เมนู

อนนฺตรปจฺจยาทิ

[13] วิปากํ ธมฺมํ ปฏิจฺจ วิปาโก ธมฺโม อุปฺปชฺชติ อนนฺตรปจฺจยา… สมนนฺตรปจฺจยา… (อารมฺมณปจฺจยสทิสํ) สหชาตปจฺจยา… (สหชาตํ สพฺพํ เหตุปจฺจยสทิสํ)ฯ

เนววิปากนวิปากธมฺมธมฺมํ ปฏิจฺจ เนววิปากนวิปากธมฺมธมฺโม อุปฺปชฺชติ สหชาตปจฺจยา…เป.… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ (สหชาเต อิทํ นานากรณํ)ฯ

อญฺญมญฺญปจฺจโย

[14] วิปากํ ธมฺมํ ปฏิจฺจ วิปาโก ธมฺโม อุปฺปชฺชติ อญฺญมญฺญปจฺจยา – วิปากํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ ปฏิจฺจ ทฺเว ขนฺธา; ปฏิสนฺธิกฺขเณ วิปากํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ ปฏิจฺจ ทฺเว ขนฺธาฯ (1)

วิปากํ ธมฺมํ ปฏิจฺจ เนววิปากนวิปากธมฺมธมฺโม อุปฺปชฺชติ อญฺญมญฺญปจฺจยา – ปฏิสนฺธิกฺขเณ วิปาเก ขนฺเธ ปฏิจฺจ วตฺถุฯ (2)

วิปากํ ธมฺมํ ปฏิจฺจ วิปาโก จ เนววิปากนวิปากธมฺมธมฺโม จ ธมฺมา อุปฺปชฺชนฺติ อญฺญมญฺญปจฺจยา – ปฏิสนฺธิกฺขเณ วิปากํ เอกํ ขนฺธํ ปฏิจฺจ ตโย ขนฺธา วตฺถุ จ…เป.… ทฺเว ขนฺเธ ปฏิจฺจ ทฺเว ขนฺธา วตฺถุ จฯ (3)

วิปากธมฺมธมฺมํ ปฏิจฺจ วิปากธมฺมธมฺโม อุปฺปชฺชติ อญฺญมญฺญปจฺจยา – วิปากธมฺมธมฺมํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ ปฏิจฺจ ทฺเว ขนฺธาฯ (1)

[15] เนววิปากนวิปากธมฺมธมฺมํ ปฏิจฺจ เนววิปากนวิปากธมฺมธมฺโม อุปฺปชฺชติ อญฺญมญฺญปจฺจยา – เนววิปากนวิปากธมฺมธมฺมํ เอกํ ขนฺธํ ปฏิจฺจ ตโย ขนฺธา…เป.… เอกํ มหาภูตํ…เป.… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ เอกํ มหาภูตํ…เป.…ฯ (1)

เนววิปากนวิปากธมฺมธมฺมํ ปฏิจฺจ วิปาโก ธมฺโม อุปฺปชฺชติ อญฺญมญฺญปจฺจยา – ปฏิสนฺธิกฺขเณ วตฺถุํ ปฏิจฺจ วิปากา ขนฺธาฯ (2)

วิปากญฺจ เนววิปากนวิปากธมฺมธมฺมญฺจ ธมฺมํ ปฏิจฺจ วิปาโก ธมฺโม อุปฺปชฺชติ อญฺญมญฺญปจฺจยา – ปฏิสนฺธิกฺขเณ วิปากํ เอกํ ขนฺธญฺจ วตฺถุญฺจ ปฏิจฺจ ตโย ขนฺธา…เป.… ทฺเว ขนฺเธ จ วตฺถุญฺจ ปฏิจฺจ ทฺเว ขนฺธาฯ (1)