เมนู

(154) 10. อสญฺญสตฺตุปิกกถา

[735] สญฺญาเวทยิตนิโรธสมาปตฺติ อสญฺญสตฺตุปิกาติ? อามนฺตาฯ อตฺถิ สญฺญาเวทยิตนิโรธํ สมาปนฺนสฺส อโลโภ กุสลมูลํ , อโทโส กุสลมูลํ, อโมโห กุสลมูลํ, สทฺธา วีริยํ สติ สมาธิ ปญฺญาติ? น เหวํ วตฺตพฺเพ…เป.… นตฺถิ สญฺญาเวทยิตนิโรธํ สมาปนฺนสฺส อโลโภ กุสลมูลํ , อโทโส กุสลมูลํ…เป.… ปญฺญาติ? อามนฺตาฯ หญฺจิ นตฺถิ สญฺญาเวทยิตนิโรธํ สมาปนฺนสฺส อโลโภ กุสลมูลํ, อโทโส กุสลมูลํ, อโมโห กุสลมูลํ, สทฺธา วีริยํ สติ สมาธิ ปญฺญา, โน จ วต เร วตฺตพฺเพ – ‘‘สญฺญาเวทยิตนิโรธสมาปตฺติ อสญฺญสตฺตุปิกา’’ติฯ

สญฺญาเวทยิตนิโรธสมาปตฺติ อสญฺญสตฺตุปิกาติ? อามนฺตาฯ อตฺถิ สญฺญาเวทยิตนิโรธํ สมาปนฺนสฺส ผสฺโส เวทนา สญฺญา เจตนา จิตฺตนฺติ? น เหวํ วตฺตพฺเพ…เป.… นตฺถิ สญฺญาเวทยิตนิโรธํ สมาปนฺนสฺส ผสฺโส เวทนา สญฺญา เจตนา จิตฺตนฺติ? อามนฺตาฯ อผสฺสกสฺส มคฺคภาวนา…เป.… อจิตฺตกสฺส มคฺคภาวนาติ? น เหวํ วตฺตพฺเพ…เป.… นนุ สผสฺสกสฺส มคฺคภาวนา…เป.… สจิตฺตกสฺส มคฺคภาวนาติ? อามนฺตาฯ หญฺจิ สผสฺสกสฺส มคฺคภาวนา…เป.… สจิตฺตกสฺส มคฺคภาวนา, โน จ วต เร วตฺตพฺเพ – ‘‘สญฺญาเวทยิตนิโรธสมาปตฺติ อสญฺญสตฺตุปิกา’’ติฯ

สญฺญาเวทยิตนิโรธสมาปตฺติ อสญฺญสตฺตุปิกาติ? อามนฺตาฯ เย เกจิ สญฺญาเวทยิตนิโรธํ สมาปชฺชนฺติ, สพฺเพ เต อสญฺญสตฺตุปิกาติ? น เหวํ วตฺตพฺเพ…เป.…ฯ

[736] น วตฺตพฺพํ – ‘‘สญฺญาเวทยิตนิโรธสมาปตฺติ อสญฺญสตฺตุปิกา’’ติ? อามนฺตาฯ นนุ อิธาปิ อสญฺญี ตตฺราปิ อสญฺญีติ? อามนฺตาฯ หญฺจิ อิธาปิ อสญฺญี ตตฺราปิ อสญฺญี, เตน วต เร วตฺตพฺเพ – ‘‘สญฺญาเวทยิตนิโรธสมาปตฺติ อสญฺญสตฺตุปิกา’’ติฯ

อสญฺญสตฺตุปิกกถา นิฏฺฐิตาฯ

15. ปนฺนรสมวคฺโค

(155) 11. กมฺมูปจยกถา

[737] อญฺญํ กมฺมํ อญฺโญ กมฺมูปจโยติ? อามนฺตาฯ อญฺโญ ผสฺโส, อญฺโญ ผสฺสูปจโย; อญฺญา เวทนา, อญฺโญ เวทนูปจโย; อญฺญา สญฺญา, อญฺโญ สญฺญูปจโย; อญฺญา เจตนา, อญฺโญ เจตนูปจโย; อญฺญํ จิตฺตํ, อญฺโญ จิตฺตูปจโย; อญฺญา สทฺธา, อญฺโญ สทฺธูปจโย; อญฺญํ วีริยํ, อญฺโญ วีริยูปจโย; อญฺญา สติ, อญฺโญ สตูปจโย ; อญฺโญ สมาธิ, อญฺโญ สมาธูปจโย; อญฺญา ปญฺญา, อญฺโญ ปญฺญูปจโย; อญฺโญ ราโค, อญฺโญ ราคูปจโย…เป.… อญฺญํ อโนตฺตปฺปํ, อญฺโญ อโนตฺตปฺปูปจโยติ? น เหวํ วตฺตพฺเพ…เป.…ฯ

[738] อญฺญํ กมฺมํ, อญฺโญ กมฺมูปจโยติ? อามนฺตาฯ กมฺมูปจโย กมฺเมน สหชาโตติ? น เหวํ วตฺตพฺเพ…เป.…ฯ

กมฺมูปจโย กมฺเมน สหชาโตติ, อามนฺตาฯ กุสเลน กมฺเมน สหชาโต กมฺมูปจโย กุสโลติ, น เหวํ วตฺตพฺเพ…เป.…ฯ

กุสเลน กมฺเมน สหชาโต กมฺมูปจโย กุสโลติ? อามนฺตาฯ สุขาย เวทนาย สมฺปยุตฺเตน กมฺเมน สหชาโต กมฺมูปจโย สุขาย เวทนาย สมฺปยุตฺโตติ? น เหวํ วตฺตพฺเพ…เป.… ทุกฺขาย เวทนาย…เป.… อทุกฺขมสุขาย เวทนาย สมฺปยุตฺเตน กมฺเมน สหชาโต กมฺมูปจโย อทุกฺขมสุขาย เวทนาย สมฺปยุตฺโตติ? น เหวํ วตฺตพฺเพ…เป.…ฯ

[739] กมฺมูปจโย กมฺเมน สหชาโตติ? อามนฺตาฯ อกุสเลน กมฺเมน สหชาโต กมฺมูปจโย อกุสโลติ? น เหวํ วตฺตพฺเพ…เป.…ฯ

อกุสเลน กมฺเมน สหชาโต กมฺมูปจโย อกุสโลติ? อามนฺตาฯ สุขาย เวทนาย สมฺปยุตฺเตน กมฺเมน สหชาโต กมฺมูปจโย สุขาย เวทนาย สมฺปยุตฺโตติ? น เหวํ วตฺตพฺเพ…เป.… ทุกฺขาย เวทนาย…เป.… อทุกฺขมสุขาย เวทนาย สมฺปยุตฺเตน กมฺเมน สหชาโต กมฺมูปจโย อทุกฺขมสุขาย เวทนาย สมฺปยุตฺโตติ? น เหวํ วตฺตพฺเพ…เป.…ฯ

[740] กมฺมํ จิตฺเตน สหชาตํ, กมฺมํ สารมฺมณนฺติ? อามนฺตาฯ กมฺมูปจโย จิตฺเตน สหชาโต, กมฺมูปจโย สารมฺมโณติ? น เหวํ วตฺตพฺเพ…เป.… กมฺมูปจโย จิตฺเตน สหชาโต , กมฺมูปจโย อนารมฺมโณติ ? อามนฺตาฯ กมฺมํ จิตฺเตน สหชาตํ, กมฺมํ อนารมฺมณนฺติ? น เหวํ วตฺตพฺเพ…เป.…ฯ