑฺฒํ สิกฺขาปทสตํ ปกาเสตพฺพํ ภวิสฺสตีติ ฯ อปิจ ตถาคตสฺส เอวํ อโหสิ
สเจ โข อหํ สาธิกํ ทิยฑฺฒํ สิกฺขาปทสตํ เอกปฺปหารํ ปญฺญาเปสฺสามิ ฯ มหาชนา
สนฺตาปํ อาปชฺชิสฺสนฺติ พหุกํ อิธ รกฺขิตพฺพํ ทุกฺกรํ วต โก สมณสฺส โคตมสฺส สาสเน

ปพฺพชิตุนฺติ ปพฺพชิตุกามาปิ น ปพฺพชิสฺสนฺติ สจนญฺจ เม น สทฺทหิสฺสนฺติ อสทฺทหนฺตา
เต มนุสฺสา อปายปุริกา ภวิสฺสนฺติ อุปฺปนฺนสฺมึ วตฺถุสมฺมึ ธมฺมเทสนาย วิญฺญาเปตฺวา
ปากเฏ โทเส สิกฺขาปทํ ปญฺญาเปสฺสามีติ ฯ เอวเมตํ ภนฺเต นาคเสน สุนิทฺทิฏฺโฐ
เอโส อตฺโถ ตถาคเตน ฯ พหุกํ อิธ มกฺขิตพฺพนฺติ สุตฺวา สตฺตานํ สนฺตาโส อุปฺปชฺเชยฺย
เอโกปิ ชินสาสเน น ปพฺพเชยฺย เอวเมตํ ตถา สมฺปฏิจฺฉามีติ ฯ

สิกฺขาปทอปญฺยาปนปญฺโห ทุติโย ฯ


ภนฺเต นาคเสน อยํ สุริโย สพฺพกาลํ กฐิตํ ตปฺปติ อุทาหุ กญฺจิ กาลํ
มนฺโท โหตีติ ฯ สพฺพกาลํ มหาราช สุริโย กฐิตํ ตปฺปตีติ ฯ ยทิ ภนฺเต นาคเสน
สุริโย สพฺพกาลํ กฐิตํ ตปฺปติ กิสฺส ปน อปฺเปกทา สุริโย มนฺทํ ตปฺปติ อปฺเปกทา
กฐิตํ ตปฺปตีติ ฯ จตฺตาโรเม มหาราช สุริยสฺส โรคา เตสํ อญฺญตเรน โรเคน
ปีฬิโต สุริโย มนฺทํ ตปฺปติ กตเม จตฺตาโร ฯ อพฺภา มหาราช สุริยสฺส โรโค
ตาย ปีฬิโต สุริโย มนฺทํ ตปฺปติ ฯ ธุโม มหาราช สุริยสฺส โรโค เตน ปีฬิโต
สุริโย มนฺทํ ตปฺปติ ฯ เมโฆ มหาราช สุริยสฺส โรโค เตน ปีฬิโต สุริโย มนฺทํ
ตปฺปติ ฯ ราหุ มหาราช สุริยสฺส โรโค เตน ปีฬิโต สุริโย มนฺทํ ตปฺปติ ฯ
อิเม โข มหาราช จตฺตาโร สุริยสฺส โรคา เตสํ อญฺญตเรน ปีฬิโต สุริโย มนฺทํ
ตปฺปติ ฯ อจฺฉริยํ ภนฺเต นาคเสน สุริยสฺสปิ เตชสมฺปนฺนสฺส โรโคปิ อุปฺปชฺชติ กิมงฺคํ
ปน อญฺเญสํ สตฺตานํ ฯ นตฺถิ เอสายํ ภนฺเต วิภตฺติ อญฺญสฺส อญฺญตฺร ตวาทิเสน
พุทฺธิมนฺเตนาติ ฯ

สุริยโรคภาวปญฺโห ตติโย ฯ


ภนฺเต นาคเสน กิสฺส เหมนฺเต สุริโย กฐิตํ ตปฺปติ โน ตถา
คิมฺเหสุติ ฯ คิมฺเหสุ มหาราช โอหตํ ตนุคตํ โหติ รโชชลฺลํ อุทฺธนฺตริภูตํ เรณู จ
คคณานุคตา โหนฺติ อากาเส อพฺภสฺส พหลา โหนฺติ มหาวาโต จ อธิมตฺตํ วายติ
สพฺเพ เต นานากุลา สมายุตฺตา สุริยรํสิโย ปิทหนฺติ เตน คิมฺเหสุ สุริโย มนฺทํ
ตปฺปติ ฯ เหมนฺเต มหาราช เหฏฺฐา ปฐวี นิพฺพุตา โหติ อุปริ มหาเมโฆ อุปฏฺฐิโต
อุปสนฺนํ โหติ รโชชลฺลํ เรณู จ สนฺตสนฺตา คคเณ น จรนฺติ วิคตมลํ คคณญฺจ โหติ
อากาเส ฐิโตปิ วาโต มนฺทํ วายติ ฯ เตสํ อุปรติยา วิสุทฺโธ สุริโย โหติ สุริยสฺส