สุทฺธํ

[5] นเหตุยา ทฺเว, นอารมฺมเณ ปญฺจ, นอธิปติยา ฉ, นอนนฺตเร ปญฺจ…เป.… นอุปนิสฺสเย ปญฺจ, นปุเรชาเต สตฺต, นปจฺฉาชาเต นว, นอาเสวเน นว, นกมฺเม ตีณิ, นวิปาเก นว, นอาหาเร เอกํ…เป.… นมคฺเค เอกํ, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจฯ (สํขิตฺตํฯ)

3. ปจฺจยานุโลมปจฺจนียํ

เหตุทุกํ

[6] เหตุปจฺจยา นอารมฺมเณ ปญฺจ, นอธิปติยา ฉ…เป.… นปุเรชาเต สตฺต, นปจฺฉาชาเต นว, นอาเสวเน นว, นกมฺเม ตีณิ, นวิปาเก นว, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจฯ (สํขิตฺตํฯ)

4. ปจฺจยปจฺจนียานุโลมํ

นเหตุทุกํ

[7] นเหตุปจฺจยา อารมฺมเณ ทฺเว…เป.… วิปาเก เอกํ…เป.… มคฺเค เอกํ…เป.… อวิคเต ทฺเวฯ (สํขิตฺตํฯ)

ปฏิจฺจวาโรฯ

2-6 สหชาต-ปจฺจย-นิสฺสย-สํสฏฺฐ-สมฺปยุตฺตวาโร

(สหชาตวาโรปิ ปจฺจยวาโรปิ นิสฺสยวาโรปิ สํสฏฺฐวาโรปิ สมฺปยุตฺตวาโรปิ วิตฺถาเรตพฺโพฯ)

7. ปญฺหาวาโร

1. ปจฺจยานุโลมํ

1. วิภงฺควาโร

เหตุปจฺจโย

[8] สํกิลิฏฺฐสํกิเลสิโก ธมฺโม สํกิลิฏฺฐสํกิเลสิกสฺส ธมฺมสฺส เหตุปจฺจเยน ปจฺจโย – สํกิลิฏฺฐสํกิเลสิกา เหตู สมฺปยุตฺตกานํ ขนฺธานํ เหตุปจฺจเยน ปจฺจโยฯ (1)

สํกิลิฏฺฐสํกิเลสิโก ธมฺโม อสํกิลิฏฺฐสํกิเลสิกสฺส ธมฺมสฺส เหตุปจฺจเยน ปจฺจโย – สํกิลิฏฺฐสํกิเลสิกา เหตู จิตฺตสมุฏฺฐานานํ รูปานํ เหตุปจฺจเยน ปจฺจโยฯ (2)

สํกิลิฏฺฐสํกิเลสิโก ธมฺโม สํกิลิฏฺฐสํกิเลสิกสฺส จ อสํกิลิฏฺฐสํกิเลสิกสฺส จ ธมฺมสฺส เหตุปจฺจเยน ปจฺจโย – สํกิลิฏฺฐสํกิเลสิกา เหตู สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ เหตุปจฺจเยน ปจฺจโยฯ (3)

อสํกิลิฏฺฐสํกิเลสิโก ธมฺโม อสํกิลิฏฺฐสํกิเลสิกสฺส ธมฺมสฺส เหตุปจฺจเยน ปจฺจโย – อสํกิลิฏฺฐสํกิเลสิกา เหตู สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ เหตุปจฺจเยน ปจฺจโย; ปฏิสนฺธิกฺขเณ อสํกิลิฏฺฐสํกิเลสิกา เหตู สมฺปยุตฺตกานํ ขนฺธานํ กฏตฺตา จ รูปานํ เหตุปจฺจเยน ปจฺจโยฯ (1)

อสํกิลิฏฺฐอสํกิเลสิโก ธมฺโม อสํกิลิฏฺฐอสํกิเลสิกสฺส ธมฺมสฺส เหตุปจฺจเยน ปจฺจโย – อสํกิลิฏฺฐอสํกิเลสิกา เหตู สมฺปยุตฺตกานํ ขนฺธานํ เหตุปจฺจเยน ปจฺจโยฯ (1)

อสํกิลิฏฺฐอสํกิเลสิโก ธมฺโม อสํกิลิฏฺฐสํกิเลสิกสฺส ธมฺมสฺส เหตุปจฺจเยน ปจฺจโย – อสํกิลิฏฺฐอสํกิเลสิกา เหตู จิตฺตสมุฏฺฐานานํ รูปานํ เหตุปจฺจเยน ปจฺจโยฯ (2)

อสํกิลิฏฺฐอสํกิเลสิโก ธมฺโม อสํกิลิฏฺฐสํกิเลสิกสฺส จ อสํกิลิฏฺฐอสํกิเลสิกสฺส จ ธมฺมสฺส เหตุปจฺจเยน ปจฺจโย – อสํกิลิฏฺฐอสํกิเลสิกา เหตู สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ เหตุปจฺจเยน ปจฺจโยฯ (3)

อารมฺมณปจฺจโย

[9] สํกิลิฏฺฐสํกิเลสิโก ธมฺโม สํกิลิฏฺฐสํกิเลสิกสฺส ธมฺมสฺส อารมฺมณปจฺจเยน ปจฺจโย – ราคํ อสฺสาเทติ อภินนฺทติ, ตํ อารพฺภ ราโค อุปฺปชฺชติ, ทิฏฺฐิ อุปฺปชฺชติ, วิจิกิจฺฉา อุปฺปชฺชติ, อุทฺธจฺจํ อุปฺปชฺชติ, โทมนสฺสํ อุปฺปชฺชติ ฯ ทิฏฺฐิํ อสฺสาเทติ…เป.… วิจิกิจฺฉํ อารพฺภ…เป.… อุทฺธจฺจํ อารพฺภ…เป.… โทมนสฺสํ อารพฺภ…เป.…ฯ (1)

(ยถา กุสลตฺติเก วิภตฺตํ, เอวํ วิภชิตพฺพํฯ)

สํกิลิฏฺฐสํกิเลสิโก ธมฺโม อสํกิลิฏฺฐสํกิเลสิกสฺส ธมฺมสฺส อารมฺมณปจฺจเยน ปจฺจโย – อริยา ปหีเน กิเลเส ปจฺจเวกฺขนฺติ, วิกฺขมฺภิเต กิเลเส ปจฺจเวกฺขนฺติ, ปุพฺเพ สมุทาจิณฺเณ กิเลเส ชานนฺติ, สํกิลิฏฺฐสํกิเลสิเก ขนฺเธ อนิจฺจโต ทุกฺขโต อนตฺตโต วิปสฺสนฺติ, เจโตปริยญาเณน สํกิลิฏฺฐสํกิเลสิกจิตฺตสมงฺคิสฺส จิตฺตํ ชานนฺติ; เสกฺขา วา ปุถุชฺชนา วา สํกิลิฏฺฐสํกิเลสิเก ขนฺเธ อนิจฺจโต ทุกฺขโต อนตฺตโต วิปสฺสนฺติ, กุสเล นิรุทฺเธ วิปาโก ตทารมฺมณตา อุปฺปชฺชติ; สํกิลิฏฺฐสํกิเลสิเก ขนฺเธ อสฺสาเทนฺติ อภินนฺทนฺติ…เป.… โทมนสฺสํ อุปฺปชฺชติ, อกุสเล นิรุทฺเธ วิปาโก ตทารมฺมณตา อุปฺปชฺชติฯ สํกิลิฏฺฐสํกิเลสิกา ขนฺธา เจโตปริยญาณสฺส, ปุพฺเพนิวาสานุสฺสติญาณสฺส, ยถากมฺมูปคญาณสฺส, อนาคตํสญาณสฺส, อาวชฺชนาย อารมฺมณปจฺจเยน ปจฺจโยฯ (2)

[10] อสํกิลิฏฺฐสํกิเลสิโก ธมฺโม อสํกิลิฏฺฐสํกิเลสิกสฺส ธมฺมสฺส อารมฺมณปจฺจเยน ปจฺจโย – ทานํ ทตฺวา, สีลํ สมาทิยิตฺวา , อุโปสถกมฺมํ กตฺวา ตํ ปจฺจเวกฺขติ, ปุพฺเพ สุจิณฺณานิ ปจฺจเวกฺขติ; ฌานา วุฏฺฐหิตฺวา ฌานํ ปจฺจเวกฺขติ, อริยา โคตฺรภุํ ปจฺจเวกฺขนฺติ, โวทานํ ปจฺจเวกฺขนฺติ, จกฺขุํ อนิจฺจโต ทุกฺขโต อนตฺตโต วิปสฺสนฺติ ; โสตํ… ฆานํ… ชิวฺหํ… กายํ… รูเป… สทฺเท… คนฺเธ… รเส… โผฏฺฐพฺเพ… วตฺถุํ อสํกิลิฏฺฐสํกิเลสิเก ขนฺเธ อนิจฺจโต ทุกฺขโต อนตฺตโต วิปสฺสนฺติ; ทิพฺเพน จกฺขุนา รูปํ ปสฺสนฺติ, ทิพฺพาย โสตธาตุยา สทฺทํ สุณนฺติ, เจโตปริยญาเณน อสํกิลิฏฺฐสํกิเลสิกจิตฺตสมงฺคิสฺส จิตฺตํ ชานนฺติฯ อากาสานญฺจายตนํ วิญฺญาณญฺจายตนสฺส…เป.… อากิญฺจญฺญายตนํ เนวสญฺญานาสญฺญายตนสฺส อารมฺมณปจฺจเยน ปจฺจโยฯ รูปายตนํ จกฺขุวิญฺญาณสฺส อารมฺมณปจฺจเยน ปจฺจโย…เป.… โผฏฺฐพฺพายตนํ กายวิญฺญาณสฺส อารมฺมณปจฺจเยน ปจฺจโยฯ