เตว ปุคฺคลา กามธาตุยา ทฺวีสุ เวทนาสุ เต ตโต อวิชฺชานุสเยน จ กามราคานุสเยน จ มานานุสเยน จ สานุสยา, โน จ เต ตโต ปฏิฆานุสเยน จ ทิฏฺฐานุสเยน จ วิจิกิจฺฉานุสเยน จ ภวราคานุสเยน จ สานุสยาฯ เตว ปุคฺคลา ทุกฺขาย เวทนาย เต ตโต อวิชฺชานุสเยน จ ปฏิฆานุสเยน จ สานุสยา, โน จ เต ตโต กามราคานุสเยน จ มานานุสเยน จ ทิฏฺฐานุสเยน จ วิจิกิจฺฉานุสเยน จ ภวราคานุสเยน จ สานุสยาฯ ปุถุชฺชโน รูปธาตุยา อรูปธาตุยา โส ตโต อวิชฺชานุสเยน จ มานานุสเยน จ ทิฏฺฐานุสเยน จ วิจิกิจฺฉานุสเยน จ ภวราคานุสเยน จ สานุสโย, โน จ โส ตโต กามราคานุสเยน จ ปฏิฆานุสเยน จ สานุสโยฯ สฺเวว ปุคฺคโล กามธาตุยา ทฺวีสุ เวทนาสุ โส ตโต อวิชฺชานุสเยน จ กามราคานุสเยน จ มานานุสเยน จ ทิฏฺฐานุสเยน จ วิจิกิจฺฉานุสเยน จ สานุสโย, โน จ โส ตโต ปฏิฆานุสเยน จ ภวราคานุสเยน จ สานุสโยฯ สฺเวว ปุคฺคโล ทุกฺขาย เวทนาย โส ตโต อวิชฺชานุสเยน จ ปฏิฆานุสเยน จ ทิฏฺฐานุสเยน จ วิจิกิจฺฉานุสเยน จ สานุสโย, โน จ โส ตโต กามราคานุสเยน จ มานานุสเยน จ ภวราคานุสเยน จ สานุสโยฯ (ฉกฺกมูลกํ)

สานุสยวาเร อนุโลมํฯ

2. สานุสยวาร

(ฆ) ปฏิโลมปุคฺคโล

[99] (ก) โย กามราคานุสเยน นิรนุสโย โส ปฏิฆานุสเยน นิรนุสโยติ? อามนฺตาฯ

(ข) โย วา ปน ปฏิฆานุสเยน นิรนุสโย โส กามราคานุสเยน นิรนุสโยติ? อามนฺตาฯ

(ก) โย กามราคานุสเยน นิรนุสโย โส มานานุสเยน นิรนุสโยติ?

อนาคามี กามราคานุสเยน นิรนุสโย, โน จ มานานุสเยน นิรนุสโยฯ อรหา กามราคานุสเยน จ นิรนุสโย มานานุสเยน จ นิรนุสโยฯ

(ข) โย วา ปน มานานุสเยน นิรนุสโย โส กามราคานุสเยน นิรนุสโยติ? อามนฺตาฯ