อนุปาทินฺนุปาทานิยํ ธมฺมํ ปจฺจยา… เอกาฯ

อนุปาทินฺนอนุปาทานิยํ ธมฺมํ ปจฺจยา… ตีณิฯ

อุปาทินฺนุปาทานิยญฺจ อนุปาทินฺนอนุปาทานิยญฺจ ธมฺมํ ปจฺจยา อนุปาทินฺนอนุปาทานิโย ธมฺโม อุปฺปชฺชติ นวิปากปจฺจยาฯ (สํขิตฺตํฯ)

อนุปาทินฺนุปาทานิยญฺจ อนุปาทินฺนอนุปาทานิยญฺจ ธมฺมํ ปจฺจยา อนุปาทินฺนุปาทานิโย ธมฺโม อุปฺปชฺชติ นวิปากปจฺจยาฯ (สํขิตฺตํฯ)

อุปาทินฺนุปาทานิยญฺจ อนุปาทินฺนุปาทานิยญฺจ ธมฺมํ ปจฺจยา อนุปาทินฺนุปาทานิโย ธมฺโม อุปฺปชฺชติ นวิปากปจฺจยา – อนุปาทินฺนุปาทานิยํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป.… ทฺเว ขนฺเธ จ วตฺถุญฺจ ปจฺจยา ทฺเว ขนฺธาฯ

นอาหารปจฺจยาทิ

[42] อุปาทินฺนุปาทานิยํ ธมฺมํ ปจฺจยา อุปาทินฺนุปาทานิโย ธมฺโม อุปฺปชฺชติ นอาหารปจฺจยา… นอินฺทฺริยปจฺจยา… นฌานปจฺจยา… นมคฺคปจฺจยา… นสมฺปยุตฺตปจฺจยา… นวิปฺปยุตฺตปจฺจยา… โนนตฺถิปจฺจยา… โนวิคตปจฺจยา (สํขิตฺตํ)ฯ

2. ปจฺจยปจฺจนียํ

2. สงฺขฺยาวาโร

[43] นเหตุยา ปญฺจ, นอารมฺมเณ ฉ, นอธิปติยา อฏฺฐ, นอนนฺตเร ฉ, นสมนนฺตเร ฉ, นอญฺญมญฺเญ ฉ, นอุปนิสฺสเย ฉ, นปุเรชาเต สตฺต, นปจฺฉาชาเต เอกาทส, นอาเสวเน เอกาทส , นกมฺเม ฉ, นวิปาเก ทส, นอาหาเร ทฺเว, นอินฺทฺริเย ทฺเว, นฌาเน ทฺเว, นมคฺเค ปญฺจ, น สมฺปยุตฺเต ฉ, นวิปฺปยุตฺเต ตีณิ, โนนตฺถิยา ฉ, โนวิคเต ฉ (วิตฺถาเรน คเณตพฺพํ)ฯ

3. ปจฺจยานุโลมปจฺจนียํ

[44] เหตุปจฺจยา นอารมฺมเณ ฉ…เป.… โนวิคเต ฉฯ (วิตฺถาเรน คเณตพฺพํฯ)

4. ปจฺจยปจฺจนียานุโลมํ

[45] นเหตุปจฺจยา อารมฺมเณ จตฺตาริ…เป.… อวิคเต ปญฺจฯ

ปจฺจยวาโรฯ

4. นิสฺสยวาโร

[46] อุปาทินฺนุปาทานิยํ ธมฺมํ นิสฺสาย อุปาทินฺนุปาทานิโย ธมฺโม อุปฺปชฺชติ เหตุปจฺจยา – อุปาทินฺนุปาทานิยํ เอกํ ขนฺธํ นิสฺสาย ตโย ขนฺธา, ตโย ขนฺเธ นิสฺสาย… (สํขิตฺตํ)ฯ (ปจฺจยวาโรปิ นิสฺสยวาโรปิ สทิโส)ฯ

นิสฺสยวาโรฯ

5. สํสฏฺฐวาโร

1. ปจฺจยานุโลมํ

เหตุปจฺจโย

[47] อุปาทินฺนุปาทานิยํ ธมฺมํ สํสฏฺโฐ อุปาทินฺนุปาทานิโย ธมฺโม อุปฺปชฺชติ เหตุปจฺจยา – อุปาทินฺนุปาทานิยํ เอกํ ขนฺธํ สํสฏฺฐา ตโย ขนฺธา, ตโย ขนฺเธ สํสฏฺโฐ เอโก ขนฺโธ, ทฺเว ขนฺเธ สํสฏฺฐา ทฺเว ขนฺธา, ปฏิสนฺธิกฺขเณ อุปาทินฺนุปาทานิยํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ สํสฏฺฐา ทฺเว ขนฺธาฯ (1)

อนุปาทินฺนุปาทานิยํ ธมฺมํ สํสฏฺโฐ อนุปาทินฺนุปาทานิโย ธมฺโม อุปฺปชฺชติ เหตุปจฺจยา – อนุปาทินฺนุปาทานิยํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ สํสฏฺฐา ทฺเว ขนฺธาฯ (1)

อนุปาทินฺนอนุปาทานิยํ ธมฺมํ สํสฏฺโฐ อนุปาทินฺนอนุปาทานิโย ธมฺโม อุปฺปชฺชติ เหตุปจฺจยา – อนุปาทินฺนอนุปาทานิยํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ สํสฏฺฐา ทฺเว ขนฺธาฯ (1) (สํขิตฺตํฯ)

สงฺขฺยาวาโร

[48] เหตุยา ตีณิ…เป.… อธิปติยา ทฺเว…เป.… อาเสวเน ทฺเว…เป.… วิปาเก ทฺเว…เป.… อวิคเต ตีณิฯ

(ยถา กุสลตฺติเก คณนา, เอวํ คเณตพฺพาฯ)

อนุโลมํฯ

2. ปจฺจยปจฺจนียํ