เมนู

(150) 6. ชรามรณกถา

[726] โลกุตฺตรานํ ธมฺมานํ ชรามรณํ โลกุตฺตรนฺติ? อามนฺตาฯ มคฺโค ผลํ นิพฺพานํ, โสตาปตฺติมคฺโค โสตาปตฺติผลํ…เป.… โพชฺฌงฺโคติ ? น เหวํ วตฺตพฺเพ…เป.… โสตาปตฺติมคฺคสฺส ชรามรณํ โสตาปตฺติมคฺโคติ? น เหวํ วตฺตพฺเพ…เป.… โสตาปตฺติมคฺคสฺส ชรามรณํ โสตาปตฺติมคฺโคติ? อามนฺตาฯ โสตาปตฺติผลสฺส ชรามรณํ โสตาปตฺติผลนฺติ? น เหวํ วตฺตพฺเพ …เป.… สกทาคามิมคฺคสฺส…เป.… สกทาคามิผลสฺส…เป.… อนาคามิมคฺคสฺส…เป.… อนาคามิผลสฺส…เป.… อรหตฺตมคฺคสฺส ชรามรณํ อรหตฺตมคฺโคติ? น เหวํ วตฺตพฺเพ…เป.… อรหตฺตมคฺคสฺส ชรามรณํ อรหตฺตมคฺโคติ? อามนฺตาฯ อรหตฺตผลสฺส ชรามรณํ อรหตฺตผลนฺติ? น เหวํ วตฺตพฺเพ…เป.… สติปฏฺฐานานํ… สมฺมปฺปธานานํ… อิทฺธิปาทานํ… อินฺทฺริยานํ… พลานํ… โพชฺฌงฺคานํ ชรามรณํ โพชฺฌงฺโคติ? น เหวํ วตฺตพฺเพ…เป.…ฯ

[727] น วตฺตพฺพํ – ‘‘โลกุตฺตรานํ ธมฺมานํ ชรามรณํ โลกุตฺตรนฺติ? อามนฺตาฯ โลกิยนฺติ? น เหวํ วตฺตพฺเพฯ เตน หิ โลกุตฺตรนฺติฯ

ชรามรณกถา นิฏฺฐิตาฯ

15. ปนฺนรสมวคฺโค

(151) 7. สญฺญาเวทยิตกถา

[728] สญฺญาเวทยิตนิโรธสมาปตฺติ โลกุตฺตราติ? อามนฺตาฯ มคฺโค ผลํ นิพฺพานํ, โสตาปตฺติมคฺโค โสตาปตฺติผลํ…เป.… โพชฺฌงฺโคติ? น เหวํ วตฺตพฺเพ…เป.…ฯ

[729] น วตฺตพฺพํ – ‘‘สญฺญาเวทยิตนิโรธสมาปตฺติ โลกุตฺตราติ? อามนฺตาฯ โลกิยาติ? น เหวํ วตฺตพฺเพฯ เตน หิ โลกุตฺตราติฯ

สญฺญาเวทยิตกถา นิฏฺฐิตาฯ

15. ปนฺนรสมวคฺโค

(152) 8. ทุติยสญฺญาเวทยิตกถา

[730] สญฺญาเวทยิตนิโรธสมาปตฺติ โลกิยาติ? อามนฺตาฯ รูปนฺติ? น เหวํ วตฺตพฺเพ…เป.… เวทนา… สญฺญา… สงฺขารา… วิญฺญาณนฺติ? น เหวํ วตฺตพฺเพ…เป.… กามาวจราติ? น เหวํ วตฺตพฺเพ…เป.… รูปาวจราติ? น เหวํ วตฺตพฺเพ…เป.… อรูปาวจราติ? น เหวํ วตฺตพฺเพ…เป.…ฯ

[731] วตฺตพฺพํ – ‘‘สญฺญาเวทยิตนิโรธสมาปตฺติ โลกิยาติ? อามนฺตาฯ โลกุตฺตราติ? น เหวํ วตฺตพฺเพฯ เตน หิ โลกิยาติฯ

ทุติยสญฺญาเวทยิตกถา นิฏฺฐิตาฯ

15. ปนฺนรสมวคฺโค

(153) 9. ตติยสญฺญาเวทยิตกถา

[732] สญฺญาเวทยิตนิโรธํ สมาปนฺโน กาลํ กเรยฺยาติ? อามนฺตาฯ อตฺถิ สญฺญาเวทยิตนิโรธํ สมาปนฺนสฺส มารณนฺติโย ผสฺโส, มารณนฺติยา เวทนา, มารณนฺติยา สญฺญา, มารณนฺติยา เจตนา , มารณนฺติยํ จิตฺตนฺติ? น เหวํ วตฺตพฺเพ…เป.… นตฺถิ สญฺญาเวทยิตนิโรธํ สมาปนฺนสฺส มารณนฺติโย ผสฺโส, มารณนฺติยา เวทนา, มารณนฺติยา สญฺญา, มารณนฺติยา เจตนา, มารณนฺติยํ จิตฺตนฺติ? อามนฺตาฯ หญฺจิ นตฺถิ สญฺญาเวทยิตนิโรธํ สมาปนฺนสฺส มารณนฺติโย ผสฺโส, มารณนฺติยา เวทนา, มารณนฺติยา สญฺญา, มารณนฺติยา เจตนา, มารณนฺติยํ จิตฺตํ, โน จ วต เร วตฺตพฺเพ – ‘‘สญฺญาเวทยิตนิโรธํ สมาปนฺโน กาลํ กเรยฺยา’’ติฯ

สญฺญาเวทยิตนิโรธํ สมาปนฺโน กาลํ กเรยฺยาติ? อามนฺตาฯ อตฺถิ สญฺญาเวทยิตนิโรธํ สมาปนฺนสฺส ผสฺโส เวทนา สญฺญา เจตนา จิตฺตนฺติ? น เหวํ วตฺตพฺเพ…เป.… นตฺถิ สญฺญาเวทยิตนิโรธํ สมาปนฺนสฺส ผสฺโส เวทนา สญฺญา เจตนา จิตฺตนฺติ? อามนฺตาฯ อผสฺสกสฺส กาลํ กิริยา, อเวทนกสฺส กาลํ กิริยา…เป.… อจิตฺตกสฺส กาลํ กิริยาติ? น เหวํ วตฺตพฺเพ…เป.… นนุ สผสฺสกสฺส กาลํ กิริยา…เป.… สจิตฺตกสฺส กาลํ กิริยาติ? อามนฺตาฯ หญฺจิ สผสฺสกสฺส กาลํ กิริยา…เป.… สจิตฺตกสฺส กาลํ กิริยา, โน จ วต เร วตฺตพฺเพ – ‘‘สญฺญาเวทยิตนิโรธํ สมาปนฺโน กาลํ กเรยฺยา’’ติฯ

สญฺญาเวทยิตนิโรธํ สมาปนฺโน กาลํ กเรยฺยาติ? อามนฺตาฯ สญฺญาเวทยิตนิโรธํ สมาปนฺนสฺส กาเย วิสํ กเมยฺย, สตฺถํ กเมยฺย, อคฺคิ กเมยฺยาติ? น เหวํ วตฺตพฺเพ…เป.… สญฺญาเวทยิตนิโรธํ สมาปนฺนสฺส กาเย วิสํ น กเมยฺย, สตฺถํ น กเมยฺย, อคฺคิ น กเมยฺยาติ? อามนฺตาฯ