อนนฺตร-สมนนฺตรปจฺจยา

[254] กุสลํ ธมฺมํ ปจฺจยา กุสโล ธมฺโม อุปฺปชฺชติ อนนฺตรปจฺจยา… สมนนฺตรปจฺจยาฯ

(ยถา อารมฺมณปจฺจยํ, เอวํ วิตฺถาเรตพฺพํฯ)

สหชาตปจฺจโย

[255] กุสลํ ธมฺมํ ปจฺจยา กุสโล ธมฺโม อุปฺปชฺชติ สหชาตปจฺจยา – กุสลํ เอกํ ขนฺธํ ปจฺจยา… ตีณิฯ

อกุสลํ ธมฺมํ ปจฺจยา… ตีณิฯ

อพฺยากตํ ธมฺมํ ปจฺจยา อพฺยากโต ธมฺโม อุปฺปชฺชติ สหชาตปจฺจยา – วิปากาพฺยากตํ กิริยาพฺยากตํ เอกํ ขนฺธํ ปจฺจยา ตโย ขนฺธา จิตฺตสมุฏฺฐานญฺจ รูปํ…เป.… ปฏิสนฺธิกฺขเณ…เป.… เอกํ มหาภูตํ ปจฺจยา…เป.… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ เอกํ มหาภูตํ ปจฺจยา…เป.… มหาภูเต ปจฺจยา กฏตฺตารูปํ อุปาทารูปํ, จกฺขายตนํ ปจฺจยา จกฺขุวิญฺญาณํ…เป.… กายายตนํ ปจฺจยา กายวิญฺญาณํ, วตฺถุํ ปจฺจยา วิปากาพฺยากตา กิริยาพฺยากตา ขนฺธาฯ

อพฺยากตํ ธมฺมํ ปจฺจยา กุสโล ธมฺโม อุปฺปชฺชติ สหชาตปจฺจยา – วตฺถุํ ปจฺจยา กุสลา ขนฺธาฯ

(ยถา เหตุปจฺจยํ, เอวํ วิตฺถาเรตพฺพํฯ)

อญฺญมญฺญปจฺจโย

[256] กุสลํ ธมฺมํ ปจฺจยา กุสโล ธมฺโม อุปฺปชฺชติ อญฺญมญฺญปจฺจยา… เอกํฯ

อกุสลํ ธมฺมํ ปจฺจยา อกุสโล ธมฺโม อุปฺปชฺชติ อญฺญมญฺญปจฺจยา… เอกํฯ