(ข) โย วา ปน ยโต อวิชฺชานุสเยน นิรนุสโย โส ตโต กามราคานุสเยน จ ปฏิฆานุสเยน จ มานานุสเยน จ ทิฏฺฐานุสเยน จ วิจิกิจฺฉานุสเยน จ ภวราคานุสเยน จ นิรนุสโยติ? อามนฺตาฯ (ฉกฺกมูลกํ)

สานุสยวาเร ปฏิโลมํฯ

สานุสยวาโรฯ

3. ปชหนวาโร

(ก) อนุโลมปุคฺคโล

[132] (ก) โย กามราคานุสยํ ปชหติ โส ปฏิฆานุสยํ ปชหตีติ? อามนฺตาฯ

(ข) โย วา ปน ปฏิฆานุสยํ ปชหติ โส กามราคานุสยํ ปชหตีติ? อามนฺตาฯ

(ก) โย กามราคานุสยํ ปชหติ โส มานานุสยํ ปชหตีติ?

ตเทกฏฺฐํ ปชหติฯ

(ข) โย วา ปน มานานุสยํ ปชหติ โส กามราคานุสยํ ปชหตีติ? โนฯ

โย กามราคานุสยํ ปชหติ โส ทิฏฺฐานุสยํ…เป.… วิจิกิจฺฉานุสยํ ปชหตีติ? โนฯ

โย วา ปน วิจิกิจฺฉานุสยํ ปชหติ โส กามราคานุสยํ ปชหตีติ?

ตเทกฏฺฐํ ปชหติฯ

โย กามราคานุสยํ ปชหติ โส ภวราคานุสยํ…เป.… อวิชฺชานุสยํ ปชหตีติ?

ตเทกฏฺฐํ ปชหติฯ

โย วา ปน อวิชฺชานุสยํ ปชหติ โส กามราคานุสยํ ปชหตีติ? โนฯ

[133] (ก) โย ปฏิฆานุสยํ ปชหติ โส มานานุสยํ ปชหตีติ?

ตเทกฏฺฐํ ปชหติฯ

(ข) โย วา ปน มานานุสยํ ปชหติ โส ปฏิฆานุสยํ ปชหตีติ? โนฯ

โย ปฏิฆานุสยํ ปชหติ โส ทิฏฺฐานุสยํ…เป.… วิจิกิจฺฉานุสยํ ปชหตีติ? โนฯ

โย วา ปน วิจิกิจฺฉานุสยํ ปชหติ โส ปฏิฆานุสยํ ปชหตีติ?

ตเทกฏฺฐํ ปชหติฯ

โย ปฏิฆานุสยํ ปชหติ โส ภวราคานุสยํ…เป.… อวิชฺชานุสยํ ปชหตีติ?

ตเทกฏฺฐํ ปชหติฯ

โย วา ปน อวิชฺชานุสยํ ปชหติ โส ปฏิฆานุสยํ ปชหตีติ? โนฯ

[134] โย มานานุสยํ ปชหติ โส ทิฏฺฐานุสยํ…เป.… วิจิกิจฺฉานุสยํ ปชหตีติ? โนฯ

โย วา ปน วิจิกิจฺฉานุสยํ ปชหติ โส มานานุสยํ ปชหตีติ?

ตเทกฏฺฐํ ปชหติฯ

โย มานานุสยํ ปชหติ โส ภวราคานุสยํ…เป.… อวิชฺชานุสยํ ปชหตีติ? อามนฺตาฯ

โย วา ปน อวิชฺชานุสยํ ปชหติ โส มานานุสยํ ปชหตีติ? อามนฺตาฯ

[135] (ก) โย ทิฏฺฐานุสยํ ปชหติ โส วิจิกิจฺฉานุสยํ ปชหตีติ? อามนฺตาฯ

(ข) โย วา ปน วิจิกิจฺฉานุสยํ ปชหติ โส ทิฏฺฐานุสยํ ปชหตีติ? อามนฺตา …เป.…ฯ

[136] โย วิจิกิจฺฉานุสยํ ปชหติ โส ภวราคานุสยํ…เป.… อวิชฺชานุสยํ ปชหตีติ?

ตเทกฏฺฐํ ปชหติฯ

โย วา ปน อวิชฺชานุสยํ ปชหติ โส วิจิกิจฺฉานุสยํ ปชหตีติ? โนฯ

[137] (ก) โย ภวราคานุสยํ ปชหติ โส อวิชฺชานุสยํ ปชหตีติ? อามนฺตาฯ

(ข) โย วา ปน อวิชฺชานุสยํ ปชหติ โส ภวราคานุสยํ ปชหตีติ? อามนฺตาฯ (เอกมูลกํ)

[138] (ก) โย กามราคานุสยญฺจ ปฏิฆานุสยญฺจ ปชหติ โส มานานุสยํ ปชหตีติ?

ตเทกฏฺฐํ ปชหติฯ

(ข) โย วา ปน มานานุสยํ ปชหติ โส กามราคานุสยญฺจ ปฏิฆานุสยญฺจ ปชหตีติ? โนฯ

โย กามราคานุสยญฺจ ปฏิฆานุสยญฺจ ปชหติ โส ทิฏฺฐานุสยํ…เป.… วิจิกิจฺฉานุสยํ ปชหตีติ? โนฯ

โย วา ปน วิจิกิจฺฉานุสยํ ปชหติ โส กามราคานุสยญฺจ ปฏิฆานุสยญฺจ ปชหตีติ?

ตเทกฏฺฐํ ปชหติฯ

โย กามราคานุสยญฺจ ปฏิฆานุสยญฺจ ปชหติ โส ภวราคานุสยํ…เป.… อวิชฺชานุสยํ ปชหตีติ?

ตเทกฏฺฐํ ปชหติฯ

โย วา ปน อวิชฺชานุสยํ ปชหติ โส กามราคานุสยญฺจ ปฏิฆานุสยญฺจ ปชหตีติ? โนฯ (ทุกมูลกํ)

[139] โย กามราคานุสยญฺจ ปฏิฆานุสยญฺจ มานานุสยญฺจ ปชหติ โส ทิฏฺฐานุสยํ…เป.… วิจิกิจฺฉานุสยํ ปชหตีติ? นตฺถิฯ

โย วา ปน วิจิกิจฺฉานุสยํ ปชหติ โส กามราคานุสยญฺจ ปฏิฆานุสยญฺจ มานานุสยญฺจ ปชหตีติ?

ตเทกฏฺฐํ ปชหติฯ

โย กามราคานุสยญฺจ ปฏิฆานุสยญฺจ มานานุสยญฺจ ปชหติ โส ภวราคานุสยํ…เป.… อวิชฺชานุสยํ ปชหตีติ? นตฺถิฯ

โย วา ปน อวิชฺชานุสยํ ปชหติ โส กามราคานุสยญฺจ ปฏิฆานุสยญฺจ มานานุสยญฺจ ปชหตีติ?

มานานุสยํ ปชหติฯ (ติกมูลกํ)

[140] (ก) โย กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ ปชหติ โส วิจิกิจฺฉานุสยํ ปชหตีติ? นตฺถิฯ

(ข) โย วา ปน วิจิกิจฺฉานุสยํ ปชหติ โส กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ ปชหตีติ?

ทิฏฺฐานุสยํ ปชหติ กามราคานุสยญฺจ ปฏิฆานุสยญฺจ มานานุสยญฺจ ตเทกฏฺฐํ ปชหติ …เป.…ฯ (จตุกฺกมูลกํ)

[141] โย กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ปชหติ โส ภวราคานุสยํ…เป.… อวิชฺชานุสยํ ปชหตีติ? นตฺถิฯ

โย วา ปน อวิชฺชานุสยํ ปชหติ โส กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ปชหตีติ?

มานานุสยํ ปชหติฯ (ปญฺจกมูลกํ)

[142] (ก) โย กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ภวราคานุสยญฺจ ปชหติ โส อวิชฺชานุสยํ ปชหตีติ? นตฺถิฯ

(ข) โย วา ปน อวิชฺชานุสยํ ปชหติ โส กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ภวราคานุสยญฺจ ปชหตีติ?

มานานุสยญฺจ ภวราคานุสยญฺจ ปชหติฯ (ฉกฺกมูลกํ)

(ข) อนุโลมโอกาโส

[143] (ก) ยโต กามราคานุสยํ ปชหติ ตโต ปฏิฆานุสยํ ปชหตีติ? โนฯ

(ข) ยโต วา ปน ปฏิฆานุสยํ ปชหติ ตโต กามราคานุสยํ ปชหตีติ? โนฯ