ฉฏฺฐวคฺโค

ภนฺเต นาคเสน ยทา โพธิสตฺโต ทุกฺกรการิกํ อกาสิ น ตาทิโส อญฺญตฺร
อารมฺโภ อโหสิ นิกฺขโม กิเลสยุทฺธํ มจฺจุเสนาวิธํสนํ อาหารปริคฺคโห ทุกฺกรการิกา ฯ
เอวรูเป มหาปรกฺกเม กิญฺจิ อสฺสาทํ อลภิตฺวา ตเมว จิตฺตํ ปริวตฺตาเปตฺวา เอวํ อวจ
น โข ปนาหํ อิมาย กฏุกาย ทุกฺกรการิกาย อธิคจฺฉามิ อุตฺตริมนุสฺสธมฺมา อลมริย-
ญาณทสฺสนวิเสสํ ฯ สิยา นุ โข อญฺโญ มคฺโค โพธายาติ ฯ ตโต นิพินฺทิตฺวา อญฺเญน
มคฺเคน สพฺพญฺญุตํ ปตฺโต ปุน จ ตาย ปฏิปทาย สาวเก อนุสาสติ สมาทเปติ
อารพฺภถ นิกฺขมถ ยุญฺชถ พุทฺธสาสเน
ธุนาถ มจฺจุโน เสนํ นฬาคารํ ว กุญฺชโรติ ฯ
เกน โข ภนฺเต นาคเสน การเณน ตถาคโต ยาย ปฏิปทาย อตฺตนา
นิพฺพินฺนรูโป วิรตฺตรูโป ปฏิมานรูโป ตตฺถ สาวเก อนุสาสติ สมาปเปตีติ ฯ
ตทาปิ มหาราช เอตรหิปิ สาเยว ปฏิปทา ตํเยว ปฏิปทํ ปฏิปชฺชิตฺวา โพธิสตฺโต
สพฺพญฺญุตํ ปตฺโต ฯ อปิจ มหาราช โพธิสตฺโต อติวิริยํ กโรนิโต นิรวเสสโต อาหารํ
อุปจฺฉินฺทิ ตสฺส อาหารอุปจฺเฉเทน จิตฺตทุพฺพลตฺตํ อุปฺปชฺชิ โส เตน จิตฺตทุพฺพลตฺเตน
นาสกฺขิ สพฺพญฺญุตํ ปาปุณิตุํ โส มตฺตมตฺตํ กวลึการาหารํ เสวนฺโต ตาย ปฏิปทาย
น จิรสฺเสว สพฺพญฺญุตํ ปาปุณิ ฯ สาเยว มหาราช ปฏิปทา สพฺเพสํ ตถาคตานํ
สพฺพญฺญุตญาณํ ปฏิลภาย ฯ ยถา มหาราช สพฺเพสํ สตฺตานํ อาหาโร อุปตฺถมฺโภ
อาหารํ อุปนิสฺสิตา สพฺเพ สตฺตา สุขํ อนุภวนฺติ เอวเมว โข มหาราช สาเยว ปฏิปทา
สพฺเพสํ ตถาคตานํ สพฺพญฺญุตญาณํ ปฏิลาภาย ฯ เนโส มหาราช โทโส อารมฺภสฺส
น นิกฺขมสฺส น กิเลสยุทฺธสฺส เยน ตถาคโต ตสฺมึ ขเณ น ปาปุณิ สพฺพญฺญุตญาณํ
อถ โข อาหารุปจฺเฉทสฺเสว โทโส สทา ปฏิยตฺตา สา ปฏิปทา ฯ ยถา มหาราช
ปุริโส อติเวเคน อทฺธานํ คจฺเฉยฺย เตน โส ปกฺขหโต วา ภเวยฺย ปีฐสปฺปิ วา อสญฺจโร
ปฐวีตเล อปิ นุ โข มหาราช ปฐวิยา โทโส อตฺถิ เยน น สญฺจรตีติ ฯ น หิ