เนววิปากนวิปากธมฺมธมฺโม วิปากสฺส ธมฺมสฺส อญฺญมญฺญปจฺจเยน ปจฺจโย – ปฏิสนฺธิกฺขเณ วตฺถุ วิปากานํ ขนฺธานํ…เป.…ฯ (2)

วิปาโก จ เนววิปากนวิปากธมฺมธมฺโม จ ธมฺมา วิปากสฺส ธมฺมสฺส…เป.… ปฏิสนฺธิกฺขเณ วิปาโก เอโก ขนฺโธ จ วตฺถุ จ…เป.…ฯ (1) (สตฺต ปญฺหา)ฯ

นิสฺสยปจฺจโย

[101] วิปาโก ธมฺโม วิปากสฺส ธมฺมสฺส นิสฺสยปจฺจเยน ปจฺจโย… ตีณิฯ วิปากธมฺมธมฺโม วิปากธมฺมธมฺมสฺส… ตีณิฯ

เนววิปากนวิปากธมฺมธมฺโม เนววิปากนวิปากธมฺมธมฺมสฺส…เป.…ฯ (1)

เนววิปากนวิปากธมฺมธมฺโม วิปากสฺส ธมฺมสฺส…เป.… จกฺขายตนํ จกฺขุวิญฺญาณสฺส นิสฺสยปจฺจเยน ปจฺจโย…เป.… กายายตนํ กายวิญฺญาณสฺส, วตฺถุ วิปากานํ ขนฺธานํ…เป.… ปฏิสนฺธิกฺขเณ วตฺถุ วิปากานํ ขนฺธานํ…เป.…ฯ (2)

เนววิปากนวิปากธมฺมธมฺโม วิปากธมฺมธมฺมสฺส นิสฺสยปจฺจเยน ปจฺจโย – วตฺถุ วิปากธมฺมธมฺมานํ ขนฺธานํ…เป.…ฯ (3)

วิปาโก จ เนววิปากนวิปากธมฺมธมฺโม จ ธมฺมา วิปากสฺส ธมฺมสฺส นิสฺสยปจฺจเยน ปจฺจโย – จกฺขุวิญฺญาณสหคโต เอโก ขนฺโธ จ จกฺขายตนญฺจ…เป.… กายวิญฺญาณสหคโต เอโก ขนฺโธ จ กายายตนญฺจ…เป.… วิปาโก เอโก ขนฺโธ จ วตฺถุ จ ติณฺณนฺนํ ขนฺธานํ… ปฏิสนฺธิกฺขเณ วิปาโก เอโก ขนฺโธ จ วตฺถุ จ…เป.…ฯ (1)

วิปาโก จ เนววิปากนวิปากธมฺมธมฺโม จ ธมฺมา เนววิปากนวิปากธมฺมธมฺมสฺส…เป.… วิปากา ขนฺธา จ มหาภูตา จ…เป.… (สํขิตฺตํ) ปฏิสนฺธิกฺขเณ…เป.…ฯ (2)

วิปากธมฺมธมฺโม จ เนววิปากนวิปากธมฺมธมฺโม จ ธมฺมา วิปากธมฺมธมฺมสฺส นิสฺสยปจฺจเยน ปจฺจโย – วิปากธมฺมธมฺโม เอโก ขนฺโธ จ วตฺถุ จ…เป.…ฯ (1)

วิปากธมฺมธมฺโม จ เนววิปากนวิปากธมฺมธมฺโม จ ธมฺมา เนววิปากนวิปากธมฺมธมฺมสฺส นิสฺสยปจฺจเยน ปจฺจโย – วิปากธมฺมธมฺมา ขนฺธา จ มหาภูตา จ จิตฺตสมุฏฺฐานานํ รูปานํ…ฯ (2) (เตรส ปญฺหา)ฯ