[496] อกุสลานํ ธมฺมานํ ชรามรณํ, อกุสลานํ ธมฺมานํ วิปาโกติ? อามนฺตาฯ กุสลานํ ธมฺมานํ ชรามรณํ, กุสลานํ ธมฺมานํ วิปาโกติ? น เหวํ วตฺตพฺเพ…เป.…ฯ

กุสลานํ ธมฺมานํ ชรามรณํ, น วตฺตพฺพํ – ‘‘กุสลานํ ธมฺมานํ วิปาโก’’ติ? อามนฺตาฯ อกุสลานํ ธมฺมานํ ชรามรณํ, น วตฺตพฺพํ – ‘‘อกุสลานํ ธมฺมานํ วิปาโก’’ติ? น เหวํ วตฺตพฺเพ…เป.…ฯ

กุสลานํ ธมฺมานํ ชรามรณํ, อกุสลานํ ธมฺมานํ วิปาโกติ? อามนฺตาฯ อกุสลานํ ธมฺมานํ ชรามรณํ, กุสลานํ ธมฺมานํ วิปาโกติ? น เหวํ วตฺตพฺเพ…เป.…ฯ

อกุสลานํ ธมฺมานํ ชรามรณํ, น วตฺตพฺพํ – ‘‘กุสลานํ ธมฺมานํ วิปาโก’’ติ? อามนฺตาฯ กุสลานํ ธมฺมานํ ชรามรณํ, น วตฺตพฺพํ – ‘‘อกุสลานํ ธมฺมานํ วิปาโก’’ติ? น เหวํ วตฺตพฺเพ…เป.…ฯ

กุสลานญฺจ อกุสลานญฺจ ธมฺมานํ ชรามรณํ, อกุสลานํ ธมฺมานํ วิปาโกติ? อามนฺตาฯ กุสลานญฺจ อกุสลานญฺจ ธมฺมานํ ชรามรณํ, กุสลานํ ธมฺมานํ วิปาโกติ? น เหวํ วตฺตพฺเพ…เป.…ฯ

กุสลานญฺจ อกุสลานญฺจ ธมฺมานํ ชรามรณํ, น วตฺตพฺพํ – ‘‘กุสลานํ ธมฺมานํ วิปาโก’’ติ? อามนฺตาฯ กุสลานญฺจ อกุสลานญฺจ ธมฺมานํ ชรามรณํ, น วตฺตพฺพํ – ‘‘อกุสลานํ ธมฺมานํ วิปาโก’’ติ? น เหวํ วตฺตพฺเพ…เป.…ฯ

[497] น วตฺตพฺพํ – ‘‘ชรามรณํ วิปาโก’’ติ? อามนฺตาฯ นนุ อตฺถิ ทุพฺพณฺณสํวตฺตนิยํ กมฺมํ อปฺปายุกสํวตฺตนิยํ กมฺมนฺติ? อามนฺตาฯ หญฺจิ อตฺถิ ทุพฺพณฺณสํวตฺตนิยํ กมฺมํ อปฺปายุกสํวตฺตนิยํ กมฺมํ, เตน วต เร วตฺตพฺเพ – ‘‘ชรามรณํ วิปาโก’’ติฯ

ชรามรณํ วิปาโกติกถา นิฏฺฐิตาฯ

7. สตฺตมวคฺโค

(71) 9. อริยธมฺมวิปากกถา

[498] นตฺถิ อริยธมฺมวิปาโกติ? อามนฺตาฯ นนุ มหปฺผลํ สามญฺญํ มหปฺผลํ พฺรหฺมญฺญนฺติ? อามนฺตาฯ หญฺจิ มหปฺผลํ สามญฺญํ มหปฺผลํ พฺรหฺมญฺญํ, โน จ วต เร วตฺตพฺเพ – ‘‘นตฺถิ อริยธมฺมวิปาโก’’ติฯ

นตฺถิ อริยธมฺมวิปาโกติ? อามนฺตาฯ นนุ อตฺถิ โสตาปตฺติผลนฺติ? อามนฺตาฯ หญฺจิ อตฺถิ โสตาปตฺติผลํ, โน จ วต เร วตฺตพฺเพ – ‘‘นตฺถิ อริยธมฺมวิปาโก’’ติฯ นนุ อตฺถิ สกทาคามิผลํ…เป.… อนาคามิผลํ…เป.… อรหตฺตผลนฺติ? อามนฺตาฯ หญฺจิ อตฺถิ อรหตฺตผลํ, โน จ วต เร วตฺตพฺเพ – ‘‘นตฺถิ อริยธมฺมวิปาโก’’ติฯ

โสตาปตฺติผลํ น วิปาโกติ? อามนฺตาฯ ทานผลํ น วิปาโกติ? น เหวํ วตฺตพฺเพ…เป.… โสตาปตฺติผลํ น วิปาโกติ? อามนฺตาฯ สีลผลํ…เป.… ภาวนาผลํ น วิปาโกติ? น เหวํ วตฺตพฺเพ…เป.…ฯ

สกทาคามิผลํ…เป.… อนาคามิผลํ…เป.… อรหตฺตผลํ น วิปาโกติ? อามนฺตาฯ ทานผลํ น วิปาโกติ? น เหวํ วตฺตพฺเพ…เป.… อรหตฺตผลํ น วิปาโกติ? อามนฺตาฯ สีลผลํ…เป.… ภาวนาผลํ น วิปาโกติ? น เหวํ วตฺตพฺเพ…เป.… ทานผลํ วิปาโกติ? อามนฺตาฯ โสตาปตฺติผลํ วิปาโกติ? น เหวํ วตฺตพฺเพ…เป.…ฯ

ทานผลํ วิปาโกติ? อามนฺตาฯ สกทาคามิผลํ…เป.… อนาคามิผลํ…เป.… อรหตฺตผลํ วิปาโกติ? น เหวํ วตฺตพฺเพ…เป.… สีลผลํ…เป.… ภาวนาผลํ วิปาโกติ? อามนฺตาฯ โสตาปตฺติผลํ วิปาโกติ? น เหวํ วตฺตพฺเพ…เป.… ภาวนาผลํ วิปาโกติ? อามนฺตาฯ สกทาคามิผลํ…เป.… อนาคามิผลํ …เป.… อรหตฺตผลํ วิปาโกติ? น เหวํ วตฺตพฺเพ…เป.…ฯ

[499] กามาวจรํ กุสลํ สวิปากนฺติ? อามนฺตาฯ โลกุตฺตรํ กุสลํ สวิปากนฺติ? น เหวํ วตฺตพฺเพ…เป.… รูปาวจรํ กุสลํ…เป.… อรูปาวจรํ กุสลํ สวิปากนฺติ? อามนฺตาฯ โลกุตฺตรํ กุสลํ สวิปากนฺติ? น เหวํ วตฺตพฺเพ…เป.…ฯ