เวทนา …เป.… สญฺญา… สงฺขารา…เป.… วิญฺญาณํ ปรินิปฺผนฺนํ, วิญฺญาณสฺส อนิจฺจตา อตฺถีติ? อามนฺตาฯ อนิจฺจตา ปรินิปฺผนฺนา, อนิจฺจตาย อนิจฺจตา อตฺถีติ? น เหวํ วตฺตพฺเพ …เป.… วิญฺญาณํ ปรินิปฺผนฺนํ, วิญฺญาณสฺส ชรา อตฺถีติ? อามนฺตาฯ ชรา ปรินิปฺผนฺนา, ชราย ชรา อตฺถีติ? น เหวํ วตฺตพฺเพ…เป.…ฯ

วิญฺญาณํ ปรินิปฺผนฺนํ, วิญฺญาณสฺส เภโท อตฺถิ, อนฺตรธานํ อตฺถีติ? อามนฺตาฯ มรณํ ปรินิปฺผนฺนํ, มรณสฺส เภโท อตฺถิ, อนฺตรธานํ อตฺถีติ? น เหวํ วตฺตพฺเพ…เป.…ฯ

อนิจฺจตากถา นิฏฺฐิตาฯ

เอกาทสมวคฺโคฯ

ตสฺสุทฺทานํ –

อนุสยา อพฺยากตา, อเหตุกา, จิตฺตวิปฺปยุตฺตา, อญฺญาเณ วิคเต ญาณี, ญาณํ จิตฺตวิปฺปยุตฺตํ, ยตฺถ สทฺเท [ยตฺถ สทฺโท (สี.), ยถาสทฺทํ (?)] ญาณํ ปวตฺตติ, อิทฺธิพเลน สมนฺนาคโต กปฺปํ ติฏฺเฐยฺย, จิตฺตสนฺตติ สมาธิ, ธมฺมฏฺฐิตตา, อนิจฺจตาติฯ

12. ทฺวาทสมวคฺโค

(116) 1. สํวโร กมฺมนฺติกถา

[630] สํวโร กมฺมนฺติ? อามนฺตาฯ จกฺขุนฺทฺริยสํวโร จกฺขุกมฺมนฺติ? น เหวํ วตฺตพฺเพ…เป.… โสตินฺทฺริยสํวโร…เป.… ฆานินฺทฺริยสํวโร…เป.… ชิวฺหินฺทฺริยสํวโร…เป.… กายินฺทฺริยสํวโร กายกมฺมนฺติ? น เหวํ วตฺตพฺเพ…เป.…ฯ

กายินฺทฺริยสํวโร กายกมฺมนฺติ? อามนฺตาฯ จกฺขุนฺทฺริยสํวโร จกฺขุกมฺมนฺติ? น เหวํ วตฺตพฺเพ…เป.… กายินฺทฺริยสํวโร กายกมฺมนฺติ? อามนฺตาฯ โสตินฺทฺริยสํวโร…เป.… ฆานินฺทฺริยสํวโร…เป.… ชิวฺหินฺทฺริยสํวโร ชิวฺหากมฺมนฺติ? น เหวํ วตฺตพฺเพ…เป.… มนินฺทฺริยสํวโร มโนกมฺมนฺติ? น เหวํ วตฺตพฺเพ…เป.…ฯ

มนินฺทฺริยสํวโร มโนกมฺมนฺติ? อามนฺตาฯ จกฺขุนฺทฺริยสํวโร จกฺขุกมฺมนฺติ? น เหวํ วตฺตพฺเพ…เป.… มนินฺทฺริยสํวโร มโนกมฺมนฺติ? อามนฺตาฯ

โสตินฺทฺริยสํวโร …เป.… ฆานินฺทฺริยสํวโร… ชิวฺหินฺทฺริยสํวโร…เป.… กายินฺทฺริยสํวโร กายกมฺมนฺติ? น เหวํ วตฺตพฺเพ…เป.…ฯ

[631] อสํวโร กมฺมนฺติ? อามนฺตาฯ จกฺขุนฺทฺริยอสํวโร จกฺขุกมฺมนฺติ ? น เหวํ วตฺตพฺเพ…เป.… โสตินฺทฺริยอสํวโร…เป.… ฆานินฺทฺริยอสํวโร…เป.… ชิวฺหินฺทฺริยอสํวโร… กายินฺทฺริยอสํวโร กายกมฺมนฺติ? น เหวํ วตฺตพฺเพ…เป.…ฯ

กายินฺทฺริยอสํวโร กายกมฺมนฺติ? อามนฺตาฯ จกฺขุนฺทฺริยอสํวโร จกฺขุกมฺมนฺติ? น เหวํ วตฺตพฺเพ…เป.… กายินฺทฺริยอสํวโร กายกมฺมนฺติ? อามนฺตาฯ โสตินฺทฺริยอสํวโร…เป.… ฆานินฺทฺริยอสํวโร…เป.… ชิวฺหินฺทฺริยอสํวโร ชิวฺหากมฺมนฺติ? น เหวํ วตฺตพฺเพ…เป.… มนินฺทฺริยอสํวโร มโนกมฺมนฺติ? น เหวํ วตฺตพฺเพ…เป.…ฯ

มนินฺทฺริยอสํวโร มโนกมฺมนฺติ? อามนฺตาฯ จกฺขุนฺทฺริยอสํวโร จกฺขุกมฺมนฺติ? น เหวํ วตฺตพฺเพ…เป.… มนินฺทฺริยอสํวโร มโนกมฺมนฺติ? อามนฺตาฯ โสตินฺทฺริยอสํวโร…เป.… ฆานินฺทฺริยอสํวโร…เป.… ชิวฺหินฺทฺริยอสํวโร…เป.… กายินฺทฺริยอสํวโร กายกมฺมนฺติ? น เหวํ วตฺตพฺเพ…เป.…ฯ

[632] น วตฺตพฺพํ – ‘‘สํวโรปิ อสํวโรปิ กมฺม’’นฺติ? อามนฺตาฯ นนุ วุตฺตํ ภควตา – ‘‘อิธ, ภิกฺขเว, ภิกฺขุ จกฺขุนา รูปํ ทิสฺวา นิมิตฺตคฺคาหี โหติ…เป.… น นิมิตฺตคฺคาหี โหติ, โสเตน สทฺทํ สุตฺวา…เป.… มนสา ธมฺมํ วิญฺญาย นิมิตฺตคฺคาหี โหติ…เป.… น นิมิตฺตคฺคาหี โหตี’’ติ! อตฺเถว สุตฺตนฺโตติ? อามนฺตาฯ เตน หิ สํวโรปิ อสํวโรปิ กมฺมนฺติฯ

สํวโร กมฺมนฺติกถา นิฏฺฐิตาฯ

12. ทฺวาทสมวคฺโค