อุปปตฺเตสิเยน จิตฺเตน ทุกฺขํ ปริชานาติ, สมุทยํ ปชหติ, นิโรธํ สจฺฉิกโรติ, มคฺคํ ภาเวตีติ? น เหวํ วตฺตพฺเพ …เป.… สห อุปปตฺติยา อรหาติ? อามนฺตาฯ จุติจิตฺตํ มคฺคจิตฺตํ อุปปตฺเตสิยํ จิตฺตํ ผลจิตฺตนฺติ? น เหวํ วตฺตพฺเพ…เป.…ฯ

อุปปตฺติกถา นิฏฺฐิตาฯ

4. จตุตฺถวคฺโค

(35) 3. อนาสวกถา

[391] อรหโต สพฺเพ ธมฺมา อนาสวาติ? อามนฺตาฯ มคฺโค ผลํ นิพฺพานํ, โสตาปตฺติมคฺโค โสตาปตฺติผลํ, สกทาคามิมคฺโค สกทาคามิผลํ, อนาคามิมคฺโค อนาคามิผลํ, อรหตฺตมคฺโค อรหตฺตผลํ, สติปฏฺฐานํ สมฺมปฺปธานํ อิทฺธิปาโท อินฺทฺริยํ พลํ โพชฺฌงฺโคติ? น เหวํ วตฺตพฺเพ…เป.…ฯ

อรหโต สพฺเพ ธมฺมา อนาสวาติ? อามนฺตาฯ อรหโต จกฺขุํ อนาสวนฺติ? น เหวํ วตฺตพฺเพ…เป.…ฯ อรหโต จกฺขุํ อนาสวนฺติ? อามนฺตาฯ มคฺโค ผลํ นิพฺพานํ, โสตาปตฺติมคฺโค โสตาปตฺติผลํ…เป.… โพชฺฌงฺโคติ? น เหวํ วตฺตพฺเพ…เป.…ฯ

อรหโต โสตํ…เป.… อรหโต ฆานํ… อรหโต ชิวฺหา… อรหโต กาโย อนาสโวติ? น เหวํ วตฺตพฺเพ …เป.… อรหโต กาโย อนาสโวติ? อามนฺตาฯ มคฺโค ผลํ นิพฺพานํ, โสตาปตฺติมคฺโค โสตาปตฺติผลํ…เป.… โพชฺฌงฺโคติ? น เหวํ วตฺตพฺเพ…เป.…ฯ

อรหโต กาโย อนาสโวติ? อามนฺตาฯ อรหโต กาโย ปคฺคหนิคฺคหุปโค เฉทนเภทนุปโค กาเกหิ คิชฺเฌหิ กุลเลหิ สาธารโณติ? อามนฺตาฯ อนาสโว ธมฺโม ปคฺคหนิคฺคหุปโค เฉทนเภทนุปโค กาเกหิ คิชฺเฌหิ กุลเลหิ สาธารโณติ? น เหวํ วตฺตพฺเพ …เป.…ฯ

อรหโต กาเย วิสํ กเมยฺย, สตฺถํ กเมยฺย, อคฺคิ กเมยฺยาติ? อามนฺตาฯ อนาสเว ธมฺเม วิสํ กเมยฺย, สตฺถํ กเมยฺย, อคฺคิ กเมยฺยาติ? น เหวํ วตฺตพฺเพ…เป.…ฯ

ลพฺภา อรหโต กาโย อทฺทุพนฺธเนน พนฺธิตุํ, รชฺชุพนฺธเนน พนฺธิตุํ, สงฺขลิกพนฺธเนน พนฺธิตุํ, คามพนฺธเนน พนฺธิตุํ, นิคมพนฺธเนน พนฺธิตุํ, นครพนฺธเนน พนฺธิตุํ, ชนปทพนฺธเนน พนฺธิตุํ , กณฺฐปญฺจเมหิ พนฺธเนหิ พนฺธิตุนฺติ? อามนฺตาฯ ลพฺภา อนาสโว ธมฺโม อทฺทุพนฺธเนน พนฺธิตุํ, รชฺชุพนฺธเนน พนฺธิตุํ, สงฺขลิกพนฺธเนน พนฺธิตุํ, คามนิคมนครชนปทพนฺธเนน พนฺธิตุํ, กณฺฐปญฺจเมหิ พนฺธเนหิ พนฺธิตุนฺติ? น เหวํ วตฺตพฺเพ…เป.…ฯ

[392] ยทิ อรหา ปุถุชฺชนสฺส จีวรํ เทติ, อนาสวํ หุตฺวา สาสวํ โหตีติ? น เหวํ วตฺตพฺเพ…เป.… อนาสวํ หุตฺวา สาสวํ โหตีติ? อามนฺตาฯ ตญฺเญว อนาสวํ ตํ สาสวนฺติ? น เหวํ วตฺตพฺเพ…เป.… ตญฺเญว อนาสวํ ตํ สาสวนฺติ? อามนฺตาฯ มคฺโค อนาสโว หุตฺวา สาสโว โหตีติ? น เหวํ วตฺตพฺเพ…เป.… ผลํ… สติปฏฺฐานํ… สมฺมปฺปธานํ… อิทฺธิปาโท… อินฺทฺริยํ… พลํ… โพชฺฌงฺโค อนาสโว หุตฺวา สาสโว โหตีติ? น เหวํ วตฺตพฺเพ…เป.…ฯ

ยทิ อรหา ปุถุชฺชนสฺส ปิณฺฑปาตํ เทติ, เสนาสนํ เทติ , คิลานปจฺจยเภสชฺชปริกฺขารํ เทติ, อนาสโว หุตฺวา สาสโว โหตีติ? น เหวํ วตฺตพฺเพ…เป.… อนาสโว หุตฺวา สาสโว โหตีติ? อามนฺตาฯ ตญฺเญว อนาสวํ ตํ สาสวนฺติ? น เหวํ วตฺตพฺเพ…เป.… ตญฺเญว อนาสวํ ตํ สาสวนฺติ? อามนฺตาฯ มคฺโค อนาสโว หุตฺวา สาสโว โหตีติ? น เหวํ วตฺตพฺเพ…เป.… ผลํ… สติปฏฺฐานํ… สมฺมปฺปธานํ… อิทฺธิปาโท… อินฺทฺริยํ… พลํ… โพชฺฌงฺโค อนาสโว หุตฺวา สาสโว โหตีติ? น เหวํ วตฺตพฺเพ…เป.…ฯ

ยทิ ปุถุชฺชโน อรหโต จีวรํ เทติ, สาสวํ หุตฺวา อนาสวํ โหตีติ? น เหวํ วตฺตพฺเพ…เป.… สาสวํ หุตฺวา อนาสวํ โหตีติ? อามนฺตาฯ ตญฺเญว สาสวํ ตํ อนาสวนฺติ? น เหวํ วตฺตพฺเพ…เป.… ตญฺเญว สาสวํ ตํ อนาสวนฺติ? อามนฺตาฯ ราโค สาสโว หุตฺวา อนาสโว โหตีติ? น เหวํ วตฺตพฺเพ…เป.… โทโส…เป.… โมโห…เป.… อโนตฺตปฺปํ สาสวํ หุตฺวา อนาสวํ โหตีติ? น เหวํ วตฺตพฺเพ…เป.…ฯ

ยทิ ปุถุชฺชโน อรหโต ปิณฺฑปาตํ เทติ, เสนาสนํ เทติ, คิลานปจฺจยเภสชฺชปริกฺขารํ เทติ, สาสโว หุตฺวา อนาสโว โหตีติ? น เหวํ วตฺตพฺเพ…เป.… สาสโว หุตฺวา อนาสโว โหตีติ? อามนฺตาฯ

ตญฺเญว สาสวํ ตํ อนาสวนฺติ? น เหวํ วตฺตพฺเพ…เป.… ตญฺเญว สาสวํ ตํ อนาสวนฺติ? อามนฺตาฯ ราโค สาสโว หุตฺวา อนาสโว โหตีติ ? น เหวํ วตฺตพฺเพ…เป.… โทโส…เป.… โมโห…เป.… อโนตฺตปฺปํ สาสวํ หุตฺวา อนาสวํ โหตีติ? น เหวํ วตฺตพฺเพ…เป.…ฯ

น วตฺตพฺพํ – ‘‘อรหโต สพฺเพ ธมฺมา อนาสวา’’ติ? อามนฺตาฯ นนุ อรหา อนาสโวติ? อามนฺตาฯ หญฺจิ อรหา อนาสโว, เตน วต เร วตฺตพฺเพ – ‘‘อรหโต สพฺเพ ธมฺมา อนาสวา’’ติฯ

อนาสวกถา นิฏฺฐิตาฯ

4. จตุตฺถวคฺโค

(36) 4. สมนฺนาคตกถา

[393] อรหา จตูหิ ผเลหิ สมนฺนาคโตติ? อามนฺตาฯ อรหา จตูหิ ผสฺเสหิ จตูหิ เวทนาหิ จตูหิ สญฺญาหิ จตูหิ เจตนาหิ จตูหิ จิตฺเตหิ จตูหิ สทฺธาหิ จตูหิ วีริเยหิ จตูหิ สตีหิ จตูหิ สมาธีหิ จตูหิ ปญฺญาหิ สมนฺนาคโตติ? น เหวํ วตฺตพฺเพ…เป.…ฯ

อนาคามี ตีหิ ผเลหิ สมนฺนาคโตติ? อามนฺตาฯ อนาคามี ตีหิ ผสฺเสหิ…เป.… ตีหิ ปญฺญาหิ สมนฺนาคโตติ? น เหวํ วตฺตพฺเพ…เป.…ฯ

สกทาคามี ทฺวีหิ ผเลหิ สมนฺนาคโตติ? อามนฺตาฯ สกทาคามี ทฺวีหิ ผสฺเสหิ…เป.… ทฺวีหิ ปญฺญาหิ สมนฺนาคโตติ? น เหวํ วตฺตพฺเพ…เป.…ฯ

อรหา โสตาปตฺติผเลน สมนฺนาคโตติ? อามนฺตาฯ อรหา โสตาปนฺโน สตฺตกฺขตฺตุปรโม, โกลงฺโกโล, เอกพีชีติ? น เหวํ วตฺตพฺเพ…เป.… อรหา สกทาคามิผเลน สมนฺนาคโตติ? อามนฺตาฯ อรหา สกทาคามีติ? น เหวํ วตฺตพฺเพ …เป.… อรหา อนาคามิผเลน สมนฺนาคโตติ? อามนฺตาฯ อรหา อนาคามี, อนฺตราปรินิพฺพายี, อุปหจฺจปรินิพฺพายี, อสงฺขารปรินิพฺพายี, สสงฺขารปรินิพฺพายี, อุทฺธํโสโต อกนิฏฺฐคามีติ? น เหวํ วตฺตพฺเพ…เป.…ฯ

อนาคามี โสตาปตฺติผเลน สมนฺนาคโตติ? อามนฺตาฯ