อนนฺตรปจฺจยาทิ

[4] อุปาทินฺนุปาทานิยํ ธมฺมํ ปฏิจฺจ อุปาทินฺนุปาทานิโย ธมฺโม อุปฺปชฺชติ อนนฺตรปจฺจยา… สมนนฺตรปจฺจยา… สหชาตปจฺจยา – อุปาทินฺนุปาทานิยํ เอกํ ขนฺธํ ปฏิจฺจ…เป.… ปฏิสนฺธิกฺขเณ…เป.… เอกํ มหาภูตํ ปฏิจฺจ…เป.… มหาภูเต ปฏิจฺจ กฏตฺตารูปํ อุปาทารูปํ; อสญฺญสตฺตานํ เอกํ มหาภูตํ ปฏิจฺจ…เป.… มหาภูเต ปฏิจฺจ กฏตฺตารูปํ อุปาทารูปํ ฯ

อุปาทินฺนุปาทานิยํ ธมฺมํ ปฏิจฺจ… ตีณิฯ

อนุปาทินฺนุปาทานิยํ ธมฺมํ ปฏิจฺจ อนุปาทินฺนุปาทานิโย ธมฺโม อุปฺปชฺชติ สหชาตปจฺจยา – อนุปาทินฺนุปาทานิยํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ …เป.… เอกํ มหาภูตํ ปฏิจฺจ…เป.… มหาภูเต ปฏิจฺจ จิตฺตสมุฏฺฐานํ รูปํ อุปาทารูปํฯ พาหิรํ… อาหารสมุฏฺฐานํ… อุตุสมุฏฺฐานํ เอกํ มหาภูตํ ปฏิจฺจ…เป.…ฯ

อนุปาทินฺนอนุปาทานิยํ ธมฺมํ ปฏิจฺจ… ตีณิฯ

อนุปาทินฺนุปาทานิยญฺจ อนุปาทินฺนอนุปาทานิยญฺจ ธมฺมํ ปฏิจฺจ…เป.… อนุปาทินฺนุปาทานิโย…เป.…ฯ (1)

อุปาทินฺนุปาทานิยญฺจ อนุปาทินฺนุปาทานิยญฺจ ธมฺมํ ปฏิจฺจ อนุปาทินฺนุปาทานิโย…เป.…ฯ (1)

อญฺญมญฺญปจฺจโย

[5] อุปาทินฺนุปาทานิยํ ธมฺมํ ปฏิจฺจ อุปาทินฺนุปาทานิโย ธมฺโม อุปฺปชฺชติ อญฺญมญฺญปจฺจยา – อุปาทินฺนุปาทานิยํ เอกํ ขนฺธํ ปฏิจฺจ…เป.… ปฏิสนฺธิกฺขเณ อุปาทินฺนุปาทานิยํ เอกํ ขนฺธํ ปฏิจฺจ ตโย ขนฺธา วตฺถุ จ…เป.… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา; เอกํ มหาภูตํ ปฏิจฺจ…เป.… ทฺเว มหาภูเต ปฏิจฺจ ทฺเว มหาภูตา; อสญฺญสตฺตานํ เอกํ มหาภูตํ…เป.…ฯ (1)

อนุปาทินฺนุปาทานิยํ ธมฺมํ ปฏิจฺจ…เป.… พาหิรํ… อาหารสมุฏฺฐานํ… อุตุสมุฏฺฐานํ…เป.…ฯ (1)

อนุปาทินฺนอนุปาทานิยํ ธมฺมํ ปฏิจฺจ…เป.…ฯ (1)

นิสฺสย-อุปนิสฺสยปจฺจยา

[6] อุปาทินฺนุปาทานิยํ ธมฺมํ ปฏิจฺจ นิสฺสยปจฺจยา… นวฯ อุปนิสฺสยปจฺจยา… ตีณิฯ