เมนู

[884] วตฺตพฺพํ – ‘‘อตฺถิ อธิปฺปายอิทฺธิ พุทฺธานํ วา สาวกานํ วา’’ติ? อามนฺตา ฯ นนุ อายสฺมา ปิลินฺทวจฺโฉ รญฺโญ มาคธสฺส เสนิยสฺส พิมฺพิสารสฺส ปาสาทํ ‘‘สุวณฺณ’’นฺเตฺวว อธิมุจฺจิ, สุวณฺโณ จ ปน อาสีติ [ปารา. 621; มหาว. 271]? อามนฺตาฯ หญฺจิ อายสฺมา ปิลินฺทวจฺโฉ รญฺโญ มาคธสฺส เสนิยสฺส พิมฺพิสารสฺส ปาสาทํ สุวณฺณนฺเตฺวว อธิมุจฺจิ, สุวณฺโณ จ ปน อาสิ, เตน วต เร วตฺตพฺเพ – ‘‘อตฺถิ อธิปฺปายอิทฺธิ พุทฺธานํ วา สาวกานํ วา’’ติฯ

อิทฺธิกถา นิฏฺฐิตาฯ

21. เอกวีสติมวคฺโค

(204) 5. พุทฺธกถา

[885] อตฺถิ พุทฺธานํ พุทฺเธหิ หีนาติเรกตาติ? อามนฺตาฯ สติปฏฺฐานโตติ? น เหวํ วตฺตพฺเพ …เป.… สมฺมปฺปธานโต…เป.… อิทฺธิปาทโต… อินฺทฺริยโต… พลโต… โพชฺฌงฺคโต… วสิภาวโต…เป.… สพฺพญฺญุตญาณทสฺสนโตติ? น เหวํ วตฺตพฺเพ…เป.…ฯ

พุทฺธกถา นิฏฺฐิตาฯ

21. เอกวีสติมวคฺโค

(205) 6. สพฺพทิสากถา

[886] สพฺพา ทิสา พุทฺธา ติฏฺฐนฺตีติ? อามนฺตาฯ ปุรตฺถิมาย ทิสาย พุทฺโธ ติฏฺฐตีติ? น เหวํ วตฺตพฺเพ…เป.… ปุรตฺถิมาย ทิสาย พุทฺโธ ติฏฺฐตีติ? อามนฺตาฯ กินฺนาโม โส ภควา, กิํชจฺโจ, กิํโคตฺโต, กินฺนามา ตสฺส ภควโต มาตาปิตโร, กินฺนามํ ตสฺส ภควโต สาวกยุคํ, โกนาโม ตสฺส ภควโต อุปฏฺฐาโก, กีทิสํ จีวรํ ธาเรติ, กีทิสํ ปตฺตํ ธาเรติ, กตรสฺมิํ คาเม วา นิคเม วา นคเร วา รฏฺเฐ วา ชนปเท วาติ? น เหวํ วตฺตพฺเพ…เป.…ฯ

ทกฺขิณาย ทิสาย…เป.… ปจฺฉิมาย ทิสาย…เป.… อุตฺตราย ทิสาย…เป.… เหฏฺฐิมาย ทิสาย พุทฺโธ ติฏฺฐตีติ? น เหวํ วตฺตพฺเพ…เป.… เหฏฺฐิมาย ทิสาย พุทฺโธ ติฏฺฐตีติ? อามนฺตาฯ กินฺนาโม โส ภควา…เป.… ชนปเท วาติ? น เหวํ วตฺตพฺเพ…เป.…ฯ

อุปริมาย ทิสาย พุทฺโธ ติฏฺฐตีติ? น เหวํ วตฺตพฺเพ…เป.…ฯ อุปริมาย ทิสาย พุทฺโธ ติฏฺฐตีติ? อามนฺตาฯ จาตุมหาราชิเก ติฏฺฐติ…เป.… ตาวติํเส ติฏฺฐติ…เป.… ยาเม ติฏฺฐติ…เป.… ตุสิเต ติฏฺฐติ…เป.… นิมฺมานรติยา ติฏฺฐติ…เป.… ปรนิมฺมิตวสวตฺติยา ติฏฺฐติ…เป.… พฺรหฺมโลเก ติฏฺฐตีติ? น เหวํ วตฺตพฺเพ…เป.…ฯ

สพฺพทิสากถา นิฏฺฐิตาฯ

21. เอกวีสติมวคฺโค

(206) 7. ธมฺมกถา

[887] สพฺเพ ธมฺมา นิยตาติ? อามนฺตาฯ มิจฺฉตฺตนิยตาติ? น เหวํ วตฺตพฺเพ…เป.… สมฺมตฺตนิยตาติ? น เหวํ วตฺตพฺเพ…เป.… นตฺถิ อนิยโต ราสีติ? น เหวํ วตฺตพฺเพ…เป.… นนุ อตฺถิ อนิยโต ราสีติ? อามนฺตา ฯ หญฺจิ อตฺถิ อนิยโต ราสิ, โน จ วต เร วตฺตพฺเพ – ‘‘สพฺเพ ธมฺมา นิยตา’’ติฯ

สพฺเพ ธมฺมา นิยตาติ? อามนฺตาฯ นนุ ตโย ราสี วุตฺตา ภควตา – มิจฺฉตฺตนิยโต ราสิ, สมฺมตฺตนิยโต ราสิ, อนิยโต ราสีติ [ธ. ส. ติกมาติกา 15]? อามนฺตาฯ หญฺจิ ตโย ราสี วุตฺตา ภควตา – มิจฺฉตฺตนิยโต ราสิ, สมฺมตฺตนิยโต ราสิ, อนิยโต ราสิ, โน จ วต เร วตฺตพฺเพ – ‘‘สพฺเพ ธมฺมา นิยตา’’ติฯ

รูปํ รูปฏฺเฐน นิยตนฺติ? อามนฺตาฯ มิจฺฉตฺตนิยตนฺติ? น เหวํ วตฺตพฺเพ…เป.… สมฺมตฺตนิยตนฺติ? น เหวํ วตฺตพฺเพ…เป.… เวทนา…เป.… สญฺญา…เป.… สงฺขารา…เป.… วิญฺญาณํ วิญฺญาณฏฺเฐน นิยตนฺติ? อามนฺตาฯ มิจฺฉตฺตนิยตนฺติ? น เหวํ วตฺตพฺเพ…เป.… สมฺมตฺตนิยตนฺติ? น เหวํ วตฺตพฺเพ…เป.…ฯ

[888] น วตฺตพฺพํ – รูปํ รูปฏฺเฐน นิยตํ…เป.… เวทนา…เป.… สญฺญา…เป.… สงฺขารา…เป.… วิญฺญาณํ วิญฺญาณฏฺเฐน นิยตนฺติ? อามนฺตาฯ