[905] นตฺถิ กาจิ อาเสวนปจฺจยตาติ? อามนฺตาฯ นนุ วุตฺตํ ภควตา – ‘‘สมฺมาทิฏฺฐิ, ภิกฺขเว, อาเสวิตา ภาวิตา พหุลีกตา อมโตคธา โหติ อมตปรายนา อมตปริโยสานา’’ติ! อตฺเถว สุตฺตนฺโตติ? อามนฺตาฯ เตน หิ อตฺถิ กาจิ อาเสวนปจฺจยตาติฯ

นตฺถิ กาจิ อาเสวนปจฺจยตาติ? อามนฺตาฯ นนุ วุตฺตํ ภควตา – ‘‘สมฺมาสงฺกปฺโป, ภิกฺขเว, อาเสวิโต ภาวิโต พหุลีกโต…เป.… สมฺมาสมาธิ, ภิกฺขเว, อาเสวิโต ภาวิโต พหุลีกโต อมโตคโธ โหติ อมตปรายโน อมตปริโยสาโน’’ติ อตฺเถว สุตฺตนฺโตติ, อามนฺตาฯ เตน หิ อตฺถิ กาจิ อาเสวนปจฺจยตาติฯ

อาเสวนปจฺจยกถา นิฏฺฐิตาฯ

22. พาวีสติมวคฺโค

(217) 10. ขณิกกถา

[906] เอกจิตฺตกฺขณิกา สพฺเพ ธมฺมาติ? อามนฺตาฯ จิตฺเต มหาปถวี สณฺฐาติ, มหาสมุทฺโท สณฺฐาติ, สิเนรุปพฺพตราชา สณฺฐาติ, อาโป สณฺฐาติ, เตโช สณฺฐาติ, วาโย สณฺฐาติ, ติณกฏฺฐวนปฺปตโย สณฺฐหนฺตีติ? น เหวํ วตฺตพฺเพ…เป.…ฯ

เอกจิตฺตกฺขณิกา สพฺเพ ธมฺมาติ? อามนฺตาฯ จกฺขายตนํ จกฺขุวิญฺญาเณน สหชาตนฺติ? น เหวํ วตฺตพฺเพ…เป.… จกฺขายตนํ จกฺขุวิญฺญาเณน สหชาตนฺติ? อามนฺตาฯ นนุ อายสฺมา สาริปุตฺโต เอตทโวจ – ‘‘อชฺฌตฺติกญฺเจว, อาวุโส, จกฺขุํ อปริภินฺนํ โหติ, พาหิรา จ รูปา น อาปาถํ อาคจฺฉนฺติ, โน จ ตชฺโช สมนฺนาหาโร โหติ, เนว ตาว ตชฺชสฺส วิญฺญาณภาคสฺส [วิญฺญาณภาวสฺส (พหูสุ)] ปาตุภาโว โหติฯ อชฺฌตฺติกญฺเจว, อาวุโส, จกฺขุํ อปริภินฺนํ โหติ, พาหิรา จ รูปา อาปาถํ อาคจฺฉนฺติ, โน จ ตชฺโช สมนฺนาหาโร โหติ, เนว ตาว ตชฺชสฺส วิญฺญาณภาคสฺส ปาตุภาโว โหติฯ