เมนู

จกฺขุวิญฺญาณํ …เป.… มโนวิญฺญาณํ กตมกฺขนฺธคณนํ คจฺฉตีติ ? วิญฺญาณกฺขนฺธคณนํ คจฺฉตีติฯ หญฺจิ มโนวิญฺญาณํ วิญฺญาณกฺขนฺธคณนํ คจฺฉติ, เตน วต เร วตฺตพฺเพ – ‘‘มโนวิญฺญาณํ วิญฺญาณกฺขนฺเธน สงฺคหิต’’นฺติฯ

[472] ยถา ทาเมน วา โยตฺเตน วา ทฺเว พลิพทฺทา สงฺคหิตา, สิกฺกาย ปิณฺฑปาโต สงฺคหิโต, สา คทฺทุเลน สงฺคหิโต; เอวเมว เต ธมฺมา เตหิ ธมฺเมหิ สงฺคหิตาติ [สกวาทิวจนํ (อฏฺฐกถา ปสฺสิตพฺพา)]? หญฺจิ ทาเมน วา โยตฺเตน วา ทฺเว พลีพทฺทา สงฺคหิตา, สิกฺกาย ปิณฺฑปาโต สงฺคหิโต, สา คทฺทุเลน สงฺคหิโต, เตน วต เร วตฺตพฺเพ – ‘‘อตฺถิ เกจิ ธมฺมา เกหิจิ ธมฺเมหิ สงฺคหิตา’’ติ [สกวาทิวจนํ (อฏฺฐกถา ปสฺสิตพฺพา)]

สงฺคหิตกถา นิฏฺฐิตาฯ

7. สตฺตมวคฺโค

(64) 2. สมฺปยุตฺตกถา

[473] นตฺถิ เกจิ ธมฺมา เกหิจิ ธมฺเมหิ สมฺปยุตฺตาติ? อามนฺตาฯ นนุ อตฺถิ เกจิ ธมฺมา เกหิจิ ธมฺเมหิ สหคตา สหชาตา สํสฏฺฐา เอกุปฺปาทา เอกนิโรธา เอกวตฺถุกา เอการมฺมณาติ? อามนฺตาฯ หญฺจิ อตฺถิ เกจิ ธมฺมา เกหิจิ ธมฺเมหิ สหคตา สหชาตา สํสฏฺฐา เอกุปฺปาทา เอกนิโรธา เอกวตฺถุกา เอการมฺมณา, โน จ วต เร วตฺตพฺเพ – ‘‘นตฺถิ เกจิ ธมฺมา เกหิจิ ธมฺเมหิ สมฺปยุตฺตา’’ติฯ

เวทนากฺขนฺโธ สญฺญากฺขนฺเธน สหชาโตติ? อามนฺตาฯ หญฺจิ เวทนากฺขนฺโธ สญฺญากฺขนฺเธน สหชาโต, เตน วต เร วตฺตพฺเพ – ‘‘เวทนากฺขนฺโธ สญฺญากฺขนฺเธน สมฺปยุตฺโต’’ติฯ

เวทนากฺขนฺโธ สงฺขารกฺขนฺเธน… วิญฺญาณกฺขนฺเธน สหชาโตติ? อามนฺตาฯ หญฺจิ เวทนากฺขนฺโธ วิญฺญาณกฺขนฺเธน สหชาโต, เตน วต เร วตฺตพฺเพ – ‘‘เวทนากฺขนฺโธ วิญฺญาณกฺขนฺเธน สมฺปยุตฺโต’’ติฯ

สญฺญากฺขนฺโธ … สงฺขารกฺขนฺโธ… วิญฺญาณกฺขนฺโธ เวทนาขนฺเธน… สญฺญากฺขนฺเธน… สงฺขารกฺขนฺเธน สหชาโตติ? อามนฺตาฯ หญฺจิ วิญฺญาณกฺขนฺโธ สงฺขารกฺขนฺเธน สหชาโต , เตน วต เร วตฺตพฺเพ – ‘‘วิญฺญาณกฺขนฺโธ สงฺขารกฺขนฺเธน สมฺปยุตฺโต’’ติฯ

[474] ยถา ติลมฺหิ เตลํ อนุคตํ อนุปวิฏฺฐํ, อุจฺฉุมฺหิ รโส อนุคโต อนุปวิฏฺโฐ; เอวเมว เต ธมฺมา เตหิ ธมฺเมหิ อนุคตา อนุปวิฏฺฐาติ? น เหวํ วตฺตพฺเพ…เป.…ฯ

สมฺปยุตฺตกถา นิฏฺฐิตาฯ

7. สตฺตมวคฺโค

(65) 3. เจตสิกกถา

[475] นตฺถิ เจตสิโก ธมฺโมติ? อามนฺตาฯ นนุ อตฺถิ เกจิ ธมฺมา จิตฺเตน สหคตา สหชาตา สํสฏฺฐา สมฺปยุตฺตา เอกุปฺปาทา เอกนิโรธา เอกวตฺถุกา เอการมฺมณาติ? อามนฺตาฯ หญฺจิ อตฺถิ เกจิ ธมฺมา จิตฺเตน สหคตา สหชาตา สํสฏฺฐา สมฺปยุตฺตา เอกุปฺปาทา เอกนิโรธา เอกวตฺถุกา เอการมฺมณา, โน จ วต เร วตฺตพฺเพ – ‘‘นตฺถิ เจตสิโก ธมฺโม’’ติฯ

ผสฺโส จิตฺเตน สหชาโตติ? อามนฺตาฯ หญฺจิ ผสฺโส จิตฺเตน สหชาโต, เตน วต เร วตฺตพฺเพ – ‘‘ผสฺโส เจตสิโก’’ติฯ เวทนา…เป.… สญฺญา… เจตนา… สทฺธา… วีริยํ… สติ… สมาธิ… ปญฺญา… ราโค… โทโส… โมโห…เป.… อโนตฺตปฺปํ จิตฺเตน สหชาตนฺติ? อามนฺตาฯ หญฺจิ อโนตฺตปฺปํ จิตฺเตน สหชาตํ, เตน วต เร วตฺตพฺเพ – ‘‘อโนตฺตปฺปํ เจตสิก’’นฺติฯ