เมนู

อญฺโญ ภวราคานุสโย อญฺญํ ภวราคปริยุฏฺฐานนฺติ? อามนฺตาฯ อญฺโญ ภวราโค อญฺญํ ภวราคปริยุฏฺฐานนฺติ? น เหวํ วตฺตพฺเพ…เป.… สฺเวว ภวราโค ตํ ภวราคปริยุฏฺฐานนฺติ? อามนฺตาฯ สฺเวว ภวราคานุสโย ตํ ภวราคปริยุฏฺฐานนฺติ? น เหวํ วตฺตพฺเพ…เป.…ฯ

อญฺโญ อวิชฺชานุสโย อญฺญํ อวิชฺชาปริยุฏฺฐานนฺติ? อามนฺตาฯ อญฺญา อวิชฺชา อญฺญํ อวิชฺชาปริยุฏฺฐานนฺติ? น เหวํ วตฺตพฺเพ…เป.… สาว อวิชฺชา ตํ อวิชฺชาปริยุฏฺฐานนฺติ? อามนฺตาฯ สฺเวว อวิชฺชานุสโย ตํ อวิชฺชาปริยุฏฺฐานนฺติ? น เหวํ วตฺตพฺเพ…เป.…ฯ

[701] น วตฺตพฺพํ – ‘‘อญฺโญ อนุสโย อญฺญํ ปริยุฏฺฐาน’’นฺติ? อามนฺตา ฯ ปุถุชฺชโน กุสลาพฺยากเต จิตฺเต วตฺตมาเน ‘‘สานุสโย’’ติ วตฺตพฺโพติ? อามนฺตาฯ ‘‘ปริยุฏฺฐิโต’’ติ วตฺตพฺโพติ? น เหวํ วตฺตพฺเพฯ เตน หิ อญฺโญ อนุสโย อญฺญํ ปริยุฏฺฐานนฺติฯ ปุถุชฺชโน กุสลาพฺยากเต จิตฺเต วตฺตมาเน ‘‘สราโค’’ติ วตฺตพฺโพติ? อามนฺตาฯ ‘‘ปริยุฏฺฐิโต’’ติ วตฺตพฺโพติ? น เหวํ วตฺตพฺเพฯ เตน หิ อญฺโญ ราโค อญฺญํ ปริยุฏฺฐานนฺติฯ

อญฺโญ อนุสโยติกถา นิฏฺฐิตาฯ

14. จุทฺทสมวคฺโค

(141) 6. ปริยุฏฺฐานํ จิตฺตวิปฺปยุตฺตนฺติกถา

[702] ปริยุฏฺฐานํ จิตฺตวิปฺปยุตฺตนฺติ? อามนฺตาฯ รูปํ นิพฺพานํ จกฺขายตนํ…เป.… โผฏฺฐพฺพายตนนฺติ? น เหวํ วตฺตพฺเพ…เป.… ปริยุฏฺฐานํ จิตฺตวิปฺปยุตฺตนฺติ? อามนฺตาฯ นตฺถิ สราคํ จิตฺตํ สโทสํ จิตฺตํ สโมหํ จิตฺตํ…เป.… อกุสลํ จิตฺตํ สํกิลิฏฺฐํ จิตฺตนฺติ? น เหวํ วตฺตพฺเพ…เป.… นนุ อตฺถิ สราคํ จิตฺตํ สโทสํ จิตฺตํ สโมหํ จิตฺตํ…เป.… อกุสลํ จิตฺตํ สํกิลิฏฺฐํ จิตฺตนฺติ? อามนฺตาฯ หญฺจิ อตฺถิ สราคํ จิตฺตํ สโทสํ จิตฺตํ สโมหํ จิตฺตํ…เป.… อกุสลํ จิตฺตํ สํกิลิฏฺฐํ จิตฺตํ, โน จ วต เร วตฺตพฺเพ – ‘‘ปริยุฏฺฐานํ จิตฺตวิปฺปยุตฺต’’นฺติฯ

ปริยุฏฺฐานํ จิตฺตวิปฺปยุตฺตนฺติกถา นิฏฺฐิตาฯ

14. จุทฺทสมวคฺโค

(142) 7. ปริยาปนฺนกถา

[703] รูปราโค รูปธาตุํ อนุเสติ, รูปธาตุปริยาปนฺโนติ? อามนฺตาฯ สมาปตฺเตสิโย อุปปตฺเตสิโย ทิฏฺฐธมฺมสุขวิหาโร, สมาปตฺเตสิเยน จิตฺเตน อุปปตฺเตสิเยน จิตฺเตน ทิฏฺฐธมฺมสุขวิหาเรน จิตฺเตน สหคโต สหชาโต สํสฏฺโฐ สมฺปยุตฺโต เอกุปฺปาโท เอกนิโรโธ เอกวตฺถุโก เอการมฺมโณติ? น เหวํ วตฺตพฺเพ…เป.… นนุ น สมาปตฺเตสิโย น อุปปตฺเตสิโย น ทิฏฺฐธมฺมสุขวิหาโร, น สมาปตฺเตสิเยน จิตฺเตน น อุปปตฺเตสิเยน จิตฺเตน น ทิฏฺฐธมฺมสุขวิหาเรน จิตฺเตน สหคโต สหชาโต สํสฏฺโฐ สมฺปยุตฺโต เอกุปฺปาโท เอกนิโรโธ เอกวตฺถุโก เอการมฺมโณติ? อามนฺตาฯ หญฺจิ น สมาปตฺเตสิโย น อุปปตฺเตสิโย น ทิฏฺฐธมฺมสุขวิหาโร…เป.… เอการมฺมโณ, โน จ วต เร วตฺตพฺเพ – ‘‘รูปราโค รูปธาตุํ อนุเสติ, รูปธาตุปริยาปนฺโน’’ติ…เป.…ฯ

รูปราโค รูปธาตุํ อนุเสติ, รูปธาตุปริยาปนฺโนติ? อามนฺตาฯ สทฺทราโค สทฺทธาตุํ อนุเสติ, สทฺทธาตุปริยาปนฺโนติ? น เหวํ วตฺตพฺเพ…เป.… รูปราโค รูปธาตุํ อนุเสติ, รูปธาตุปริยาปนฺโนติ? อามนฺตาฯ คนฺธราโค…เป.… รสราโค…เป.… โผฏฺฐพฺพราโค โผฏฺฐพฺพธาตุํ อนุเสติ, โผฏฺฐพฺพธาตุปริยาปนฺโนติ? น เหวํ วตฺตพฺเพ…เป.…ฯ

สทฺทราโค สทฺทธาตุํ อนุเสติ, น วตฺตพฺพํ – ‘‘สทฺทธาตุปริยาปนฺโน’’ติ? อามนฺตาฯ รูปราโค รูปธาตุํ อนุเสติ, น วตฺตพฺพํ – ‘‘รูปธาตุปริยาปนฺโน’’ติ? น เหวํ วตฺตพฺเพ…เป.… คนฺธราโค…เป.… รสราโค…เป.… โผฏฺฐพฺพราโค โผฏฺฐพฺพธาตุํ อนุเสติ, น วตฺตพฺพํ – ‘‘โผฏฺฐพฺพธาตุปริยาปนฺโน’’ติ? อามนฺตาฯ รูปราโค รูปธาตุํ อนุเสติ, น วตฺตพฺพํ – ‘‘รูปธาตุปริยาปนฺโน’’ติ? น เหวํ วตฺตพฺเพ…เป.…ฯ

[704] อรูปราโค อรูปธาตุํ อนุเสติ, อรูปธาตุปริยาปนฺโนติ? อามนฺตา