เมนู

ปญฺจมวคฺโค


ภนฺเต นาคเสน ภาสิตมฺเปตํ ภควตา เอตทคฺคํ ภิกฺขเว มม สาวกานํ
ภิกฺขูนํ อิทฺธิมนฺตานํ ยทิทํ มหาโมคฺคลฺลาโนติ ฯ ปุน จ กิร โส ลคุเฬหิ โจเรหิ
ปริโปถิโต ภนฺนสีโส สญฺจุณฺณิตฏฺฐิมํสธมฺมนิมิญฺชปริคตฺโต ตณฺฑุลสมฺพโล วิย อโหสิ เตเนว
อุปทฺทเวน โส ปรินิพฺพุโตติ ฯ ยทิ ภนฺเต นาคเสน เถโร มหาโมคฺคลฺลาโน อิทฺธิยา
โกฏึ คโต เตนหิ ลคุเฬหิ โจเรหิ ปริโปถิโต ปรินิพฺพุโตติ ยํ วจนํ ตํ มิจฺฉา ฯ
ยทิ ลคุเฬหิ โจเรหิ ปริโปถิโต ปรินิพฺพุโต เตนหิ อิทฺธิยา โกฏึ คโตติ ตมฺปิ วจนํ
มิจฺฉา ฯ กึ น สมตฺโถ อิทฺธิยา อตฺตโน อุปฆาตํ อปนยิตุํ สเทวกสฺสปิ โลกสฺส
ปฏิสรณํ ภวิตุํ อรโหติ ฯ อยมฺปิ อุภโต โกฏิโก ปญฺโห ตวานุปฺปตฺโต โส ตยา
นิพฺพาหิตพฺโพติ ฯ
ภาสิตมฺเปตํ มหาราช ภควตา เอตทคฺคํ ภิกฺขเว มม สาวกานํ ภิกฺขูนํ
อิทฺธิมนฺตานํ ยทิทํ มหาโมคฺคลฺลาโนติ อายสฺมา จ มหาโมคฺคลฺลาโน ลคุฬหโต ปรินิพฺพุโต
ตญฺจ ปน กมฺมาธิคฺคหิเตนาติ ฯ นนุ ภนฺเต นาคเสน อิทฺธิมโต อิทฺธิวิสโยปิ กมฺมวิปาโกปิ
เทฺว อจินฺติยา อจินฺติเยน อจินฺติยํ อปนยิตพฺพํ ฯ ยถา นาม เกจิ ผลกามา กปิฏฺเฐน
กปิฏฺฐํ โปเถนฺติ อมฺเพน อมฺพํ โปเถนฺติ เอวเมว โข ภนฺเต นาคเสน อจินฺติเยน อจินฺติยํ
โปถยิตฺวา อปเนตพฺพนฺติ ฯ อจินฺติยานํ มหาราช เอกํ อธิมตฺตํ พลวตรํ ฯ ยถา
มหาราช มหิยา ราชาโน โหนฺติ สมชจฺจา สมจฺจานมฺปิ เตสํ เอโก สพฺเพ อภิภวิตฺวา
อาณํ ปวตฺเตติ เอวเมว โข มหาราช เตสํ อจินฺติยานํ กมฺมวิปากํเยว อธิมตฺตํ พลวตรํ
กมฺมวิปากํเยว สพฺเพ อภิภวิย อาณํ ปวตฺเตติ กมฺมาธิคฺคหิตสฺส อวเสสา กิริยา โอกาสํ
น ลภนฺติ ฯ อิธ ปน มหาราช โกจิ ปุริโส กิสฺมิญฺจิเทว กรเณ อปรชฺฌติ น ตสฺส
มาตา วา ปิตา วา ภคินี วา ภาตโร วา สขี วา สหายกา วา ตายนฺติ ฯ
อถ โข ราชาเยว ตตฺถ อภิภวิย อาณํ ปวตฺเตติ กึ ตตฺถ การณํ อปราธิกตฺตา เอวเมว
โข มหาราช เตสํ อจินฺติยานํ กมฺมวิปากํเยว อธิมตฺตํ พลวตรํ กมฺมวิปากํเยว สพฺเพ
อภิภวิย อาณํ ปวตฺเตติ กมฺมาธิคฺคหิตสฺส อวเสสา กิริยา โอกาสํ น ลภนฺติ ฯ ยถา

วา ปน มหาราช มหิยา ทวฑาเห สมุฏฺฐิเต ฆฏสหสฺสมฺป อุทกํ น สกฺโกติ นิพฺพาเปตุํ
อถ โข อคฺคิเยว ตฺถ อภิภวิย อาณํ ปวตฺเตติ กึ ตตฺถ การณํ พลวตฺตา เตชสฺส
เอวเมว โข มหาราช เตสํ อจินฺติยานํ กมฺมวิปากํเยว อธิมตฺตํ พลวตรํ กมฺมวิปากํเยว
สพฺเพ อภิภวิย อาณํ ปวตฺเตติ กมฺมาธิคฺคหิตสฺส อวเสสา กิริยา โอกาสํ น
ลภนฺติ ฯ ตสฺมา มหาราช อายสฺมโต มหาโมคฺคลฺลานสฺส กมฺมาธิคฺคหิตสฺส ลคุเฬหิ
โจเรหิ โปถิยมานสฺส อิทฺธิยา สมนฺนาหาโร นาโหสีติ ฯ สาธุ ภนฺเต นาคเสน เอวเมว
โข ตํ ตถา สมฺปฏิจฺฉามีติ ฯ

อิทฺธิยา กมฺมวิปากพลวตรปญฺโห ปฐโม ฯ


ภนฺเต นาคเสน ภาสิตเมตํ ภควตา ธมฺมตาธมฺมปริยาเย ปุพฺเพว โพธิสตฺตานํ
มาตาปิตโร นิยตา โหนฺติ โพธิ นิยโต โหติ อคฺคสาวกา น ิยตา โหนฺติ ปุติโต นิยโต
โหติ อุปฏฺฐาโก นิยโต โหตีติ ฯ ปุน จ ตุมฺเห ภณถ ตุสิเต กาเย ฐิโต โพธิสตฺโต
อฏฺฐ มหาวิโลกนานิ วิโลเกติ กาลํ วิโลเกติ ทีปํ วิโลเกติ เทสํ วิโลเหติ ชเนตฺตึ วิโลเกติ
กุลํ วิโลเกติ อายุํ วิโลเกติ มาสํ วิโลเกติ เนกฺขมฺมํ วิโลเกตีติ ฯ ภนฺเต นาคเสน
อปริปกฺเก ญาเณ พุชฺฌนํ นตฺถิ ฯ ปรกฺเก ญาเน สกฺกา นิมฺเมสนิตรมฺปิ อาคเมตุํ
กสฺมา โพธิสตฺโต กาลํ วิโลเกติ กมฺหิ กาเล ปุปฺปชฺชามีติ ฯ ยทิ ภนฺเต นาคเสน
ปุพฺเพว โพธิสตฺตสฺส มาตาปิตโร นิยตา เตนหิ กุลํ วิโลเกตีติ ยํ วจนํ ตํ
มิจฺฉา ฯ ยทิ กุลํ วิโลเกติ เตนหิ ปุพฺเพว โพธิสตฺตสฺส มาตาปิตโร นิยตาติ ตมฺปิ
วจนํ มิจฺฉา ฯ อยํปิ อุภโต โกฏิโก ปญฺโห ตวานุปฺปตฺโต โส ตยา
นิพฺพาหิตพฺโพติ ฯ
นิยตา มหาราช ปุพฺเพว โพธิสตฺตสฺส มาตาปิตโร กุลญฺจ โพธิสตฺโต
วิโลเกติ ฯ กินฺติ ปน กุลํ วิโลเกติ เย เม มาตาปิตโร เต ขตฺติยา อุทาหุ พฺราหฺมณาติ
เอวํ กุลํ วิโลเกติ ฯ อฏฺฐนฺนํ มหาราช ปุพฺเพว อนาคตํ โอโลเกตพฺพํ โหติ ฯ กลเมสํ
อฏฺฐนฺนํ ฯ วาณิชสฺส มหาราช ปุพฺเพว วิกยภณฺฑํ โอโลเกตพฺพํ โหติ ฯ หตฺถินาคสฺส
ปุพฺเพว โสณฺฑาย อนาคโต มคฺโค โอโลเกตพฺโพ โหติ ฯ สากฏสฺส ปุพฺเพว อนาคตํ
ติตฺถํ โอโลเกตพฺพํ โหติ ฯ นิยามกสฺส ปุพฺเพว อนาคตํ ตีรํ โอโลเกตฺวา นาวา เปเสตพฺพา
โหติ ฯ ภึสกสฺส ปุพฺเพว อายุํ โอโลเกตฺวา อาตุโร อุปสงฺกมิตพฺโพ โหติ ฯ อุตฺตรเสตุสฺส
ปุพฺเพว ถิราถิรภาวํ ชานิตฺวา อภิรูหิตพฺพํ โหติ ฯ ภิกฺขุสฺส ปุพฺเพว อนาคตํ กาลํ