ปกตูปนิสฺสโย – กายิกํ สุขํ อุปนิสฺสาย ปาณํ หนติ, อทินฺนํ อาทิยติ, มุสา ภณติ, ปิสุณํ ภณติ, ผรุสํ ภณติ, สมฺผํ ปลปติ, สนฺธิํ ฉินฺทติ, นิลฺโลปํ หรติ, เอกาคาริกํ กโรติ, ปริปนฺเถ ติฏฺฐติ, ปรทารํ คจฺฉติ, คามฆาตํ กโรติ, นิคมฆาตํ กโรติ, มาตรํ ชีวิตา โวโรเปติ, ปิตรํ ชีวิตา โวโรเปติ, อรหนฺตํ ชีวิตา โวโรเปติ, ทุฏฺเฐน จิตฺเตน ตถาคตสฺส โลหิตํ อุปฺปาเทติ, สงฺฆํ ภินฺทติฯ

กายิกํ ทุกฺขํ…เป.… อุตุํ…เป.… โภชนํ…เป.… เสนาสนํ อุปนิสฺสาย ปาณํ หนติ… (สํขิตฺตํฯ) สงฺฆํ ภินฺทติฯ

กายิกํ สุขํ… กายิกํ ทุกฺขํ… อุตุ… โภชนํ… เสนาสนํ ราคสฺส… โทสสฺส… โมหสฺส… มานสฺส… ทิฏฺฐิยา… ปตฺถนาย อุปนิสฺสยปจฺจเยน ปจฺจโยฯ (3)

ปุเรชาตปจฺจโย

[424] อพฺยากโต ธมฺโม อพฺยากตสฺส ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํฯ

อารมฺมณปุเรชาตํ – อรหา จกฺขุํ อนิจฺจโต ทุกฺขโต อนตฺตโต วิปสฺสติฯ โสตํ…เป.… ฆานํ…เป.… ชิวฺหํ…เป.… กายํ…เป.… รูเป…เป.… สทฺเท…เป.… คนฺเธ…เป.… รเส…เป.… โผฏฺฐพฺเพ…เป.… วตฺถุํ อนิจฺจโต ทุกฺขโต อนตฺตโต วิปสฺสติ, ทิพฺเพน จกฺขุนา รูปํ ปสฺสติ, ทิพฺพาย โสตธาตุยา สทฺทํ สุณาติฯ รูปายตนํ จกฺขุวิญฺญาณสฺส ปุเรชาตปจฺจเยน ปจฺจโยฯ สทฺทายตนํ โสตวิญฺญาณสฺส…เป.… คนฺธายตนํ ฆานวิญฺญาณสฺส…เป.… รสายตนํ ชิวฺหาวิญฺญาณสฺส…เป.… โผฏฺฐพฺพายตนํ กายวิญฺญาณสฺส ปุเรชาตปจฺจเยน ปจฺจโยฯ

วตฺถุปุเรชาตํ – จกฺขายตนํ จกฺขุวิญฺญาณสฺส ปุเรชาตปจฺจเยน ปจฺจโยฯ โสตายตนํ โสตวิญฺญาณสฺส …เป.… ฆานายตนํ ฆานวิญฺญาณสฺส…เป.… ชิวฺหายตนํ ชิวฺหาวิญฺญาณสฺส…เป.… กายายตนํ กายวิญฺญาณสฺส ปุเรชาตปจฺจเยน ปจฺจโยฯ วตฺถุ วิปากาพฺยากตานํ กิริยาพฺยากตานํ ขนฺธานํ ปุเรชาตปจฺจเยน ปจฺจโยฯ (1)

อพฺยากโต ธมฺโม กุสลสฺส ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํฯ