น วตฺตพฺพํ – ‘‘สงฺโฆ ภุญฺชติ ปิวติ ขาทติ สายตี’’ติ? อามนฺตาฯ นนุ วุตฺตํ ภควตา – ‘‘คณโภชนํ ปรมฺปรโภชนํ อติริตฺตโภชนํ อนติริตฺตโภชน’’นฺติ? อามนฺตาฯ หญฺจิ วุตฺตํ ภควตา – ‘‘คณโภชนํ ปรมฺปรโภชนํ อติริตฺตโภชนํ อนติริตฺตโภชนํ’’, เตน วต เร วตฺตพฺเพ – ‘‘สงฺโฆ ภุญฺชติ ปิวติ ขาทติ สายตี’’ติฯ
น วตฺตพฺพํ – ‘‘สงฺโฆ ภุญฺชติ ปิวติ ขาทติ สายตี’’ติ? อามนฺตาฯ นนุ อฏฺฐ ปานานิ วุตฺตานิ ภควตา – อมฺพปานํ, ชมฺพุปานํ , โจจปานํ, โมจปานํ, มธุกปานํ, [มธุปานํ (สี. สฺยา. กํ. ปี.) มหาว. 300 ปน ปสฺสิตพฺพํ] มุทฺทิกปานํ, สาลุกปานํ, ผารุสกปานนฺติ? อามนฺตาฯ หญฺจิ อฏฺฐ ปานานิ วุตฺตานิ ภควตา – อมฺพปานํ, ชมฺพุปานํ, โจจปานํ, โมจปานํ, มธุกปานํ, มุทฺทิกปานํ , สาลุกปานํ, ผารุสกปานํ, เตน วต เร วตฺตพฺเพ – ‘‘สงฺโฆ ภุญฺชติ ปิวติ ขาทติ สายตี’’ติฯ
[796] สงฺโฆ ภุญฺชติ ปิวติ ขาทติ สายตีติ? อามนฺตาฯ มคฺโค ภุญฺชติ ปิวติ ขาทติ สายติ, ผลํ ภุญฺชติ ปิวติ ขาทติ สายตีติ? น เหวํ วตฺตพฺเพ…เป.…ฯ
น วตฺตพฺพํ สงฺโฆ ภุญฺชตีติกถา นิฏฺฐิตาฯ
17. สตฺตรสมวคฺโค
(174) 9. น วตฺตพฺพํ สงฺฆสฺสทินฺนํ มหปฺผลนฺติกถา
[797] น วตฺตพฺพํ – ‘‘สงฺฆสฺส ทินฺนํ มหปฺผล’’นฺติ? อามนฺตาฯ นนุ สงฺโฆ อาหุเนยฺโย ปาหุเนยฺโย ทกฺขิเณยฺโย อญฺชลิกรณีโย อนุตฺตรํ ปุญฺญกฺเขตฺตํ โลกสฺสาติ? อามนฺตาฯ หญฺจิ สงฺโฆ อาหุเนยฺโย…เป.… อนุตฺตรํ ปุญฺญกฺเขตฺตํ โลกสฺส, เตน วต เร วตฺตพฺเพ – ‘‘สงฺฆสฺส ทินฺนํ มหปฺผล’’นฺติฯ
น วตฺตพฺพํ – ‘‘สงฺฆสฺส ทินฺนํ มหปฺผล’’นฺติ? อามนฺตาฯ นนุ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตาติ? อามนฺตาฯ หญฺจิ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตา, เตน วต เร วตฺตพฺเพ – ‘‘สงฺฆสฺส ทินฺนํ มหปฺผล’’นฺติฯ
[798] น วตฺตพฺพํ – ‘‘สงฺฆสฺส ทินฺนํ มหปฺผล’’นฺติ? อามนฺตาฯ นนุ วุตฺตํ ภควตา – ‘‘สงฺเฆ, โคตมิ, เทหิ, สงฺเฆ เต ทินฺเน อหญฺเจว ปูชิโต ภวิสฺสามิ สงฺโฆ จา’’ติ [ม. นิ. 3.376]ฯ อตฺเถว สุตฺตนฺโตติ? อามนฺตาฯ เตน หิ สงฺฆสฺส ทินฺนํ มหปฺผลนฺติฯ
น วตฺตพฺพํ – ‘‘สงฺฆสฺส ทินฺนํ มหปฺผล’’นฺติ? อามนฺตาฯ นนุ สกฺโก เทวานมินฺโท ภควนฺตํ เอตทโวจ –
‘‘ยชมานานํ มนุสฺสานํ, ปุญฺญเปกฺขาน ปาณินํ;
กโรตํ โอปธิกํ ปุญฺญํ, กตฺถ ทินฺนํ มหปฺผลนฺติฯ
‘‘จตฺตาโร จ ปฏิปนฺนา, จตฺตาโร จ ผเล ฐิตา;
เอส สงฺโฆ อุชุภูโต, ปญฺญาสีลสมาหิโตฯ
‘‘ยชมานานํ มนุสฺสานํ, ปุญฺญเปกฺขาน ปาณินํ;
กโรตํ โอปธิกํ ปุญฺญํ, สงฺเฆ ทินฺนํ มหปฺผล’’นฺติ [สํ. นิ. 1.262; วิ. ว. 642, 751]ฯ
‘‘เอโส หิ สงฺโฆ วิปุโล มหคฺคโต,
เอสปฺปเมยฺโย อุทธีว สาคโร;
เอเต หิ เสฏฺฐา นรวีรสาวกา [นรสีหสาวกา (ก.)],
ปภงฺกรา ธมฺมมุทีรยนฺติฯ
‘‘เตสํ สุทินฺนํ สุหุตํ สุยิฏฺฐํ,
เย สงฺฆมุทฺทิสฺส ททนฺติ ทานํ;
สา ทกฺขิณา สงฺฆคตา ปติฏฺฐิตา,
มหปฺผลา โลกวิทูน วณฺณิตาฯ
‘‘เอตาทิสํ ยญฺญมนุสฺสรนฺตา,
เย เวทชาตา วิจรนฺติ [วิหรนฺติ (สี. ก.)] โลเก;
วิเนยฺย มจฺเฉรมลํ สมูลํ,
อนินฺทิตา สคฺคมุเปนฺติ ฐาน’’นฺติ [วิ. ว. 645, 754]ฯ
อตฺเถว สุตฺตนฺโตติ? อามนฺตาฯ เตน หิ สงฺฆสฺส ทินฺนํ มหปฺผลนฺติฯ
น วตฺตพฺพํ สงฺฆสฺส ทินฺนํ มหปฺผลนฺติกถา นิฏฺฐิตาฯ
17. สตฺตรสมวคฺโค