อสํกิลิฏฺฐอสํกิเลสิโก ธมฺโม อสํกิลิฏฺฐสํกิเลสิกสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติฯ อารมฺมณาธิปติ – อริยา มคฺคา วุฏฺฐหิตฺวา มคฺคํ ครุํ กตฺวา ปจฺจเวกฺขนฺติ, ผลํ ครุํ กตฺวา ปจฺจเวกฺขนฺติ, นิพฺพานํ ครุํ กตฺวา ปจฺจเวกฺขนฺติ, นิพฺพานํ โคตฺรภุสฺส, โวทานสฺส อธิปติปจฺจเยน ปจฺจโยฯ สหชาตาธิปติ – อสํกิลิฏฺฐอสํกิเลสิกาธิปติ จิตฺตสมุฏฺฐานานํ รูปานํ อธิปติปจฺจเยน ปจฺจโยฯ (2)

อสํกิลิฏฺฐอสํกิเลสิโก ธมฺโม อสํกิลิฏฺฐสํกิเลสิกสฺส จ อสํกิลิฏฺฐอสํกิเลสิกสฺส จ ธมฺมสฺส อธิปติปจฺจเยน ปจฺจโย ฯ สหชาตาธิปติ – อสํกิลิฏฺฐอสํกิเลสิกาธิปติ สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ อธิปติปจฺจเยน ปจฺจโยฯ (3)

อนนฺตรปจฺจโย

[13] สํกิลิฏฺฐสํกิเลสิโก ธมฺโม สํกิลิฏฺฐสํกิเลสิกสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา สํกิลิฏฺฐสํกิเลสิกา ขนฺธา ปจฺฉิมานํ ปจฺฉิมานํ สํกิลิฏฺฐสํกิเลสิกานํ ขนฺธานํ อนนฺตรปจฺจเยน ปจฺจโยฯ (1)

สํกิลิฏฺฐสํกิเลสิโก ธมฺโม อสํกิลิฏฺฐสํกิเลสิกสฺส ธมฺมสฺส อนนฺตรปจฺจเยน ปจฺจโย – สํกิลิฏฺฐสํกิเลสิกา ขนฺธา วุฏฺฐานสฺส อนนฺตรปจฺจเยน ปจฺจโยฯ (2)

อสํกิลิฏฺฐสํกิเลสิโก ธมฺโม อสํกิลิฏฺฐสํกิเลสิกสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา อสํกิลิฏฺฐสํกิเลสิกา ขนฺธา ปจฺฉิมานํ ปจฺฉิมานํ อสํกิลิฏฺฐสํกิเลสิกานํ ขนฺธานํ อนนฺตรปจฺจเยน ปจฺจโยฯ อนุโลมํ โคตฺรภุสฺส… อนุโลมํ โวทานสฺส… อาวชฺชนา อสํกิลิฏฺฐสํกิเลสิกานํ ขนฺธานํ อนนฺตรปจฺจเยน ปจฺจโยฯ (1)

อสํกิลิฏฺฐสํกิเลสิโก ธมฺโม สํกิลิฏฺฐสํกิเลสิกสฺส ธมฺมสฺส อนนฺตรปจฺจเยน ปจฺจโย – อาวชฺชนา สํกิลิฏฺฐสํกิเลสิกานํ ขนฺธานํ อนนฺตรปจฺจเยน ปจฺจโยฯ (2)