เหตุปจฺจโย

[1] สํกิลิฏฺฐสํกิเลสิกํ ธมฺมํ ปฏิจฺจ สํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – สํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ ปฏิจฺจ ทฺเว ขนฺธาฯ (1)

สํกิลิฏฺฐสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – สํกิลิฏฺฐสํกิเลสิเก ขนฺเธ ปฏิจฺจ จิตฺตสมุฏฺฐานํ รูปํฯ (2)

สํกิลิฏฺฐสํกิเลสิกํ ธมฺมํ ปฏิจฺจ สํกิลิฏฺฐสํกิเลสิโก จ อสํกิลิฏฺฐสํกิเลสิโก จ ธมฺมา อุปฺปชฺชนฺติ เหตุปจฺจยา – สํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ ปฏิจฺจ ทฺเว ขนฺธา จิตฺตสมุฏฺฐานญฺจ รูปํฯ (3)

อสํกิลิฏฺฐสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – อสํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ ปฏิจฺจ ทฺเว ขนฺธา จิตฺตสมุฏฺฐานญฺจ รูปํ ; ปฏิสนฺธิกฺขเณ อสํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา กฏตฺตา จ รูปํ…เป.… ทฺเว ขนฺเธ ปฏิจฺจ ทฺเว ขนฺธา กฏตฺตา จ รูปํ; ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา; เอกํ มหาภูตํ ปฏิจฺจ ตโย มหาภูตา…เป.… มหาภูเต ปฏิจฺจ จิตฺตสมุฏฺฐานํ รูปํ กฏตฺตารูปํ อุปาทารูปํฯ (1)

[2] อสํกิลิฏฺฐอสํกิเลสิกํ ธมฺมํ ปฏิจฺจ อสํกิลิฏฺฐอสํกิเลสิโก ธมฺโม อุปฺปชฺชติ เหตุปจฺจยา – อสํกิลิฏฺฐอสํกิเลสิกํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ ปฏิจฺจ ทฺเว ขนฺธาฯ (1)

อสํกิลิฏฺฐอสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – อสํกิลิฏฺฐอสํกิเลสิเก ขนฺเธ ปฏิจฺจ จิตฺตสมุฏฺฐานํ รูปํฯ (2)

อสํกิลิฏฺฐอสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก จ อสํกิลิฏฺฐอสํกิเลสิโก จ ธมฺมา อุปฺปชฺชนฺติ เหตุปจฺจยา – อสํกิลิฏฺฐอสํกิเลสิกํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ ปฏิจฺจ ทฺเว ขนฺธา จิตฺตสมุฏฺฐานญฺจ รูปํฯ (3)

อสํกิลิฏฺฐสํกิเลสิกญฺจ อสํกิลิฏฺฐอสํกิเลสิกญฺจ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – อสํกิลิฏฺฐอสํกิเลสิเก ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํฯ (1)

สํกิลิฏฺฐสํกิเลสิกญฺจ อสํกิลิฏฺฐสํกิเลสิกญฺจ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ เหตุปจฺจยา – สํกิลิฏฺฐสํกิเลสิเก ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ (สํขิตฺตํ)ฯ (1)

1. ปจฺจยานุโลมํ

2. สงฺขฺยาวาโร

[3] เหตุยา นว, อารมฺมเณ ตีณิ, อธิปติยา นว, อนนฺตเร ตีณิ, สมนนฺตเร ตีณิ, สหชาเต นว, อญฺญมญฺเญ ตีณิ, นิสฺสเย นว, อุปนิสฺสเย ตีณิ, ปุเรชาเต ตีณิ, อาเสวเน ตีณิ, กมฺเม นว, วิปาเก ปญฺจ, อาหาเร นว…เป.… มคฺเค นว, สมฺปยุตฺเต ตีณิ, วิปฺปยุตฺเต นว…เป.… อวิคเต นว (สํขิตฺตํฯ)

(ยถา กุสลตฺติเก วิภตฺตํ, เอวํ วิภชิตพฺพํฯ)

2. ปจฺจยปจฺจนียํ

นเหตุปจฺจโย

[4] สํกิลิฏฺฐสํกิเลสิกํ ธมฺมํ ปฏิจฺจ สํกิลิฏฺฐสํกิเลสิโก ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ ปฏิจฺจ วิจิกิจฺฉาสหคโต อุทฺธจฺจสหคโต โมโหฯ (1)

อสํกิลิฏฺฐสํกิเลสิกํ ธมฺมํ ปฏิจฺจ อสํกิลิฏฺฐสํกิเลสิโก ธมฺโม อุปฺปชฺชติ นเหตุปจฺจยา – อเหตุกํ อสํกิลิฏฺฐสํกิเลสิกํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… อเหตุกปฏิสนฺธิกฺขเณ…เป.… อสญฺญสตฺตานํ เอกํ มหาภูตํฯ (สํขิตฺตํฯ) (1)

(ยถา กุสลตฺติเก วิภตฺตํ, เอวํ วิภชิตพฺพํฯ)