7. อนุสยยมกํ
[1] สตฺตานุสยา – กามราคานุสโย, ปฏิฆานุสโย, มานานุสโย, ทิฏฺฐานุสโย, วิจิกิจฺฉานุสโย, ภวราคานุสโย, อวิชฺชานุสโยฯ
1. อุปฺปตฺติฏฺฐานวาโร
[2] กตฺถ กามราคานุสโย อนุเสติ? กามธาตุยา ทฺวีสุ เวทนาสุ เอตฺถ กามราคานุสโย อนุเสติฯ
กตฺถ ปฏิฆานุสโย อนุเสติ? ทุกฺขาย เวทนาย เอตฺถ ปฏิฆานุสโย อนุเสติฯ
กตฺถ มานานุสโย อนุเสติ? กามธาตุยา ทฺวีสุ เวทนาสุ รูปธาตุยา อรูปธาตุยา เอตฺถ มานานุสโย อนุเสติฯ
กตฺถ ทิฏฺฐานุสโย อนุเสติ? สพฺพสกฺกายปริยาปนฺเนสุ ธมฺเมสุ เอตฺถ ทิฏฺฐานุสโย อนุเสติฯ
กตฺถ วิจิกิจฺฉานุสโย อนุเสติ? สพฺพสกฺกายปริยาปนฺเนสุ ธมฺเมสุ เอตฺถ วิจิกิจฺฉานุสโย อนุเสติฯ
กตฺถ ภวราคานุสโย อนุเสติ? รูปธาตุยา อรูปธาตุยา เอตฺถ ภวราคานุสโย อนุเสติฯ
กตฺถ อวิชฺชานุสโย อนุเสติ? สพฺพสกฺกายปริยาปนฺเนสุ ธมฺเมสุ เอตฺถ อวิชฺชานุสโย อนุเสติฯ
อุปฺปตฺติฏฺฐานวาโรฯ
2. มหาวาโร 1. อนุสยวาโร
(ก) อนุโลมปุคฺคโล
[3] (ก) ยสฺส กามราคานุสโย อนุเสติ ตสฺส ปฏิฆานุสโย อนุเสตีติ? อามนฺตาฯ
(ข) ยสฺส วา ปน ปฏิฆานุสโย อนุเสติ ตสฺส กามราคานุสโย อนุเสตีติ? อามนฺตาฯ
(ก) ยสฺส กามราคานุสโย อนุเสติ ตสฺส มานานุสโย อนุเสตีติ? อามนฺตาฯ
(ข) ยสฺส วา ปน มานานุสโย อนุเสติ ตสฺส กามราคานุสโย อนุเสตีติ?
อนาคามิสฺส มานานุสโย อนุเสติ, โน จ ตสฺส กามราคานุสโย อนุเสติฯ ติณฺณํ ปุคฺคลานํ มานานุสโย จ อนุเสติ กามราคานุสโย จ อนุเสติฯ
(ก) ยสฺส กามราคานุสโย อนุเสติ ตสฺส ทิฏฺฐานุสโย อนุเสตีติ?
ทฺวินฺนํ ปุคฺคลานํ กามราคานุสโย อนุเสติ, โน จ เตสํ ทิฏฺฐานุสโย อนุเสติฯ ปุถุชฺชนสฺส กามราคานุสโย จ อนุเสติ ทิฏฺฐานุสโย จ อนุเสติฯ
(ข) ยสฺส วา ปน ทิฏฺฐานุสโย อนุเสติ ตสฺส กามราคานุสโย อนุเสตีติ? อามนฺตาฯ
(ก) ยสฺส กามราคานุสโย อนุเสติ ตสฺส วิจิกิจฺฉานุสโย อนุเสตีติ?
ทฺวินฺนํ ปุคฺคลานํ กามราคานุสโย อนุเสติ, โน จ เตสํ วิจิกิจฺฉานุสโย อนุเสติฯ ปุถุชฺชนสฺส กามราคานุสโย จ อนุเสติ วิจิกิจฺฉานุสโย จ อนุเสติฯ
(ข) ยสฺส วา ปน วิจิกิจฺฉานุสโย อนุเสติ ตสฺส กามราคานุสโย อนุเสตีติ? อามนฺตาฯ
(ก) ยสฺส กามราคานุสโย อนุเสติ ตสฺส ภวราคานุสโย อนุเสตีติ? อามนฺตาฯ
(ข) ยสฺส วา ปน ภวราคานุสโย อนุเสติ ตสฺส กามราคานุสโย อนุเสตีติ?
อนาคามิสฺส ภวราคานุสโย อนุเสติ, โน จ ตสฺส กามราคานุสโย อนุเสติฯ ติณฺณํ ปุคฺคลานํ ภวราคานุสโย จ อนุเสติ กามราคานุสโย จ อนุเสติฯ
(ก) ยสฺส กามราคานุสโย อนุเสติ ตสฺส อวิชฺชานุสโย อนุเสตีติ? อามนฺตาฯ
