อนิยตสฺส นิยามคมนาย อตฺถิ ญาณนฺติ? อามนฺตาฯ อนิยตสฺส อนิยามคมนาย อตฺถิ ญาณนฺติ? น เหวํ วตฺตพฺเพ…เป.…ฯ
อนิยตสฺส อนิยามคมนาย นตฺถิ ญาณนฺติ? อามนฺตาฯ อนิยตสฺส นิยามคมนาย นตฺถิ ญาณนฺติ? น เหวํ วตฺตพฺเพ…เป.…ฯ
[429] อนิยตสฺส นิยามคมนาย อตฺถิ ญาณนฺติ? อามนฺตาฯ อนิยตสฺส นิยามคมนาย อตฺถิ นิยาโมติ? น เหวํ วตฺตพฺเพ…เป.…ฯ
อนิยตสฺส นิยามคมนาย อตฺถิ ญาณนฺติ? อามนฺตาฯ อนิยตสฺส นิยามคมนาย อตฺถิ สติปฏฺฐานา… สมฺมปฺปธานา… อิทฺธิปาทา… อินฺทฺริยา… พลา… โพชฺฌงฺคาติ? น เหวํ วตฺตพฺเพ…เป.…ฯ
อนิยตสฺส นิยามคมนาย นตฺถิ นิยาโมติ? อามนฺตาฯ หญฺจิ อนิยตสฺส นิยามคมนาย นตฺถิ นิยาโม, โน วต เร วตฺตพฺเพ – ‘‘อนิยตสฺส นิยามคมนาย อตฺถิ ญาณ’’นฺติฯ
อนิยตสฺส นิยามคมนาย นตฺถิ สติปฏฺฐานา…เป.… โพชฺฌงฺคาติ? อามนฺตาฯ หญฺจิ อนิยตสฺส นิยามคมนาย นตฺถิ โพชฺฌงฺคา, โน วต เร วตฺตพฺเพ – ‘‘อนิยตสฺส นิยามคมนาย อตฺถิ ญาณ’’นฺติฯ
[430] อนิยตสฺส นิยามคมนาย อตฺถิ ญาณนฺติ? อามนฺตาฯ โคตฺรภุโน ปุคฺคลสฺส โสตาปตฺติมคฺเค ญาณํ อตฺถีติ? น เหวํ วตฺตพฺเพ…เป.… โสตาปตฺติผลสจฺฉิกิริยาย ปฏิปนฺนสฺส ปุคฺคลสฺส โสตาปตฺติผเล ญาณํ อตฺถีติ? น เหวํ วตฺตพฺเพ …เป.… อรหตฺตสจฺฉิกิริยาย ปฏิปนฺนสฺส ปุคฺคลสฺส อรหตฺเต ญาณํ อตฺถีติ? น เหวํ วตฺตพฺเพ…เป.…ฯ
[431] น วตฺตพฺพํ – ‘‘อนิยตสฺส นิยามคมนาย อตฺถิ ญาณ’’นฺติ? อามนฺตาฯ นนุ ภควา ชานาติ – ‘‘อยํ ปุคฺคโล สมฺมตฺตนิยามํ โอกฺกมิสฺสติ, ภพฺโพ อยํ ปุคฺคโล ธมฺมํ อภิสเมตุ’’นฺติ? อามนฺตาฯ หญฺจิ ภควา ชานาติ – ‘‘อยํ ปุคฺคโล สมฺมตฺตนิยามํ โอกฺกมิสฺสติ, ภพฺโพ อยํ ปุคฺคโล ธมฺมํ อภิสเมตุํ,’’ เตน วต เร วตฺตพฺเพ – ‘‘อนิยตสฺส นิยามคมนาย อตฺถิ ญาณ’’นฺติฯ
นิยามกถา นิฏฺฐิตาฯ
5. ปญฺจมวคฺโค