ตติยวคฺโค

ภนฺเต นาคเสน ภาสิตมฺปิ เจตํ ภควตา
กาเยน สํวโร สาธุ สาธุ วาจาย สํวโร
มนสา สํวโร สาธุ สาธุ สพฺพตฺถ สํวโรติ ฯ
ปุน จ ตถาคโต จตุนฺนํ ปริสานํ มชฺเฌ นิสีทิตฺวา ปุรโต เทวมนุสฺสานํ เสลพฺราหฺมณสฺส
โกโสหิตวตฺถคุยฺหํ ทสฺเสสิ ชิวฺหํ นีหริตฺวา อุโภปิ กณฺณโสตานิ อนุมสิ ปฏิมสิ อุโภปิ
นาสิกโสตานิ เกวลํปิ นลาฏมณฺฑลํ ชิวฺหาย ฉาเทสิ เย สภาวา โลเก อปากฏา อสํวุตา
เต สพฺเพ ฯ ยทิ ภนฺเต นาคเสน ภควตา ภณิตํ กาเยน สํวโร สาธูติ เตนหิ เสลสฺส
พฺราหฺมณสฺส โกโสหิตวตฺถคุยฺหํ ทสฺเสสีติ ยํ วจนํ ตํ มิจฺฉา ฯ ยทิ เสลสฺส พฺราหฺมณสฺส
โกโสหิตวตฺถคุยฺหํ ทสฺเสสิ เตนหิ กาเยน สํวโร สาธูติ ยํ วจนํ ตมฺปิ มิจฺฉา ฯ อยํ
อุภโต โกฏิโก ปญฺโห ตวานุปฺปตฺโต โส ตยา นิพฺพาหิตพฺโพติ ฯ
ภาสิตมฺปิ เจตํ มหาราช ภควตา กาเยน สํวโร สาธูติ ฯ เสลสฺส จ
พฺราหฺมณสฺส โกโสหิตวตฺถคุยฺหํ ทสฺเสสิ ฯ ยสฺส สตฺตสฺส ตถาคเต กงฺขา อุปฺปนฺนา
ตสฺส โพธนตฺถาย ภควา อิทฺธิยา ตปฺปฏิภาคํ กายฉายํ ทสฺเสสิ โสเยว ตํ ปาฏิหาริยํ
ปสฺสตีติ ฯ โก ปเนตํ ภนฺเต นาคเสน สทฺทหิสฺสติ ยํ ปริสํ คโต เอโกเยว ตํ วตฺถคุยฺหํ
ปสฺสติ อวเสสา ตตฺเถว วสนฺตา น ปสฺสิสฺสนฺติ ฯ อิงฺฆ เม ตํ ตตฺถ การณํ อุปทิส
การเณน มํ สญฺญาเปหีติ ฯ ทิฏฺฐปุพฺโพ ปน ตยา มหาราช โกจิ พฺยาธิโก ปุริโส
ปริกิณฺโณ ญาติมิตฺเตหีติ ฯ อาม ภนฺเตติ ฯ อปิ นุ โข มหาราช ปริสา ปสฺสติ
เอตํ เวทนํ ยาย เวทนาย โส ปุริโส เวทยตีติ ฯ น หิ ภนฺเต อตฺตนาเยว โส
ภนฺเต ปุริโส เวทยตีติ ฯ เอวเมว โข มหาราช ยสฺเสว ตถาคเต กงฺขา อุปฺปนฺนา
ตสฺส ตถาคโต โพธนาย อิทฺธิยา ตปฺปฏิภาคํ กายฉายํ ทสฺเสสิ โสเยว ตํ ปาฏิหาริยํ
ปสฺสติ ฯ ยถา วา ปน มหาราช กญฺจิเทว ปุริสํ ภูโต อาวิเสยฺย อปิ นุ โข
สา มหาราช ปสฺสนฺตี ปริสา ตํ ภูตํ อาคจฺฉนฺตนฺติ ฯ น หิ ภนฺเต โสเยว อาตุโร