เมนู

อรหโต ปหีนา ทุคฺคติ, อรหา ติตฺติรวฏฺฏกโมรกปิญฺชรํ ปฏิคฺคณฺเหยฺยาติ? น เหวํ วตฺตพฺเพ…เป.…ฯ

อรหโต ปหีนา ทุคฺคติ, น จ อรหา อาปายิเก รูเป รชฺเชยฺยาติ? อามนฺตาฯ ทิฏฺฐิสมฺปนฺนสฺส ปุคฺคลสฺส ปหีนา ทุคฺคติ, น จ ทิฏฺฐิสมฺปนฺโน ปุคฺคโล อาปายิเก รูเป รชฺเชยฺยาติ? น เหวํ วตฺตพฺเพ…เป.… อรหโต ปหีนา ทุคฺคติ, น จ อรหา อาปายิเก สทฺเท…เป.… คนฺเธ…เป.… รเส…เป.… โผฏฺฐพฺเพ…เป.… อมนุสฺสิตฺถิยา ติรจฺฉานคติตฺถิยา นาคกญฺญาย เมถุนํ ธมฺมํ ปฏิเสเวยฺย, อเชฬกํ ปฏิคฺคณฺเหยฺย, กุกฺกุฏสูกรํ ปฏิคฺคณฺเหยฺย, หตฺถิควสฺสวฬวํ ปฏิคฺคณฺเหยฺย…เป.… ติตฺติรวฏฺฏกโมรกปิญฺชรํ ปฏิคฺคณฺเหยฺยาติ? อามนฺตา ฯ ทิฏฺฐิสมฺปนฺนสฺส ปุคฺคลสฺส ปหีนา ทุคฺคติ, น จ ทิฏฺฐิสมฺปนฺโน ปุคฺคโล ติตฺติรวฏฺฏกโมรกปิญฺชรํ ปฏิคฺคณฺเหยฺยาติ? น เหวํ วตฺตพฺเพ…เป.…ฯ

[652] [อฏฺฐกถานุโลมํ ปรวาทีปุจฺฉาลกฺขณํฯ ตถาปายํ ปุจฺฉา สกวาทิสฺส, ปุริมาโย จ อิมิสฺสํ ทุคฺคติกถายํ ปรวาทิสฺสาติ คเหตพฺพา วิย ทิสฺสนฺติ] น วตฺตพฺพํ – ‘‘ทิฏฺฐิสมฺปนฺนสฺส ปุคฺคลสฺส ปหีนา ทุคฺคตี’’ติ? อามนฺตาฯ ทิฏฺฐิสมฺปนฺโน ปุคฺคโล นิรยํ อุปปชฺเชยฺย…เป.… ติรจฺฉานโยนิํ อุปปชฺเชยฺย… เปตฺติวิสยํ อุปปชฺเชยฺยาติ? น เหวํ วตฺตพฺเพฯ เตน หิ ทิฏฺฐิสมฺปนฺนสฺส ปุคฺคลสฺส ปหีนา ทุคฺคตีติฯ

ทุคฺคติกถา นิฏฺฐิตาฯ

12. ทฺวาทสมวคฺโค

(125) 10. สตฺตมภวิกกถา

[653] วตฺตพฺพํ ‘‘สตฺตมภวิกสฺส ปุคฺคลสฺส ปหีนา ทุคฺคตี’’ติ? อามนฺตาฯ สตฺตมภวิโก ปุคฺคโล นิรยํ อุปปชฺเชยฺย, ติรจฺฉานโยนิํ อุปปชฺเชยฺย, เปตฺติวิสยํ อุปปชฺเชยฺยาติ? น เหวํ วตฺตพฺเพฯ เตน หิ สตฺตมภวิกสฺส ปุคฺคลสฺส ปหีนา ทุคฺคตีติฯ

สตฺตมภวิกกถา นิฏฺฐิตาฯ

ทฺวาทสมวคฺโคฯ

ตสฺสุทฺทานํ –

สํวโร กมฺมํ ตเถว อสํวโร, สพฺพกมฺมํ สวิปากํ, สทฺโท วิปาโก, สฬายตนํ วิปาโก, สตฺตกฺขตฺตุปรโม ปุคฺคโล สตฺตกฺขตฺตุปรมตานิยโต, โกลงฺโกลปุคฺคโล โกลงฺโกลตานิยโต, เอกพีชี ปุคฺคโล เอกพีชิตานิยโต, ทิฏฺฐิสมฺปนฺโน ปุคฺคโล สญฺจิจฺจ ปาณํ ชีวิตา โวโรเปยฺย, ทิฏฺฐิสมฺปนฺนสฺส ปุคฺคลสฺส ปหีนา ทุคฺคติ, ตเถว สตฺตมภวิกสฺสาติฯ

13. เตรสมวคฺโค

(126) 1. กปฺปฏฺฐกถา

[654] กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺโป จ สณฺฐาติ พุทฺโธ จ โลเก อุปฺปชฺชตีติ? น เหวํ วตฺตพฺเพ…เป.…ฯ กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺโป จ สณฺฐาติ สงฺโฆ จ ภิชฺชตีติ? น เหวํ วตฺตพฺเพ…เป.… กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺโป จ สณฺฐาติ กปฺปฏฺโฐ จ กปฺปฏฺฐิยํ กมฺมํ กโรตีติ? น เหวํ วตฺตพฺเพ…เป.… กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺโป จ สณฺฐาติ กปฺปฏฺโฐ จ ปุคฺคโล กาลํ กโรตีติ? น เหวํ วตฺตพฺเพ…เป.…ฯ

[655] กปฺปฏฺโฐ กปฺปํ ติฏฺเฐยฺยาติ? อามนฺตาฯ อตีตํ กปฺปํ ติฏฺเฐยฺย, อนาคตํ กปฺปํ ติฏฺเฐยฺยาติ? น เหวํ วตฺตพฺเพ…เป.… กปฺปฏฺโฐ กปฺปํ ติฏฺเฐยฺยาติ? อามนฺตาฯ ทฺเว กปฺเป ติฏฺเฐยฺย… ตโย กปฺเป ติฏฺเฐยฺย… จตฺตาโร กปฺเป ติฏฺเฐยฺยาติ? น เหวํ วตฺตพฺเพ…เป.…ฯ

[656] กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺปฏฺโฐ กปฺเป ฑยฺหนฺเต กตฺถ คจฺฉตีติ? อญฺญํ โลกธาตุํ คจฺฉตีติฯ มโต คจฺฉติ, เวหาสํ คจฺฉตีติ? มโต คจฺฉตีติฯ กปฺปฏฺฐิยํ กมฺมํ อปราปริยเวปกฺกนฺติ? น เหวํ วตฺตพฺเพ…เป.… [เวหาสํ คจฺฉตีติ (?) อยํ หิ ปรวาทิสฺส ปฏิญฺญาเยว, กถา. 621-623 นวมปนฺติยํ วิย] เวหาสํ คจฺฉตีติ? อามนฺตา [เวหาสํ คจฺฉตีติ (?) อยํ หิ ปรวาทิสฺส ปฏิญฺญาเยว, กถา. 621-623 นวมปนฺติยํ วิย]ฯ กปฺปฏฺโฐ อิทฺธิมาติ? น เหวํ วตฺตพฺเพ…เป.… กปฺปฏฺโฐ อิทฺธิมาติ? อามนฺตาฯ