เมนู

รูปํ เวทนา โหติ…เป.… สญฺญา โหติ… สงฺขารา โหนฺติ… วิญฺญาณํ โหติ… เวทนา…เป.… สญฺญา…เป.… สงฺขารา…เป.… วิญฺญาณํ รูปํ โหติ…เป.… เวทนา โหติ… สญฺญา โหติ… สงฺขารา โหนฺตีติ? น เหวํ วตฺตพฺเพฯ เตน หิ รูปํ รูปฏฺเฐน นิยตํ, เวทนา…เป.… สญฺญา…เป.… สงฺขารา…เป.… วิญฺญาณํ วิญฺญาณฏฺเฐน นิยตนฺติฯ

ธมฺมกถา นิฏฺฐิตาฯ

21. เอกวีสติมวคฺโค

(207) 8. กมฺมกถา

[889] สพฺเพ กมฺมา นิยตาติ? อามนฺตาฯ มิจฺฉตฺตนิยตาติ? น เหวํ วตฺตพฺเพ…เป.… สมฺมตฺตนิยตาติ? น เหวํ วตฺตพฺเพ…เป.… นตฺถิ อนิยโต ราสีติ? น เหวํ วตฺตพฺเพ…เป.… นนุ อตฺถิ อนิยโต ราสีติ? อามนฺตาฯ หญฺจิ อตฺถิ อนิยโต ราสิ, โน จ วต เร วตฺตพฺเพ – ‘‘สพฺเพ กมฺมา นิยตา’’ติฯ

สพฺเพ กมฺมา นิยตาติ? อามนฺตาฯ นนุ ตโย ราสี วุตฺตา ภควตา – มิจฺฉตฺตนิยโต ราสิ, สมฺมตฺตนิยโต ราสิ, อนิยโต ราสีติ? อามนฺตาฯ หญฺจิ ตโย ราสี วุตฺตา ภควตา – มิจฺฉตฺตนิยโต ราสิ, สมฺมตฺตนิยโต ราสิ, อนิยโต ราสิ, โน จ วต เร วตฺตพฺเพ – ‘‘สพฺเพ กมฺมา นิยตา’’ติฯ

[890] ทิฏฺฐธมฺมเวทนียํ กมฺมํ ทิฏฺฐธมฺมเวทนียฏฺเฐน นิยตนฺติ? อามนฺตาฯ มิจฺฉตฺตนิยตนฺติ? น เหวํ วตฺตพฺเพ…เป.… สมฺมตฺตนิยตนฺติ? น เหวํ วตฺตพฺเพ…เป.…ฯ อุปปชฺชเวทนียํ กมฺมํ…เป.… อปราปริยเวทนียํ กมฺมํ อปราปริยเวทนียฏฺเฐน นิยตนฺติ? อามนฺตาฯ มิจฺฉตฺตนิยตนฺติ? น เหวํ วตฺตพฺเพ…เป.… สมฺมตฺตนิยตนฺติ? น เหวํ วตฺตพฺเพ…เป.…ฯ

[891] น วตฺตพฺพํ – ทิฏฺฐธมฺมเวทนียํ กมฺมํ ทิฏฺฐธมฺมเวทนียฏฺเฐน นิยตํ, อุปปชฺชเวทนียํ กมฺมํ…เป.… อปราปริยเวทนียํ กมฺมํ อปราปริยเวทนียฏฺเฐน นิยตนฺติ? อามนฺตาฯ