จีวรสฺส ปตฺติ อสงฺขตา…เป.… ปิณฺฑปาตสฺส…เป.… เสนาสนสฺส…เป.… คิลานปจฺจยเภสชฺชปริกฺขารสฺส ปตฺติ อสงฺขตา, นิพฺพานํ อสงฺขตนฺติ? อามนฺตาฯ ปญฺจ อสงฺขตานีติ? น เหวํ วตฺตพฺเพ…เป.… ปญฺจ อสงฺขตานีติ? อามนฺตาฯ ปญฺจ ตาณานิ…เป.… อนฺตริกา วาติ? น เหวํ วตฺตพฺเพ…เป.…ฯ

[839] ปฐมสฺส ฌานสฺส ปตฺติ อสงฺขตา (เอวํ สพฺพํ วิตฺถาเรตพฺพํ) ทุติยสฺส ฌานสฺส… ตติยสฺส ฌานสฺส… จตุตฺถสฺส ฌานสฺส… อากาสานญฺจายตนสฺส… วิญฺญาณญฺจายตนสฺส… อากิญฺจญฺญายตนสฺส… เนวสญฺญานาสญฺญายตนสฺส… โสตาปตฺติมคฺคสฺส… โสตาปตฺติผลสฺส… สกทาคามิมคฺคสฺส… สกทาคามิผลสฺส… อนาคามิมคฺคสฺส… อนาคามิผลสฺส… อรหตฺตมคฺคสฺส… อรหตฺตผลสฺส ปตฺติ อสงฺขตาติ? อามนฺตาฯ นิพฺพานํ…เป.… อจฺจุตํ อมตนฺติ? น เหวํ วตฺตพฺเพ…เป.… อรหตฺตผลสฺส ปตฺติ อสงฺขตา, นิพฺพานํ อสงฺขตนฺติ? อามนฺตา ฯ ทฺเว อสงฺขตานีติ? น เหวํ วตฺตพฺเพ…เป.… ทฺเว อสงฺขตานีติ? อามนฺตาฯ ทฺเว ตาณานิ…เป.… อนฺตริกา วาติ? น เหวํ วตฺตพฺเพ…เป.…ฯ

โสตาปตฺติมคฺคสฺส ปตฺติ อสงฺขตา… โสตาปตฺติผลสฺส ปตฺติ อสงฺขตา… อรหตฺตมคฺคสฺส ปตฺติ อสงฺขตา… อรหตฺตผลสฺส ปตฺติ อสงฺขตา… นิพฺพานํ อสงฺขตนฺติ? อามนฺตาฯ นว อสงฺขตานีติ? น เหวํ วตฺตพฺเพ…เป.… นว อสงฺขตานีติ? อามนฺตาฯ นว ตาณานิ…เป.… อนฺตริกา วาติ? น เหวํ วตฺตพฺเพ…เป.…ฯ

[840] น วตฺตพฺพํ – ปตฺติ อสงฺขตาติ? อามนฺตาฯ ปตฺติ รูปํ … เวทนา… สญฺญา… สงฺขารา… วิญฺญาณนฺติ? น เหวํ วตฺตพฺเพฯ เตน หิ ปตฺติ อสงฺขตาติฯ

ปตฺติกถา นิฏฺฐิตาฯ

19. เอกูนวีสติมวคฺโค