6. อุปฺปชฺชนวาโร

[330] (ก) ยสฺส กามราคานุสโย อุปฺปชฺชติ ตสฺส ปฏิฆานุสโย อุปฺปชฺชตีติ? อามนฺตาฯ

(ข) ยสฺส วา ปน ปฏิฆานุสโย อุปฺปชฺชติ ตสฺส กามราคานุสโย อุปฺปชฺชตีติ? อามนฺตาฯ

(ก) ยสฺส กามราคานุสโย อุปฺปชฺชติ ตสฺส มานานุสโย อุปฺปชฺชตีติ? อามนฺตาฯ

(ข) ยสฺส วา ปน มานานุสโย อุปฺปชฺชติ ตสฺส กามราคานุสโย อุปฺปชฺชตีติ?

อนาคามิสฺส มานานุสโย อุปฺปชฺชติ, โน จ ตสฺส กามราคานุสโย อุปฺปชฺชติฯ ติณฺณํ ปุคฺคลานํ มานานุสโย จ อุปฺปชฺชติ กามราคานุสโย จ อุปฺปชฺชติ (วิตฺถาเรตพฺพํ)ฯ

[331] (ก) ยสฺส กามราคานุสโย นุปฺปชฺชติ ตสฺส ปฏิฆานุสโย นุปฺปชฺชตีติ? อามนฺตาฯ

(ข) ยสฺส วา ปน ปฏิฆานุสโย นุปฺปชฺชติ ตสฺส กามราคานุสโย นุปฺปชฺชตีติ? อามนฺตาฯ

(ก) ยสฺส กามราคานุสโย นุปฺปชฺชติ ตสฺส มานานุสโย นุปฺปชฺชตีติ?

อนาคามิสฺส กามราคานุสโย นุปฺปชฺชติ, โน จ ตสฺส มานานุสโย นุปฺปชฺชติฯ อรหโต กามราคานุสโย จ นุปฺปชฺชติ มานานุสโย จ นุปฺปชฺชติฯ

(ข) ยสฺส วา ปน มานานุสโย นุปฺปชฺชติ ตสฺส กามราคานุสโย นุปฺปชฺชตีติ? อามนฺตาฯ (วิตฺถาเรตพฺพํ)ฯ

อุปฺปชฺชนวาโรฯ

7. (ก) ธาตุปุจฺฉาวาโร

[332] กามธาตุยา จุตสฺส กามธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? กามธาตุยา จุตสฺส รูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? กามธาตุยา จุตสฺส อรูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา?

กามธาตุยา จุตสฺส น กามธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? กามธาตุยา จุตสฺส น รูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? กามธาตุยา จุตสฺส น อรูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา?

กามธาตุยา จุตสฺส น กามธาตุํ น อรูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? กามธาตุยา จุตสฺส น รูปธาตุํ น อรูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? กามธาตุยา จุตสฺส น กามธาตุํ น รูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? (กามธาตุมูลกํ)

[333] รูปธาตุยา จุตสฺส รูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? รูปธาตุยา จุตสฺส กามธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? รูปธาตุยา จุตสฺส อรูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา?

รูปธาตุยา จุตสฺส น กามธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? รูปธาตุยา จุตสฺส น รูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา? รูปธาตุยา จุตสฺส น อรูปธาตุํ อุปปชฺชนฺตสฺส กติ อนุสยา อนุเสนฺติ, กติ อนุสยา นานุเสนฺติ, กติ อนุสยา ภงฺคา?