เมนู

(77) 5. รูปธาตุกถา

[515] รูปิโน ธมฺมา รูปธาตูติ? อามนฺตาฯ รูปํ ภโว คติ สตฺตาวาโส สํสาโร โยนิ วิญฺญาณฏฺฐิติ อตฺตภาวปฏิลาโภติ? น เหวํ วตฺตพฺเพ…เป.… อตฺถิ รูปูปคํ กมฺมนฺติ? น เหวํ วตฺตพฺเพ…เป.… อตฺถิ รูปูปคา สตฺตาติ? น เหวํ วตฺตพฺเพ…เป.… รูเป สตฺตา ชายนฺติ ชียนฺติ มียนฺติ จวนฺติ อุปปชฺชนฺตีติ? น เหวํ วตฺตพฺเพ…เป.… รูเป อตฺถิ รูปํ เวทนา สญฺญา สงฺขารา วิญฺญาณนฺติ? น เหวํ วตฺตพฺเพ…เป.… รูปํ ปญฺจโวการภโวติ? น เหวํ วตฺตพฺเพ…เป.…ฯ

รูปธาตุ ภโว คติ…เป.… อตฺตภาวปฏิลาโภติ? อามนฺตาฯ รูปํ ภโว คติ…เป.… อตฺตภาวปฏิลาโภติ? น เหวํ วตฺตพฺเพ…เป.… อตฺถิ รูปธาตูปคํ กมฺมนฺติ? อามนฺตาฯ อตฺถิ รูปูปคํ กมฺมนฺติ? น เหวํ วตฺตพฺเพ…เป.… อตฺถิ รูปธาตูปคา สตฺตาติ? อามนฺตาฯ อตฺถิ รูปูปคา สตฺตาติ? น เหวํ วตฺตพฺเพ…เป.…ฯ

รูปธาตุยา สตฺตา ชายนฺติ ชียนฺติ มียนฺติ จวนฺติ อุปปชฺชนฺตีติ? อามนฺตาฯ รูเป สตฺตา ชายนฺติ ชียนฺติ มียนฺติ จวนฺติ อุปปชฺชนฺตีติ? น เหวํ วตฺตพฺเพ…เป.… รูปธาตุยา อตฺถิ รูปํ เวทนา สญฺญา สงฺขารา วิญฺญาณนฺติ? อามนฺตาฯ รูเป อตฺถิ รูปํ เวทนา สญฺญา สงฺขารา วิญฺญาณนฺติ? น เหวํ วตฺตพฺเพ…เป.… รูปธาตุ ปญฺจโวการภโวติ? อามนฺตาฯ รูปํ ปญฺจโวการภโวติ? น เหวํ วตฺตพฺเพ…เป.…ฯ

[516] รูปิโน ธมฺมา รูปธาตุ, กามธาตุยา อตฺถิ รูปนฺติ? อามนฺตาฯ สาว กามธาตุ, สา รูปธาตูติ? น เหวํ วตฺตพฺเพ…เป.… สาว กามธาตุ, สา รูปธาตูติ? อามนฺตาฯ กามภเวน สมนฺนาคโต ปุคฺคโล ทฺวีหิ ภเวหิ สมนฺนาคโต โหติ – กามภเวน จ รูปภเวน จาติ? น เหวํ วตฺตพฺเพฯ

รูปธาตุกถา นิฏฺฐิตาฯ

8. อฏฺฐมวคฺโค

(78) 6. อรูปธาตุกถา

[517] อรูปิโน ธมฺมา อรูปธาตูติ? อามนฺตาฯ เวทนา ภโว คติ สตฺตาวาโส สํสาโร โยนิ วิญฺญาณฏฺฐิติ อตฺตภาวปฏิลาโภติ? น เหวํ วตฺตพฺเพ…เป.… อตฺถิ เวทนูปคํ กมฺมนฺติ? น เหวํ วตฺตพฺเพ…เป.… อตฺถิ เวทนูปคา สตฺตาติ? น เหวํ วตฺตพฺเพ…เป.… เวทนาย สตฺตา ชายนฺติ ชียนฺติ มียนฺติ จวนฺติ อุปปชฺชนฺตีติ? น เหวํ วตฺตพฺเพ…เป.… เวทนาย อตฺถิ เวทนา สญฺญา สงฺขารา วิญฺญาณนฺติ? น เหวํ วตฺตพฺเพ…เป.… เวทนา จตุโวการภโวติ? น เหวํ วตฺตพฺเพ…เป.…ฯ

อรูปธาตุ ภโว คติ…เป.… อตฺตภาวปฏิลาโภติ? อามนฺตาฯ เวทนา ภโว คติ…เป.… อตฺตภาวปฏิลาโภติ? น เหวํ วตฺตพฺเพ…เป.… อตฺถิ อรูปธาตูปคํ กมฺมนฺติ? อามนฺตาฯ อตฺถิ เวทนูปคํ กมฺมนฺติ? น เหวํ วตฺตพฺเพ…เป.… อตฺถิ อรูปธาตูปคา สตฺตาติ? อามนฺตาฯ อตฺถิ เวทนูปคา สตฺตาติ? น เหวํ วตฺตพฺเพ…เป.…ฯ

อรูปธาตุยา สตฺตา ชายนฺติ ชียนฺติ มียนฺติ จวนฺติ อุปปชฺชนฺตีติ? อามนฺตาฯ เวทนาย สตฺตา ชายนฺติ ชียนฺติ มียนฺติ จวนฺติ อุปปชฺชนฺตีติ? น เหวํ วตฺตพฺเพ…เป.… อรูปธาตุยา อตฺถิ เวทนา สญฺญา สงฺขารา วิญฺญาณนฺติ? อามนฺตาฯ เวทนาย อตฺถิ เวทนา สญฺญา สงฺขารา วิญฺญาณนฺติ? น เหวํ วตฺตพฺเพ…เป.… อรูปธาตุ จตุโวการภโวติ? อามนฺตาฯ เวทนา จตุโวการภโวติ? น เหวํ วตฺตพฺเพ…เป.…ฯ

[518] อรูปิโน ธมฺมา อรูปธาตุ, กามธาตุยา อตฺถิ เวทนา สญฺญา สงฺขารา วิญฺญาณนฺติ? อามนฺตาฯ สาว กามธาตุ, สา อรูปธาตูติ? น เหวํ วตฺตพฺเพ…เป.… สาว กามธาตุ, สา อรูปธาตูติ? อามนฺตาฯ กามภเวน สมนฺนาคโต ปุคฺคโล ทฺวีหิ ภเวหิ สมนฺนาคโต โหติ – กามภเวน จ อรูปภเวน จาติ? น เหวํ วตฺตพฺเพ…เป.…ฯ

รูปิโน ธมฺมา รูปธาตุ, อรูปิโน ธมฺมา อรูปธาตุ, กามธาตุยา อตฺถิ รูปํ เวทนา สญฺญา สงฺขารา วิญฺญาณนฺติ? อามนฺตา ฯ สาว กามธาตุ, สา รูปธาตุ, สา อรูปธาตูติ? น เหวํ วตฺตพฺเพ…เป.… สาว กามธาตุ, สา รูปธาตุ, สา อรูปธาตูติ? อามนฺตาฯ กามภเวน สมนฺนาคโต ปุคฺคโล ตีหิ ภเวหิ สมนฺนาคโต โหติ – กามภเวน จ รูปภเวน จ อรูปภเวน จาติ? น เหวํ วตฺตพฺเพ…เป.…ฯ

อรูปธาตุกถา นิฏฺฐิตาฯ

8. อฏฺฐมวคฺโค