(210) 3. อาเนญฺชกถา

[896] อรหา อาเนญฺเช ฐิโต ปรินิพฺพายตีติ? อามนฺตาฯ นนุ อรหา ปกติจิตฺเต ฐิโต ปรินิพฺพายตีติ? อามนฺตาฯ หญฺจิ อรหา ปกติจิตฺเต ฐิโต ปรินิพฺพายติ, โน จ วต เร วตฺตพฺเพ – ‘‘อรหา อาเนญฺเช ฐิโต ปรินิพฺพายตี’’ติฯ

อรหา อาเนญฺเช ฐิโต ปรินิพฺพายตีติ? อามนฺตาฯ อรหา กิริยมเย จิตฺเต ฐิโต ปรินิพฺพายตีติ? น เหวํ วตฺตพฺเพ…เป.… นนุ อรหา วิปากจิตฺเต ฐิโต ปรินิพฺพายตีติ? อามนฺตาฯ หญฺจิ อรหา วิปากจิตฺเต ฐิโต ปรินิพฺพายติ, โน จ วต เร วตฺตพฺเพ – ‘‘อรหา อาเนญฺเช ฐิโต ปรินิพฺพายตี’’ติฯ

อรหา อาเนญฺเช ฐิโต ปรินิพฺพายตีติ? อามนฺตาฯ อรหา กิริยาพฺยากเต จิตฺเต ฐิโต ปรินิพฺพายตีติ? น เหวํ วตฺตพฺเพ…เป.… นนุ อรหา วิปากาพฺยากเต จิตฺเต ฐิโต ปรินิพฺพายตีติ? อามนฺตาฯ หญฺจิ อรหา วิปากาพฺยากเต จิตฺเต ฐิโต ปรินิพฺพายติ, โน จ วต เร วตฺตพฺเพ – ‘‘อรหา อาเนญฺเช ฐิโต ปรินิพฺพายตี’’ติฯ

อรหา อาเนญฺเช ฐิโต ปรินิพฺพายตีติ? อามนฺตาฯ นนุ ภควา จตุตฺถชฺฌานา วุฏฺฐหิตฺวา สมนนฺตรา ปรินิพฺพุโตติ [ที. นิ. 2.219]? อามนฺตาฯ หญฺจิ ภควา จตุตฺถชฺฌานา วุฏฺฐหิตฺวา สมนนฺตรา ปรินิพฺพุโต, โน จ วต เร วตฺตพฺเพ – ‘‘อรหา อาเนญฺเช ฐิโต ปรินิพฺพายตี’’ติฯ

อาเนญฺชกถา นิฏฺฐิตาฯ

22. พาวีสติมวคฺโค

(211) 4. ธมฺมาภิสมยกถา

[897] อตฺถิ คพฺภเสยฺยาย ธมฺมาภิสมโยติ? อามนฺตาฯ อตฺถิ คพฺภเสยฺยาย ธมฺมเทสนา, ธมฺมสฺสวนํ, ธมฺมสากจฺฉา, ปริปุจฺฉา, สีลสมาทานํ , อินฺทฺริเยสุ คุตฺตทฺวารตา, โภชเน มตฺตญฺญุตา, ปุพฺพรตฺตาปรรตฺตํ ชาคริยานุโยโคติ ? น เหวํ วตฺตพฺเพ…เป.… นตฺถิ คพฺภเสยฺยาย ธมฺมเทสนา, ธมฺมสฺสวนํ…เป.… ปุพฺพรตฺตาปรรตฺตํ ชาคริยานุโยโคติ? อามนฺตาฯ หญฺจิ นตฺถิ คพฺภเสยฺยาย ธมฺมเทสนา, ธมฺมสฺสวนํ…เป.… ปุพฺพรตฺตาปรรตฺตํ ชาคริยานุโยโค, โน จ วต เร วตฺตพฺเพ – ‘‘อตฺถิ คพฺภเสยฺยาย ธมฺมาภิสมโย’’ติฯ

อตฺถิ คพฺภเสยฺยาย ธมฺมาภิสมโยติ? อามนฺตาฯ นนุ ทฺเว ปจฺจยา สมฺมาทิฏฺฐิยา อุปฺปาทาย – ปรโต จ โฆโส, โยนิโส จ มนสิกาโรติ? อามนฺตาฯ หญฺจิ ทฺเว ปจฺจยา สมฺมาทิฏฺฐิยา อุปฺปาทาย – ปรโต จ โฆโส, โยนิโส จ มนสิกาโร, โน จ วต เร วตฺตพฺเพ – ‘‘อตฺถิ คพฺภเสยฺยาย ธมฺมาภิสมโย’’ติฯ

อตฺถิ คพฺภเสยฺยาย ธมฺมาภิสมโยติ? อามนฺตาฯ สุตฺตสฺส ปมตฺตสฺส มุฏฺฐสฺสติสฺส อสมฺปชานสฺส ธมฺมาภิสมโยติ? น เหวํ วตฺตพฺเพ…เป.…ฯ

ธมฺมาภิสมยกถา นิฏฺฐิตาฯ

22. พาวีสติมวคฺโค

(212-4) 5-7. ติสฺโสปิกถา

[898] อตฺถิ คพฺภเสยฺยาย อรหตฺตปฺปตฺตีติ? อามนฺตาฯ สุตฺตสฺส ปมตฺตสฺส มุฏฺฐสฺสติสฺส อสมฺปชานสฺส อรหตฺตปฺปตฺตีติ? น เหวํ วตฺตพฺเพ…เป.…ฯ

[899] อตฺถิ สุปินคตสฺส ธมฺมาภิสมโยติ? อามนฺตาฯ สุตฺตสฺส ปมตฺตสฺส มุฏฺฐสฺสติสฺส อสมฺปชานสฺส ธมฺมาภิสมโยติ? น เหวํ วตฺตพฺเพ…เป.…ฯ

[900] อตฺถิ สุปินคตสฺส อรหตฺตปฺปตฺตีติ? อามนฺตาฯ สุตฺตสฺส ปมตฺตสฺส มุฏฺฐสฺสติสฺส อสมฺปชานสฺส อรหตฺตปฺปตฺตีติ? น เหวํ วตฺตพฺเพ…เป.…ฯ

ติสฺโสปิกถา นิฏฺฐิตาฯ

22. พาวีสติมวคฺโค