เมนู

โพธิสตฺโต อิสฺสริยกามการิกาเหตุ ‘‘สสฺสโต โลโก’’ติ ปจฺจาคจฺฉิ, ‘‘อสสฺสโต โลโก’’ติ…เป.… ‘‘อนฺตวา โลโก’’ติ…เป.… ‘‘อนนฺตวา โลโก’’ติ… ‘‘ตํ ชีวํ ตํ สรีร’’นฺติ … ‘‘อญฺญํ ชีวํ อญฺญํ สรีร’’นฺติ… ‘‘โหติ ตถาคโต ปรํ มรณา’’ติ… ‘‘น โหติ ตถาคโต ปรํ มรณา’’ติ… ‘‘โหติ จ น จ โหติ ตถาคโต ปรํ มรณา’’ติ…เป.… ‘‘เนว โหติ น น โหติ ตถาคโต ปรํ มรณา’’ติ ปจฺจาคจฺฉีติ? น เหวํ วตฺตพฺเพ…เป.…ฯ

โพธิสตฺโต อิสฺสริยกามการิกาเหตุ ทุกฺกรการิกํ อกาสีติ? อามนฺตาฯ ‘‘โพธิสตฺโต อิสฺสริยกามการิกาเหตุ ทุกฺกรการิกํ อกาสี’’ติ – อตฺเถว สุตฺตนฺโตติ? นตฺถิฯ หญฺจิ ‘‘โพธิสตฺโต อิสฺสริยกามการิกาเหตุ ทุกฺกรการิกํ อกาสี’’ติ – นตฺเถว สุตฺตนฺโต, โน จ วต เร วตฺตพฺเพ – ‘‘โพธิสตฺโต อิสฺสริยกามการิกาเหตุ ทุกฺกรการิกํ อกาสี’’ติฯ

[913] โพธิสตฺโต อิสฺสริยกามการิกาเหตุ อปรนฺตปํ [อมรํ ตปํ (สํ. นิ. 1.137)] อกาสิ, อญฺญํ สตฺถารํ อุทฺทิสีติ? อามนฺตาฯ โพธิสตฺโต อิสฺสริยกามการิกาเหตุ ‘‘สสฺสโต โลโก’’ติ ปจฺจาคจฺฉิ…เป.… ‘‘เนว โหติ น น โหติ ตถาคโต ปรํ มรณา’’ติ ปจฺจาคจฺฉีติ? น เหวํ วตฺตพฺเพ…เป.…ฯ

[914] โพธิสตฺโต อิสฺสริยกามการิกาเหตุ อญฺญํ สตฺถารํ อุทฺทิสีติ? อามนฺตาฯ ‘‘โพธิสตฺโต อิสฺสริยกามการิกาเหตุ อญฺญํ สตฺถารํ อุทฺทิสี’’ติ – อตฺเถว สุตฺตนฺโตติ? นตฺถิฯ หญฺจิ ‘‘โพธิสตฺโต อิสฺสริยกามการิกาเหตุ อญฺญํ สตฺถารํ อุทฺทิสี’’ติ – นตฺเถว สุตฺตนฺโต, โน จ วต เร วตฺตพฺเพ – ‘‘โพธิสตฺโต อิสฺสริยกามการิกาเหตุ อญฺญํ สตฺถารํ อุทฺทิสี’’ติฯ

อิสฺสริยกามการิกากถา นิฏฺฐิตาฯ

23. เตวีสติมวคฺโค

(225) 8. ปติรูปกถา

[915] อตฺถิ น ราโค ราคปติรูปโกติ? อามนฺตาฯ อตฺถิ น ผสฺโส ผสฺสปติรูปโก, อตฺถิ น เวทนา เวทนาปติรูปิกา, อตฺถิ น สญฺญา สญฺญาปติรูปิกา , อตฺถิ น เจตนา เจตนาปติรูปิกา, อตฺถิ น จิตฺตํ จิตฺตปติรูปกํ, อตฺถิ น สทฺธา สทฺธาปติรูปิกา, อตฺถิ น วีริยํ วีริยปติรูปกํ, อตฺถิ น สติ สติปติรูปิกา, อตฺถิ น สมาธิ สมาธิปติรูปโก , อตฺถิ น ปญฺญา ปญฺญาปติรูปิกาติ? น เหวํ วตฺตพฺเพ…เป.…ฯ

[916] อตฺถิ น โทโส โทสปติรูปโก, อตฺถิ น โมโห โมหปติรูปโก, อตฺถิ น กิเลโส กิเลสปติรูปโกติ? อามนฺตาฯ อตฺถิ น ผสฺโส ผสฺสปติรูปโก…เป.… อตฺถิ น ปญฺญา ปญฺญาปติรูปิกาติ? น เหวํ วตฺตพฺเพ…เป.…ฯ

ปติรูปกถา นิฏฺฐิตาฯ

23. เตวีสติมวคฺโค

(226) 9. อปรินิปฺผนฺนกถา

[917] รูปํ อปรินิปฺผนฺนนฺติ? อามนฺตาฯ รูปํ น อนิจฺจํ น สงฺขตํ น ปฏิจฺจสมุปฺปนฺนํ น ขยธมฺมํ น วยธมฺมํ น วิราคธมฺมํ น นิโรธธมฺมํ น วิปริณามธมฺมนฺติ? น เหวํ วตฺตพฺเพ…เป.… นนุ รูปํ อนิจฺจํ สงฺขตํ ปฏิจฺจสมุปฺปนฺนํ ขยธมฺมํ วยธมฺมํ วิราคธมฺมํ นิโรธธมฺมํ วิปริณามธมฺมนฺติ? อามนฺตาฯ หญฺจิ รูปํ อนิจฺจํ สงฺขตํ…เป.… วิปริณามธมฺมํ, โน จ วต เร วตฺตพฺเพ – ‘‘รูปํ อปรินิปฺผนฺน’’นฺติฯ

ทุกฺขญฺเญว ปรินิปฺผนฺนนฺติ? อามนฺตาฯ นนุ ยทนิจฺจํ ตํ ทุกฺขํ [สํ. นิ. 3.15] วุตฺตํ ภควตา – ‘‘รูปํ อนิจฺจ’’นฺติ? อามนฺตาฯ หญฺจิ ยทนิจฺจํ ตํ ทุกฺขํ วุตฺตํ ภควตา – ‘‘รูปํ อนิจฺจํ’’, โน จ วต เร วตฺตพฺเพ – ‘‘ทุกฺขญฺเญว ปรินิปฺผนฺน’’นฺติ…เป.…ฯ

[918] เวทนา …เป.… สญฺญา… สงฺขารา… วิญฺญาณํ… จกฺขายตนํ…เป.… ธมฺมายตนํ… จกฺขุธาตุ… ธมฺมธาตุ… จกฺขุนฺทฺริยํ…เป.… อญฺญาตาวินฺทฺริยํ อปรินิปฺผนฺนนฺติ? อามนฺตาฯ อญฺญาตาวินฺทฺริยํ น อนิจฺจํ…เป.… น วิปริณามธมฺมนฺติ? น เหวํ วตฺตพฺเพ…เป.… นนุ อญฺญาตาวินฺทฺริยํ อนิจฺจํ สงฺขตํ…เป.… วิปริณามธมฺมนฺติ? อามนฺตาฯ หญฺจิ อญฺญาตาวินฺทฺริยํ อนิจฺจํ สงฺขตํ ปฏิจฺจสมุปฺปนฺนํ ขยธมฺมํ วยธมฺมํ วิราคธมฺมํ นิโรธธมฺมํ วิปริณามธมฺมํ, โน จ วต เร วตฺตพฺเพ – ‘‘อญฺญาตาวินฺทฺริยํ อปรินิปฺผนฺน’’นฺติฯ